Saturday, May 18, 2024
- Advertisement -
- Advertisement -

ማኅበራዊከገንዘብ ወደ ዓይነት የተቀየረው የሴቶች ድጋፍ

ከገንዘብ ወደ ዓይነት የተቀየረው የሴቶች ድጋፍ

ቀን:

በኢትዮጵያ ከአጠቃላይ የሕዝብ ብዛት ሴቶች ከግማሽ በላይ የሚሆነውን ቁጥር እንደሚሸፍኑ ጥናቶች ያመለክታሉ፡፡ ይሁን እንጂ ብዙዎቹ በማኅበረሰቡ ውስጥም  ሆነ በአንዳንድ መንግሥታዊ አካላት የሚሰጣቸው ቦታ ዝቅተኛ መሆኑም ይታያል፡፡

በርካቶች ለደኅንነታቸው በቂ ዋስትና ባለመኖሩ፣ ለተለያዩ ጥቃቶች ተጋላጭ ሲሆኑ ይስተዋላል፡፡በተለያዩ ዘርፎች ያላቸው ተሳትፎም ከወንዶች ጋር ሲነፃፀር እጅግ ዝቅተኛ መሆኑም  ለጥቃቱ መስፋፋት አስተዋጽኦ አለው፡፡

ችግሩ በተለይ ደግሞ በታዳጊ አገሮች ውስጥ ጎልቶ የሚታይና ኢትዮጵያም በሴቶች ተሳትፎ አፈጻጸም ዝቅተኛውን ደረጃ ይዛ እንደምትገኝ መረጃዎች ያሳያሉ፡፡

- Advertisement -

የሴቶችን ሁለንተናዊ ተሳትፎና ተጠቃሚነት ከፍ ለማድረግ የአዲስ አበባ ሴቶች ሕፃናትና ማኅበራዊ ጉዳይ ቢሮ የተለያዩ ሥራዎችን በመሥራት ላይ መሆኑን ይናገራል፡፡

ሴቶች በኢኮኖሚ ራሳቸውን በመቻል ከኢኮኖሚያዊ ጥገኝነት እንዲላቀቁ ለማድረግ  ያለመ  ፕሮጀክት  በ2012 ዓ.ም.  ወደ ሥራ  ገብቶ ነበር፡፡

ፕሮጀክቱ ከተቋቋመ ጀምሮ 5018 ሴቶችን ተጠቃሚ ያደረገ ሲሆን፣ በ2016 ዓ.ም.  ከሁሉም ክፍለ ከተሞች ለተውጣጡ እናቶች ጉልበትና ጊዜ ቆጣቢ እንዲሁም የሥራ ጫናን የሚያቀሉ ‹‹ተስማሚ ቴክኖሎጂዎች››ን በጣም ችግረኛ ለሆኑ 1051 ሴቶች ድጋፍ ማድረጉን ቢሮው አስታውቋል፡፡

ድጋፍ የተደረገላቸው ሴቶች ምንም ዓይነት የገቢ ምንጭ የሌላቸው ሲሆኑ፣ በተደረገላቸው ድጋፍ የተለያዩ ሥራዎችን ሠርተው ቤተሰባቸውንና ራሳቸውን በኢኮኖሚ ለማሳደግ ያስችላቸዋል ተብሏል፡፡

ለድጋፉ ከ1.5 ሚሊዮን ብር በላይ ወጪ መደረጉንና ገንዘቡን በቀጥታ ከመስጠት፣ ሠርተው ዘላቂ ገቢ ለማስገኘት የሚያስችላቸውን የቴክኖሎጂ ዕቃዎች እንደተሰጣቸው፣ የቢሮው ሴቶች ተሳትፎና ተጠቃሚነት ዘርፍ ዳይሬክተር ወ/ሮ ስፍራሽ አልማው ተናግረዋል፡፡

በኤሌክትሪክ የሚሠራ የእንጀራ ምጣድ፣ ላቀች የእንጀራ ምጣድ፣ የዳቦ መጋገሪያ፣ የሽንኩርት መፍጫ ማሽን፣ የቺፕስ መጥበሻ፣ የሻይ ፔርሙዝና ዘመናዊ  ምድጃ ለሥራ ማስጀመርያ ተብለው የተሰጡ ዕቃዎች ናቸው፡፡

ዕቃዎቹን ለመስጠት ቢሮው የተለያዩ ጥናቶችን ማድረጉን የተናገሩት ዳይሬክተሯ፣ በ2014 እና 2015 ዓ.ም. በተመሳሳይ ድጋፍ ከተደረገላቸው ሴቶች ጥሩ ተሞክሮ ማግኘታቸውን ተናግረዋል፡፡

የዕድሉ ተጠቃሚ ለመሆን የአዲስ አበባ የነዋሪነት መታወቂያ ያላቸው ሆነው ነዋሪነታቸው በወረዳው ኮሚቴ መረጋገጥ እንዳለበት፣ ለእያንዳንዳቸው አሥር ሺሕ ብር የተመደበ ለሥራ ማስኬጃ ወደ ባንክ ደብተራቸው እንደሚገባላቸው ወ/ሮ ስፍራሽ ተናግረዋል፡፡

ዕቃዎቹ የተገዙት ሴቶቹ ለሥራ ያመቸናል  ባሉት መሠረት እንደ ፍላጎታቸው ነው ያሉት ዳይሬክተሯ፣ ዕቃውን ከተረከቡ በኋላ ወደ ሥራ እንዲገቡ ክትትልና ድጋፍ እንደሚደረግላቸው አክለዋል፡፡

ቀደም ሲል ከነበረው ተሞክሮ በመነሳት አንዳንድ እናቶች የተሰጣቸውን ዕቃ ከወሰዱ በኋላ መሸጥና ያለምንም ሥራ ማስቀመጥ ከታዩ ችግሮች እንደሚጠቀሱ አስታውሰው፣ ዘንድሮ ዕቃ የወሰዱ ሴቶች ከሸጡና ካስቀመጡ ሊቆሙ እንደሚችሉ ተናግረዋል፡፡

በቀጣይ ሁለት ሺሕ ለሚሆኑ ሴቶች ተስማሚ በቴክኖሎጂ የዘመኑ ዕቃዎች ለማዳረስ መታቀዱንም አክለዋል፡፡

ከዚህ ቀደም ድጋፍ የተደረገላቸው እናቶች በወሰዱት ምጣድ እንጀራ በመጋገርና በመሸጥ ቤተሰባቸውን በጥሩ ሁኔታ እየመሩ መሆናቸውን መስክረዋል፡፡

በሌላ በኩል ድጋፍና ክትትል ሳይደረግላቸው በመቅረቱ ውጤታማ ሳይሆኑ መቅረታቸውን፣ አንዳንድ እናቶች የተናገሩ ሲሆን፣ በቀጣይ  ተጨማሪ ድጋፍና ክትትል እንዲደረግላቸው ጠይቀዋል፡፡

spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ