Sunday, May 19, 2024
- Advertisement -
- Advertisement -

የሳምንቱ ገጠመኝየ ሳ ም ን ቱ ገ ጠ መ ኝ

የ ሳ ም ን ቱ ገ ጠ መ ኝ

ቀን:

በየዓመቱ የፋሲካ በዓል ሲሆን አንድ ትዝታ ይቀሰቀስብኛል፡፡ ይህ ትዝታዬ ከ34 ዓመታት በላይ አብሮኝ እየኖረ፣ ፋሲካ በደረሰ ቁጥር ፊቴ ድቅን ይልብኛል፡፡ ትዝታ የሰው ልጅ አብሮ አደግ ይመስል ዕድሜ ልክ አብሮ መዝለቁ ግርም ይለኛል፡፡ ይህንን የምለው በሌሎች ርዕሰ ጉዳዮች እኔ ራሴ የተለያዩ ትዝታዎች ስላሉኝ ብቻ ሳይሆን፣ የቅርብ ጓደኞቼም ሆኑ ሌሎች የማውቃቸው በሆነ ጉዳይ ትዝታ ሲቀሰቀስባቸው በርካታ ወጎችን ስለማዳምጥ ነው፡፡ እኔም ብዙ የትዝታ ሰበዞችን እየመዘዝኩ በርካታ ወጎችን ስለሰለቅኩ፣ የራሴን ብቻ ሳይሆን የሌሎችንም ማዳመጥ እወዳለሁ፡፡ ለዚህም ነው የራሴን እያካፈልኩ የሌሎችንም ለማዳመጥ ሁሌም ንቁ የምሆነው፡፡ አሁን ግን የፋሲካ ትዝታዬን ልንገራችሁ፡፡

በ1982 ዓ.ም. ለሥራ ከሄድንበት ባሌ ክፍለ ሀገር ለፋሲካ በዓል ወደ አዲስ አበባ ለመምጣት፣ እኔና የሥራ ባልደረቦቼ ዝግጅት የጀመርነው ከሳምንት በፊት ነበር፡፡ ዝግጅታችንን አጠናቀን ለቤተሰብ ሙክት በግ፣ ቅቤ፣ ዶሮ፣ ዕንቁላል፣ ማርና የመሳሰሉ ለበዓል የሚያስፈልጉ ግብዓቶችን ገዛዝተን ለመስክ ሥራ በምንገለገልባቸው ሁለት ቶዮታ ሃርድ ቶፕ ፒካፕ ተሽከራካሪዎች ጭነን ጉዞ የጀመርነው፣ የፀሎተ ሐሙስ ዕለት ከንጋቱ 12 ሰዓት ነበር፡፡ ከጎባ ከተማ ተነስተን 50 ኪሎ ሜትር ያህል ተጉዘን ለቁርስ ዲንሾ ደረስን፡፡ እንደ ፍሪጅ የምትቀዘቅዘው ዲንሾ ቁርሳችንን ለመብላት “አሥር አለቃ” በመባል የሚታወቁ ትልቅ ሰው ምግብ ቤት ገባን፡፡

ከዲንሾ ከተማ በቅርብ ርቀት ታዋቂው የዲንሾ ብሔራዊ ፓርክ የሚገኝ ሲሆን፣ አካባቢው በጣም ከመቀዝቀዙ የተነሳ የአካባቢው ሰዎች ቀንም ሆነ ምሽት ጋቢን ጨምሮ ወፋፍራም ልብሶች ነበር የሚለብሱት፡፡ እኛም “አሥር አለቃ” ምግብ ቤት ገብተን ጥብስና ዱለት አዘን እየተጠባበቅን ሳለ፣ ሦስት ትልልቅ ሰዎች ወፋፍራም ካፖርቶች ለብሰውና ጭንቅላቶቻቸውን በሹራብ ቆቦች እንደሸፈኑ ገብተው ተቀመጡ፡፡ አዛውንቶቹ የሚበሉትን አዘው ከደጅ ጀምረውት የነበረውን ወግ ሲቀጥሉ፣ ‹‹አገራችንን እሱ ፈጣሪ ይሁናት እንጂ ክፉ ጊዜ እየመጣ እንደሆነ አትጠራጠሩ…›› በማለት አንደኛው አዛውንት ሲናገሩ ሁለቱ በመስማማት ራሳቸውን ነቀነቁ፡፡

- Advertisement -

እኔና አምስት ጓደኞቼ በወጣትነታችን ከቤተሰብ ጀምሮ ትልልቅ ሰዎች ስለመጪው ጊዜ የሚናገሩት ያው የተለመደው ዓይነት ነገር ነው ብለን፣ በአንድ ወጣት አስተናጋጅ ከኩሽና የመጣልንን ትኩስ ጥብስና ዱለት ለመብላት ትኩረታችንን ማዕዱ ላይ አደረግን፡፡ ሦስት አራቴ ያህል ከመጣልን ቁርስ ከመጉረሳችን፣ ‹‹እነዚያ ፒካፖች ላይ የተጫኑት ሙክቶች የዛሬ ሁለት ዓመት ግፋ ቢል ሃያ ብር ነበሩ፡፡ አሁን ግን ከጋሰራ የሚመጡ ሰዎች ሲነግሩኝ ስልሳ ብር ገብተዋል፡፡ ሮቤ ደግሞ ሰባ ብር ይጠራባቸዋል…›› እያሉ አዛውንቱ ሲናገሩ ሁላችንም ቀና ቀና አልን፡፡ እኛ ሙክቶቹን የገዛነው በመቶ ብር ስለነበር ነው በአዛውንቱ ንግግር የተሳብነው፡፡ ‹‹ገና ምን አይታችሁ እኔ ተሰማ አይደለሁም የኑሮ ውድነት በአሥር እጥፍ የሚጨምርበት ጊዜ ሩቅ አይደለም…›› ሲሉ እኛ ግን በአንድ ሙክት ስለተበላነው 30 ብር እያሰላሰልን ነበር፡፡

ረጅሙን ጉዞ ከዲንሾ ተነስተን አዳባንና ዶዶላን አቆራርጠን፣ በቆጂንና አሰላን ተሻግረንና አዳማ (ናዝሬት)፣ ሞጆ ደብረ ዘይት እያልን አመሻሽ ላይ አዲስ አበባ ስንገባ በነፍስ ወከፍ የጎባው ሙክት ሻጭ ታዬ የበላንን ገንዘብ መኪናችን ውስጥ ከምናዳምጣቸው ጥዑም ዜማዎች ጋር እያነሳንና እየጣልን እንደነበር አልዘነጋውም፡፡ ያኔ 30 ብር ማለት ጎባም ሆነ ሮቤ ለወር ቀላቢ ለ10 ቀናት ሥጋ ወጥ፣ አልጫ ሥጋና፣ ፆም ከሆነ ደግሞ በየዓይነቱ ለመብላት የሚከፈል ሒሳብ ነበር፡፡ በዚያን ዘመን ባሌ ውስጥ ምግብ በጣም ርካሽ ስለነበር፣ ምሳ ከአምቦ ውኃ ወይም ለስላሳ መጠጥ ጋር በሁለት ብር መብላት ብርቅ አልነበረም፡፡ የብዙዎቹ ምግብ ቤቶች ዋጋም ተመሳሳይ ነበር፡፡

እኔ ቤተሰቦቼ ዘንድ ደርሼ በወቅቱ የአዲስ አበባ ዋጋ 300 ብር የሚጠራበትን ቀንዳም ሙክት በግ ጎባ በ100 ብር መግዛቴን ስናገር፣ ከቤተሰብ እስከ ጎረቤት ድረስ ያልተገረመ አልነበረም፡፡ ዲንሾ ቁርስ ስንበላ የሙክቱ ዋጋ 70 ብር እንደሆነ አዛውንቱ ሲናገሩ እንደሰማሁና የጎባው በግ ነጋዴ እንዳታለለን ስናገር ማንም ሊያምነኝ አልፈለገም፡፡ በ100 ብር ቅልጥ ያለ ጮማ ያለው አንዳች የሚያህል ሙክት የትም እንደማይገኝ የተከራከሩኝ ብዙ ነበሩ፡፡ የበዓል እረፍታችንን ጨርሰን ወደ ባሌ ስንመለስ ለሥራ ባልደረቦቼ የገጠመኝን አተካሮ ብነግራቸው፣ እነሱም ተመሳሳይ ምላሽ ማግኘታቸውን ነገሩኝ፡፡ በዚያን ጊዜ በ100 ብር ሙክት አዲስ አበባ ውስጥ የሚታሰብ ስላልነበር ነው ተመሳሳይ ነገር የገጠመን፡፡ በዚህ የተነሳ ከጎባው በግ ነጋዴ ጋር አተካሮ መግጠም እንደማያስፈልግ ተግባብተን ተውነው፡፡

ሥራዬ ሙሉ ለሙሉ አዲስ አበባ ከሆነ ግን ሾላ በግ ተራ፣ ኮተቤ ብረታ ብረት፣ አዲሱ ገበያ፣ ሾገሌና የተለያዩ የበግ ገበያዎች በተለይ ለበዓላት ብዙ ጊዜ ሄጃለሁ፡፡ በዓል በደረሰ ቁጥር ግን ሁሌም የዋጋ ጭማሪ ነው የሚጠብቀኝ፡፡ እኔን ብቻ ሳይሆን ሁላችንንም ነው ማለት ይቻላል፡፡ እኔ ለምን የዋጋ ጭማሪ ኖረ ብዬ አጉል ሙግት መክፈት አልፈልግም፡፡ የገንዘባችን የመግዛት አቅም በሳሳ ቁጥር የሚጠበቅ ክስተት ነው፡፡ ነገር ግን የበግ ገበያዎቻችን ለምን ከደላላ ንክኪ ነፃ እንደማይሆኑ ግርም ይለኛል፡፡ አምና ለፋሲካ ኮተቤ ብረታ ብረት አጠገብ ያለው የበግ ገበያ ስደርስ የደላላ ሠራዊት አጥለቅልቆታል፡፡ ነጋዴውን ጠጋ ብዬ ምን ያህሉ ነው ለደላሎቹ የሚደርሰው ስለው አሥራ አምስት ፐርሰንት ሲለኝ ደነገጥኩ፡፡ የኋላቀር ግብይት ሥርዓት መገለጫው ሸማቾችን የደላላ ሲሳይ ማድረጉ የታወቀ ስለሆነ፣ ከእንዲህ ዓይነቱ ውጥንቅጥ የምንወጣበት ጊዜ ይናፍቀኛል፡፡

በፋሲካ በዓል በግ ወይም ሙክት ለመግዛት ከቤተሰብ አባላት ጋር ስንነሳ ሁሌም የባሌው ሙክት እንደ ቀልድ ይነሳል፡፡ እኔ ግን በ70 ወይም በ100 ብር የተገዛው የበግ ሙክት ሳይሆን የሚታወሰኝ፣ እኚያ አዛውንት የወደፊቱን ጊዜ የተነበዩት ነው፡፡ ‹‹…ምን አይታችሁ እኔ ተሰማ አይደለሁም የኑሮ ውድነት በአሥር እጥፍ የሚጨምርበት ጊዜ ሩቅ አይደለም…›› ያሉትን ሳስታውስ ቅጥአምባሩ በጠፋ የግብይት ሥርዓት የምንሰቃይ ሸማቾች ጉዳይ ያሳስበኛል፡፡ በቅርቡ መንግሥት ይህንን ውሉ የጠፋ የግብይት ሥርዓት የሚያስተካክል ውሳኔ ላይ መድረሱ አስደስቶኛል፡፡ ጥቂቶች ከደላሎች ጋር የሚፈነጩበት ይህ ብልሹ የግብይት ሥርዓት ከውጭ በሚመጡ ዘመናዊ አሠራሮች ፈር ይዞ፣ ሁሉም ነገር በገበያ ዋጋ ሲወሰን ትክክለኛው ሸመታ እንደሚኖር ባለሙሉ ተስፋ ነኝ፡፡ እስካሁን በሰፊው የኢትዮጵያ ሕዝብ ላይ ሲቀልዱ የኖሩት ደግሞ ጥጋቸውን እንደሚይዙ አልጠራጠርም፣ ‹‹በሰፈሩት ቁና መሰፈር አይቀርም…›› እንዲሉ፡፡

(አልአዛር ተሾመ፣ ከሰሚት)

spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ

በሥጋ ላይ አላግባብ እየተጨመረ ያለውን ዋጋ መንግሥት ሊቆጣጠረው ይገባል

በአገራችን የግብይት ሥርዓት ውስጥ ኢኮኖሚያዊ ያልሆኑ ወይም ያልተገቡ የዋጋ...

ኢትዮጵያን የተባበረ ክንድ እንጂ የተናጠል ጥረት አይታደጋትም!

ኢትዮጵያ በአሁኑ ጊዜ ከምትገኝበት ውጥንቅጥ ውስጥ የምትወጣበት ዕድል ማግኘት...

የፖለቲካ ቅኝቱ የሕዝባችንን ታሪካዊ ትስስር ለምን አያከብርም?

በንጉሥ ወዳጅነው የዓብይ አህመድ (ዶ/ር) መራሹ የ2010 ዓ.ም. የለውጥ መንግሥት...

ዛሬም ኧረ በሕግ!

በገነት ዓለሙ በዚህ በያዝነው ሚያዝያ/ግንቦት ወይም ሜይ ወር ውስጥ የተከበረው፣...