Monday, May 20, 2024
- Advertisment -
- Advertisment -

[የኢኮኖሚ ጉዳዮች አማካሪው ቅሬታ የቀረበባቸው አንዳንድ ጉዳዮችን ክቡር ሚኒስትሩ ተመልክተው ምላሽና ውሳኔ እንዲሰጡባቸው ለማድረግ ከክቡር ሚኒስትሩ ጋር እየተወያዩ ነው] 

  • ክቡር ሚኒስትር ተቋማችን በሚሰጣቸው አንዳንድ አገልግሎቶች ላይ ጥያቄ እየተነሳ በመሆኑ ነው ዛሬ ከእርስዎ ጋር ለመወያየት የፈለግኩት።
  • የምን ጥያቄ? ማነው ጥያቄውን ያቀረበው?
  • ጥያቄውን ያቀረቡት የተቋማችን ተገልጋዮች ናቸው።
  • እሺ፣ ጥያቄያቸው ምንድነው?
  • በእርግጥ ጥያቄ ብቻ አይደለም።
  • እ…?
  • ቅሬታ ነው፣ ቅሬታቸው እንዲፈታ ነው የሚጠይቁት።
  • ምንድነው ቅሬታቸው?
  • የተወሰኑት ቅሬታ አቅራቢዎች ለኮንስትራክሽን አገልግሎት የሚውሉ ከባድ ተሽከርካሪዎችን ገዝተው ጂቡቲ ወደብ ቢደርሱም ማስገባት አትችሉም ተባልን ነው የሚሉት፡፡
  • ሌሎቹ ቅሬታ አቅራቢዎችስ?
  • ሌሎቹም ተመሳሳይ ቅሬታ ነው ያቀረቡት፡፡
  • ተመሳሳይ ማለት?
  • ለእርሻ አገልግሎት የሚውሉ ትራክተሮች ገዝተው ጂቡቲ ወደብ ከደረሱ በኋላ ወደ አገር ውስጥ ለማስገባት መከልከላቸውን ነው ቅሬታ ያቀረቡት።
  • እንዲህማ ሊሆን አይችልም፡፡
  • ግን ክቡር ሚኒስትር በርካታ ተገልጋዮች ናቸው ቅሬታውን እያቀረቡ ያሉት።
  • እንዴት ሊሆን ይችላል?
  • እኔም ይህንን ለማወቅ ነው ወደ እርስዎ ዘንድ የመጣሁት።
  • ቆይ በእኛ በኩል የተላለፈ ክልከላ አለ እንዴ?
  • እረ በፍፁም።
  • ታዲያ እንዴት ሊሆን ይችላል?
  • እኔም ግራ ገብቶኛል ክቡር ሚኒስትር።
  • እንዲህማ ሊሆን አይችልም፣ በምን ምክንያት እንደተከለከሉ የገለጹት ነገር የለም?
  • እነ ማን?
  • ቅሬታ አቅራቢዎቹ፡፡
  • ከእነሱማ የሰማነው ነገር አለ፡፡
  • በምን ምክንያት ነው አሉ?
  • በነዳጅ ኃይል የሚሠራ ተሽከርካሪ ወደ አገር ማስገባት ተከልክሏል የሚል ምላሽና ምክንያት እንደተሰጣቸው ነው የገለጹልን።
  • አዎ… ትክክል ነው።
  • ምኑ ነው ትክክል?
  • እኔ ዘንግቼው እንጂ ነዳጅ የሚጠቀም ተሽከርካሪ እንዳይገባ ተከልክሏል።
  • እኛ ግን እንደዚያ የሚል መመርያ አላወጣንም ክቡር ሚኒስትር፡፡
  • በእኛ ተቋም እንዳልወጣማ አውቃለሁ።
  • በዚህ ጉዳይ ላይ ደግሞ የመወሰን ሥልጣን በሕግ የተሰጠው ለእኛ ተቋም ብቻ ነው።
  • እንዴት?
  • ያገለገሉ ተሽከርካሪዎች ወደ አገር ውስጥ እንዳይገቡ ማስቀረት የተቻለው እኛ ባወጣነው የኤክሳይስ ታክስ አዋጅ ነው።
  • አዎ፣ ትክክል ነው።
  • ዝቅተኛ ታክስ በመጣላችን ደግሞ አሁን የምናያቸውን አዳዲስ መኪኖችና በኤሌክትሪክ የሚሠሩ ተሽከርካሪዎች እንዲበራከቱ አድርገናል።
  • ልክ ነህ።
  • ይህንን ሁሉ ያደረገነውም የአየር ብክለትን ለመከላከል ብቻ ሳይሆን ለነዳጅ የምናወጣውን ወጪም ለመቀነስ በማሰብ ነው።
  • ይህንንም፣ ልክ ነህ።
  • ታዲያ አሁን እኛ ሳናውቅ የወሰነው ማነው?
  • ምን የወሰነው?
  • በነዳጅ የሚሠሩ ተሽከርካሪዎች እንዳይገቡ ብሎ የወሰነው።
  • ከላይ የመጣ ነው።
  • ከላይ ማለት?
  • ያው ከላይ ነዋ፣ መቼም ከእግዚአብሔር አልልህ።
  • ገባኝ፣ ምንድነው ከላይ የመጣው?
  • አቅጣጫ፡፡
  • በነዳጅ የሚሠሩ ተሽከርካሪዎች እንዳይገቡ የሚል?
  • አዎ፡፡
  • ግን ክቡር ሚኒስትር…
  • እ…?
  • ከላይም ቢሆን የሕግ አግባብን ተከትሎ መምጣት የለበትም ይላሉ?
  • የሕግ አግባብን ተከትሎ ስትል?
  • አቅጣጫ ምንድነው ማለቴ ነው።
  • እንዴት አንተ?
  • ክቡር ሚኒስትር አቅጣጫ ሕግ አይደለም ማለቴ እኮ ነው።
  • ስለዚህ?
  • ስለዚህ መከልከል ካለበትም ይህንን የሚደነግግ ሕግ ወይም መመርያ መውጣት አለበት ማለቴ ነው።
  • መሆን የነበረበትማ እንደዚያ ነው፣ ግን…?
  • ግን ምን ክቡር ሚኒስትር?
  • እሱን ማን ደፍሮ ይበል?
  • እርስዎ አይጠይቁም እንዴ ክቡር ሚኒስትር?
  • አሁን እየተፈታተንከኝ ነው? ችግርህ ከእኔ ጋር ነው ማለት ነው?
  • መዳፈሬ አይደለም ክቡር ሚኒስትር፡፡
  • ካልሆነ ለምን ትጠይቀኛለህ?
  • ታዲያ ለቀረበልን አቤቱታ ምን ዓይነት ምላሽ እንስጥ?
  • ከላይ የመጣ አቅጣጫ እንደሆነ ንገራቸው።
  • እሱ መፍትሔ አይሆንማ ክቡር ሚኒስትር?
  • እንዴት?
  • ትራክተር እንዳይገባ ከልክለን እንዴት ግብርናን ማሳደግ እንችላለን?
  • እኛ አልከለከልንም፣ ከላይ የመጣ አቅጣጫ ነው በላቸው አልኩህ እኮ?
  • ገባኝ ክቡር ሚኒስትር፣ ግን አርሶ አደሮች በተለይም ሰፋፊ እርሻ ያላቸው ጥያቄ ማቅረባቸው አይቀርም ብዬ ነው።
  • ምንድነው የሚጠይቁት?
  • መሬታችንን በምን እንረስ ብለው?
  • ግድ የለም መልስ እንሰጣቸዋለን።
  • ምን ብለን?
  • ከላይ በወረደው አቅጣጫ መሠረት እረሱ ብለን፣
  • ከላይ የመጣው አቅጣጫ በምን ይረሱ ነው የሚለው?
  • በኤሌክትሪክ ትራክተር!

በብዛት የተነበቡ ፅሁፎች

- Advertisment -

ትኩስ ፅሁፎች

በሥጋ ላይ አላግባብ እየተጨመረ ያለውን ዋጋ መንግሥት ሊቆጣጠረው ይገባል

በአገራችን የግብይት ሥርዓት ውስጥ ኢኮኖሚያዊ ያልሆኑ ወይም ያልተገቡ የዋጋ...

ኢትዮጵያን የተባበረ ክንድ እንጂ የተናጠል ጥረት አይታደጋትም!

ኢትዮጵያ በአሁኑ ጊዜ ከምትገኝበት ውጥንቅጥ ውስጥ የምትወጣበት ዕድል ማግኘት...

የፖለቲካ ቅኝቱ የሕዝባችንን ታሪካዊ ትስስር ለምን አያከብርም?

በንጉሥ ወዳጅነው የዓብይ አህመድ (ዶ/ር) መራሹ የ2010 ዓ.ም. የለውጥ መንግሥት...

ዛሬም ኧረ በሕግ!

በገነት ዓለሙ በዚህ በያዝነው ሚያዝያ/ግንቦት ወይም ሜይ ወር ውስጥ የተከበረው፣...

በስድስተኛው ዙር ጠቅላላና ድጋሚ ምርጫ የሚሳተፉ ፓርቲዎች በገዥው ፓርቲ ላይ ተቃውሞ እያቀረቡ ነው

በ2013 ዓ.ም. ስድስተኛው ምርጫ ባልተካሄደባቸው ክልሎች በጠቅላላና በድጋሚ ምርጫ...
spot_img

ተዛማጅ ፅሁፎች

[ክቡር ሚኒስትሩ የቢሮ ሥራቸውን አጠናቀው ከውጭ አገር የመጣ ወንድማቸውን ለመጠየቅ ያረፈበት ገስት ሀውስ ሲደርሱ ወንድማቸው በቴሌቪዥን የሚተላለፈውን ፕሮግራም በመገረም እየተከታተለ አገኙት]

ውይ መጣህ እንዴ? እስኪ አረፍ በል፡፡ ምንድነው እንዲህ ያስደነቀህ? ተደንቄ ሳይሆን ግራ ግብት ብሎኝ ነው። ምኑ ነው ግራ ያጋባህ? የድልድይ ማስመረቅና የድልድይ ማፍረስ ነገር ነዋ። አልገባኝም? አለቃችሁ ድልድይ ሲያስመርቁ የተናገሩትን...

[ክቡር ሚኒስትሩ ከዘመዶቻቸውና ቤተሰቦቻቸው ጋር ሆነው በዓሉን በመኖሪያ ቤታቸው እያከበሩ ነው። ባለቤታቸውም ለበዓሉ የተዘጋጀውን ዳቦ ባርከው እንዲቆርሱ ለሚኒስትሩ እያቀረቡ ነው]

በል ዳቦውን ባርክና ቁረስልንና በዓሉን እናክብር? ጥሩ ወዲህ አምጪው... አዎ! በል መርቅ... ከዓመት ዓመት ያድርሰን... ኧረ በሥርዓት መርቅ ተው? ከዓመት ዓመት ያድርሰን አልኩኝ እኮ ...አልሰማሽም? ከዓመት ዓመት መድረሱ ብቻ ምን...

[ክቡር ሚኒስትር መንግሥት ይፋ ያደረገውን ንቅናቄ አመራሮችና ቤተሰቦቻቸው በግንባር ቀደምትነት እንዲቀላቀሉ መታዘዙን ለባለቤታቸው እያጫወቱ በዚያውም ወደተከፈተው የባንክ ሒሳብ ገንዘብ እንዲያስተላልፉ እያግባቧቸው ነው]

በይ እስኪ ሞባይልሽን አውጪና ወደዚህ የባንክ ሒሳብ አንድ ሺሕ ብር አስተላልፊ? ለምን? መንግሥት ያስጀመረውን ንቅናቄ አመራሩ ከነቤተሰቡ ግንባር ቀደም ሆኖ እንዲደግፍ ታዟል። የምን ንቅናቄ ነው መንግሥት ያስጀመረው? ‹‹ፅዱ...