Saturday, May 18, 2024
- ማስታወቂያ -
- ማስታወቂያ -

ከአንድ ሚሊዮን በላይ አርሶ አደሮች የሰብል መድን ዋስትና እንዲገቡ ሊደረግ ነው

spot_img

ተዛማጅ ፅሁፎች

በአማራ፣ በኦሮሚያና በትግራይ ክልሎች ከአንድ ሚሊዮን በላይ አርሶ አደሮች የሰብል መድን ዋስትና እንዲገቡ ለማድረግ ቅድመ ዝግጅት ማጠናቀቁን ፑል አድቫይዘር የሚባል ተቋም አስታወቀ፡፡

ለአነስተኛ አርሶ አደሮች ተመጣጣኝ የመድን ሽፋን ለመስጠት ‹‹ኢንፑት ቫውቸር ሲስተም›› (IVS) የተሰኘ የመገበያያ ሥርዓት የተዘረጋ መሆኑን፣ አርሶ አደሮች ማዳበሪያ ሲገዙ የሰብል መድን ዋስትና አብረው እንዲገቡ በማድረግ ተግባራዊ የሚደረግ መሆኑን ተቋሙ ሐሙስ ሚያዝያ 17 ቀን 2016 ዓ.ም. አስታውቋል፡፡

በ2015 ዓ.ም. የመኸር ወቅት በድርቅ፣ በከባድ ዝናብ፣ በተባይ የተጎዱ 122 ሺሕ አርሶ አደሮች፣ እንዲሁም ለአየር ንብረት ለውጥ አደጋ ተጋላጭ የሆኑ ሌሎች አርሶ አደሮች 39 ሚሊዮን ብር የካሳ ክፍያ ማግኘታቸውን የኩባንያው ዳይሬክተር አቶ ዳግማዊ ኃይለየሱስ አስረድተዋል፡፡

በግንቦት 2016 ዓ.ም. በአማራ ክልል በ16 ወረዳዎች፣ በኦሮሚያ ክልል ሁለት ዞኖች እንዲሁም በትግራይ ክልል በስድስት ወረዳዎች የሰብል መድን ዋስትና ተግባራዊ ለማድረግ ጥናት መጠናቀቁን ያስታወቁት ዳይሬክተሩ፣ ግጭት ባለባቸው አካባቢዎች ግን ተደራሽ ለመሆን አለመቻሉን ገልጸዋል፡፡

በኢትዮጵያ በግብርናው ዘርፍ ያለውን ወቅታዊ የአየር ንብረት ለውጥ አደጋ በመገንዘብ መፍትሔዎች ለማግኘት ያስችል ዘንድ የተጀመረው ጥረት በግብርና ትራንስፎርሜሽን ኢንስትቲዩት (ATI)፣ በዓለም የምግብ ፕሮግራም (WFP) እና በፑል አድቫይዘር (PUL) ጥምረት የተጀመረ መሆኑን አክለው ገልጸዋል፡፡

የግብርና ትራስፎርሜሽን ኢንስቲትዩት በኢትዮጵያ የሰብል መድን መልክዓ ምድር ላይ አጠቃላይ ጥናት በማካሄድ ወሳኝ ሚና ወጫወቱን ገልጸው፣ የግብርና መድን ተደራሽነትን ለማሳደግ በቀጣይ ሰፊ ሥራ እንደሚከናወን ተናግረዋል፡፡

በቀጣይ ከ7.5 ሚሊዮን በላይ አርሶ አደሮች የመድን ዋስትና ተጠቃሚ እንዲሆኑ እንደሚደረግ፣ አርሶ አደሮች የሰብል መድን ዋስትና ሲገቡ 338 ብር ክፍያ መፈጸም እንዳለባቸው፣ በተለያዩ ምክንያቶች በሰብል ምርቶቻቸው ላይ ውድመት ሲደርስ የካሳ ክፍያ እንደሚሰጣቸውና ክፍያውን ኢንሹራንስ የገቡበት ተቋም የሚፈጽም መሆኑን ገልጸዋል፡፡

የኢትዮጵያ ግብርና ትራንስፎርሜሽን ኢንስቲትዩት የሥራ አመራር ሥራ አስፈጻሚ አቶ ዳዊት ፊሊጶስ እንደገለጹት፣ በግብርና ዘርፍ ውስጥ ትልቁን ድርሻ የሚወጡ አርሶ አደሮች የመድን ዋስትና እንዲያገኙ በማድረግ ዘርፉን መታደግ ያስፈልጋል፡፡

በኢትዮጵያ በመድን ዋስትና የሚሰጠው ለጤና ዘርፍና ለተሽከርካሪዎች መሆኑን የገለጹት ሥራ አስፈጻሚው፣ በግብርና ዘርፍ የተጀመረውን የመድን ዋስትና አሠራር ለማስቀጠል በቀጣይ ትኩረት ይሰጠዋል ብለዋል፡፡

አርሶ አደሮች የመድን ኢንሹራንስ አሠራር በተገቢው መንገድ እንዲረዱ ከተደረገ፣ በግብርና ዘርፍ ለውጥ ማምጣት እንደሚቻል ጠቁመው፣ በትግራይ፣ በኦሮሚያና በሌሎች ክልሎች ተደራሽ ለመሆን ሰፊ እንቅስቃሴ እንደሚደረግ አስታውቀዋል፡፡

ከዚህ በፊት አርሶ አደሮች የመድን ዋስትና ባለማግኘታቸው ምን ያህል አጥተዋል? በሰብል ላይ ምን ያህል ጉዳት ደርሷል? የሚለውን በተመለከተ አሁን ማወቅ አይቻልም ብለዋል፡፡

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች