Monday, May 20, 2024
- ማስታወቂያ -
- ማስታወቂያ -

ኢትዮጵያ የግመል ሥጋ ኤክስፖርት ማድረግ ጀመረች

spot_img

ተዛማጅ ፅሁፎች

በኢትዮጵያ ሁለት ድርጅቶችን የሚያንቀሳቅሰው የህንድ ግዙፍ ሥጋ አምራች አላና ግሩፕ፣ ከፍየልና ከበግ ሥጋ በተጨማሪ የግመል ሥጋ ኤክስፖርት ማድረግ መጀመሩን አስታወቀ፡፡

የአላና ግሩፕ ዋና ሥራ አስኪያጅ አቶ ከሊፋ ሁሴን ለሪፖርተር እንደገለጹት፣ ኩባንያው ከፍየልና ከበግ ሥጋ በተጨማሪ ከኢትዮጵያ ለመጀመሪያ ጊዜ የግመል ሥጋ ወደ ውጭ በመላክ ቀዳሚ ሆኗል፡፡

ኩባንያው የግመል ሥጋ ወደ ሳዑዲ ዓረቢያ ኤክስፖርት ማድረግ ከጀመረ ሁለት ወር ያህል ማስቆጠሩን የተናገሩት ዋና ሥራ አስኪያጁ፣ በየወሩ 600 ግመሎችን ለዕርድ በማዋል ኤክስፖርት እያደረገ መሆኑን አስረድተዋል፡፡

የቁም ግመሎችን ከቦረናና ከሶማሌ ክልል በማስመጣት እንዲደልቡ ከተደረገ በኋላ፣ በቀጥታ ለዕርድ በማዋል፣ በወር ከ50 ቶን በላይ የግመል ሥጋ ወደ ውጭ እንደሚላክ አብራርተዋል፡፡

ከግመል ሥጋ ብቻ በወር ከ200 ሺሕ ዶላር በላይ እንደሚገኝ የገለጹት ዋና ሥራ አስኪያጁ፣ በወር 50 ሺሕ በጎችና ፍየሎች በማረድ ኤክስፖርት እየተደረገ መሆኑን ተናግረዋል፡፡

በአጠቃላይ ከግመል፣ ከፍየልና ከበግ ሥጋ ኤክስፖርት በወር ከ1.5 ሚሊዮን ዶላር በላይ ገቢ እንደሚገኝ ጠቅሰው፣ የግመል ሥጋም ተወዳጅነትን በማግኘቱ ወደፊት ለተለያዩ አገሮች ኤክስፖርት ለማድረግ ዕቅድ ተይዞ እየተሠራ እንደሆነ ጠቁመዋል፡፡

የግመል ሥጋ ተፈላጊነቱ እንዲጨምር ኩባንያው የተለያዩ አሠራሮችን እንደሚከተል ያስታወቁት አቶ ከሊፋ፣ ዱባይ፣ ማሌዥያ፣ ኳታርና ሌሎች አገሮች ለመላክ በንግግር ላይ መሆናቸውን ገልጸዋል፡፡

በአላና ግሩፕ ሥር ሞጆ የሚገኘው ‹‹አክሰከር ኢትዮጵያ›› እና ዝዋይ አዳሚ ቱሉ የሚገኘው ‹‹ፍሪጎሪፊክ ቦራን ፉድስ›› የሚባሉ ሁለት ቄራዎች መኖራቸውን ተናግረዋል፡፡

ለኤክስፖርትነት የሚውሉ ፍየልና በግ የቁም እንስሳቶችን ከቦረና፣ ከባሌ፣ ከአርባ ምንጭና ከኮንሶ እንደሚያመጡ ገልጸው፣ አብዛኛውን ጊዜ ድንበር አካባቢ እነዚህ የቁም እንስሳት በሕገወጥ መንገድ ስለሚወጡ የአቅርቦት ችግር እንደሚፈጠር አስረድተዋል፡፡

የኢትዮጵያ ስታትስቲክስ ኤጀንሲ እ.ኤ.አ. የ2021 መረጃ እንደሚያሳየው፣ ኢትዮጵያ 42 ሚሊዮን በጎች፣ 52.5 ሚሊዮን ፍየሎች፣ 70.2 ሚሊዮን የቀንድ ከብቶች፣ 58 ሚሊዮን ዶሮዎች፣ እንዲሁም ስምንት ሚሊዮን ግመሎች አሏት፡፡

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች