Friday, May 24, 2024
- ማስታወቂያ -
- ማስታወቂያ -

ኢትዮጵያና ኬንያ በአፍሪካ አኅጉራዊ ነፃ የንግድ ቀጣና ተጠቃሚ ለመሆን እንዲተባበሩ ተጠየቀ

spot_img

ተዛማጅ ፅሁፎች

ኢትዮጵያና ኬንያ በአፍሪካ አኅጉራዊ ነፃ የንግድ ቀጣና ተጠቃሚ ለመሆን እርስ በርስ በመተባበርና የንግድ ልውውጣቸውን በማጠናከር የተሻለ ሥራ ማከናወን እንዳለባቸው፣ በኢትዮጵያ የኬንያ አምባሳደር ጆርጅ ኦሪና ተናገሩ፡፡

አምባሳደሩ ይህንን የተናገሩት የአዲስ አበባ ንግድና ዘርፍ ማኅበራት ምክር ቤት ከኬንያ ማኑፋክቸርስ አሶሴሽን (KMA) ጋር ባዘጋጀው ‹‹የኢትዮ ኬንያ ቢዝነስ ፎረም›› ላይ ሲሆን፣ ፎረሙ ሚያዝያ 16 ቀን 2016 ዓ.ም. በካፒታል ሆቴል ተካሂዷል፡፡

ኬንያዊያን በኢትዮጵያ በንግድና ኢንቨስትመንት ዘርፎች ለመሰማራት የሚያስችላቸው ምቹ ዕድል መፈጠሩን ገልጸው፣ የኢትዮጵያ መንግሥት የውጭ አገር አስመጭና ላኪዎች፣ እንዲሁም የጅምላና የችርቻሮ ነጋዴዎች ኢትዮጵያ ገብተው እንዲሠሩ የመመርያ ማሻሻያ ማድረጉ ትልቅ ዕድል መሆኑን አስረድተዋል፡፡

የሁለቱ አገሮች ግንኙነት የተጀመረው ኬንያ በቅኝ አገዛዝ ሥር ከነበረችበት ጊዜ ጀምሮ መሆኑን ያስታወሱት አምባሳደሩ ሁለቱ አገሮች በመከላከያ ኃይል፣ በቱሪዝም፣ በውጭ ጉዳዮችና በተለያዩ ጉዳዮች ስምምነት ተፈራርመው እየሠሩ መሆናቸውን ጠቁመዋል፡፡

በተለይ የሁለቱ አገሮች የንግድ ግንኙነት የሚፈለገውን ያህል አለማደጉን ጠቅሰው፣ ግንኙነቱን ለማሳደግ ስምምነት መደረጉን አስታውቀዋል፡፡ በተለይ ደግሞ በዚህ ወቅት ትብብራቸውን በማጠናከር በአኅጉራዊው ነፃ የንግድ ቀጣና ተጠቃሚ መሆን አለባቸው ብለዋል፡፡

ይህ በእንዲህ እንዳለ በአፍሪካ ጠንካራ የሕግ ሥርዓት ባለመኖሩ በድንበር ላይ ሕገወጥ የንግድ ሥርዓት እየተስፋፋ መሆኑን፣ የአዲስ አበባ ንግድና የዘርፍ ማኅበራት ምክር ቤት አስታውቋል፡፡

የምክር ቤቱ ፕሬዚዳንት ወ/ሮ መሰንበት ሸንቁጤ በፎረሙ ላይ ባደረጉት ንግግር እንደገለጹት፣ የኢትዮ ኬንያ ቢዝነስ ፎረም የተዘጋጀበት ዋነኛ ምክንያት የሁለቱን አገሮች ንግድና ኢንቨስትመንት ለማጠናከር እንዲቻል ነው፡፡

በአፍሪካ በድንበር ላይ የሚፈጸም ሕገወጥ ንግድ ለማስቀረት፣ ሁሉም አገሮች የሚስማሙት ጠንካራ የሕግ ማዕቀፍ መዘርጋት እንደሚያስፈልግ አስረድተዋል፡፡

በተለይ ችግሩን ለመቅረፍ ሁሉም የአፍሪካ አገሮች የሕግ ማዕቀፍ ቢያወጡም ተግባራዊ  ከማድረግ አኳያ ሰፊ ክፍተት መኖሩን የተናገሩት ፕሬዚዳንቷ፣ ከዚህ በፊት የአፍሪካ አገሮች ጉዳዩን በተመለከተ ያወጧቸውን ሕጎች እንዲያሻሽሉ ምክር ቤቱ ምክረ ሐሳብ ማቅረቡን አክለው ገልጸዋል፡፡

የአፍሪካ አገሮች የትም ሄደው በነፃ የሚገበያዩበት የግብይት ሥርዓት መዘርጋቱን ጠቅሰው፣ በዚህም ኢትዮጵያ ተወዳዳሪ እንድትሆን ጥራት ያላቸው ምርቶችን ማምረት እንደሚገባ ለሪፖርተር ተናግረዋል፡፡

የኢትዮጵያ የንግድ ማኅበረሰብ አባላት ከሌሎች አገሮች አቻዎቻቸው ጋር ልምምድ እንዲለዋወጡ እንዲህ ዓይነት ፎረም እንደሚያስፈልግ ገልጸው፣ ኬንያ ምርቶቿን ወደ ኢትዮጵያ እንደምትልክም አብራርተዋል፡፡

ኢትዮጵያ የማኑፋክቸሪንግ ምርቶችን ወደ ተለያዩ አገሮች በመላክ ተወዳዳሪ መሆን አለባት ያሉት ፕሬዚዳንቷ፣ በተለይም በአሁኑ ወቅት ከኬንያ ጋር ሲነፃፀር የተለያዩ ምርቶች ኤክስፖርት እያደረገች አለመሆኗን አክለው ገልጸዋል፡፡

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች