Saturday, April 20, 2024
- ማስታወቂያ -
- ማስታወቂያ -

ጊዜው ደርሶ የተመለሰ የህዳሴ ግድብ ቦንድ ግዥ ከ1.2 ቢሊዮን ብር በላይ መሆኑ ተገለጸ

ተዛማጅ ፅሁፎች

በተያዘው በጀት ዓመት ጊዜው ደርሶ የተመለሰ የህዳሴ ግድብ ቦንድ ግዥ ከ1.2 ቢሊዮን ብር በላይ መሆኑን፣ የኢትዮጵያ ልማት ባንክ አስታወቀ፡፡

ከነገ በስቲያ መጋቢት 24 ቀን 2016 ዓ.ም. ታላቁ የኢትዮጵያ ህዳሴ ግድብ የተጀመረበትን 13ኛ ዓመት አስመልክቶ፣ የግድቡ ማስተባበሪያ ፕሮጀክት ጽሕፈት ቤት መጋቢት 18 ቀን 2016 ዓ.ም. በሰጠው ጋዜጣዊ መግለጫ ላይ የተገኙት የልማት ባንክ ምክትል ፕሬዚዳንት አቶ ጌታቸው ዋቄ ናቸው ይህንን ያሉት፡፡  

‹‹ቦንድ ለገዙ ሰዎች ገንዘባቸው በጊዜው እየተመለሰ አይደለም የሚለው ትክክለኛ መረጃ አይደለም፤›› ያሉት አቶ ጌታቸው፣ ጊዜው ለደረሰና ገንዘቡ እንዲመለስለት ለፈለገ ማንኛውም ሰው ተመላሽ እየተደረገ መሆኑን ገልጸዋል፡፡ ግድቡ ከተጀመረ ጊዜ አንስቶ 16.8 ቢሊዮን ብር በላይ በቦንድ ሽያጭ ብቻ መሰበሰቡንም አስረድተዋል፡፡

ባለፉት ዓመታት ለግድቡ ከተደረገው የገቢ ማሰባሰቢያ አብዛኛው ገንዘብ የተሰበሰበው በቦንድ ሽያጭ መሆኑን፣ የሕዝባዊ ማስተባበሪያ ጽሕፈት ቤቱ የሕዝብ ግንኙነትና የሚዲያ ኮሙዩኒኬሽን ዳይሬክተር አቶ ኃይሉ አብርሃም ገልጸዋል፡፡ ከ2005 ዓ.ም ጀምሮ እስከ የካቲት 30 ቀን 2016 ዓ.ም. አጠቃላይ የተሰበሰበው የገንዘብ መጠንም 19 ቢሊዮን ብር ያህል መሆኑን ተናግረዋል፡፡

መጋቢት 18 ቀን 2016 ዓ.ም. በተጀመረው የቦንድ ሳምንት 100 ሚሊዮን ብር ለመሰብሰብ መታቀዱ የተገለጸ ሲሆን፣ የቦንዱን ኩፖኖች ለማሳተም ኃላፊነት የተሰጠው ልማት ባንክ 9.59 ቢሊዮን ብር ያህል ዋጋ ያላቸው የቦንድ ኩፖኖች በግምጃ ቤቱ እንደሚገኙ አስታውቋል፡፡ የኢትዮጵያ ንግድ ባንክ በበኩሉ በሁሉም የባንኩ ቅርንጫፎች ቦንድ መግዛት እንደሚቻል ገልጿል፡፡

አጠቃላይ የግድቡ ግንባታ 95 በመቶ መድረሱን የገለጹት አቶ ኃይሉ፣ ከግንባታ ፕሮጀክት ኃላፊዎች የተሰጠውን መረጃ ዋቢ በማድረግ 60 በመቶ ኢትዮጵያውያን የኤሌክትሪክ ኃይል እንዲያገኙ ያስችላል ተብሎ የሚጠበቀው ግድብ ግንባታ፣ በሰባት ወራት ውስጥ ሊጠናቀቅ ይችላል ብለዋል፡፡

የዓባይ ወንዝ የታችኛው ተፋሰስ አገሮች ኢትዮጵያ ግድቡን መገንባት ከጀመረችበት ጊዜ አንስቶ፣ በተለያዩ ጊዜያት የተለያዩ ምክንያቶችን በማንሳት ሲቃወሙ ነበር፡፡ በተቃውሟቸው በምክንያትነት የሚያቀርቡት ኢትዮጵያ የሚያገኙትን የውኃ አቅርቦት እንድትቆጣጠረው ያስችላታል የሚል ነው፡፡ ኢትዮጵያም የአገሮችን የጋራ ተጠቃሚነት መርህ በማክበር ግድቡን እንደምትገነባ እየገለጸች 13 ዓመታት ዘልቃ ግንባታውን 95 በመቶ ማድረሷ ተገልጿል፡፡

አለመግባባቱን ለመፍታት ግብፅ፣ ሱዳንና ኢትዮጵያ ለአራተኛ ጊዜ ለድርድር ቢቀመጡም፣ በግብፅና በኢትዮጵያ መንግሥታት ከሚሰጡ መግለጫዎች ለመረዳት እንደሚቻለው ግን ስምምነት ላይ መድረስ አልተቻለም፡፡ ከታኅሳስ 7 ቀን 2016 እስከ ታኅሳስ 9 ቀን 2016 ዓ.ም. ለሦስት ቀናት በአዲስ አበባ ሲካሄድ በነበረው የሦስትዮሽ ድርድር፣ በግብፅ የተለመደ መሰናክል ፈጣሪነት መግባባት አለመቻሉን የውጭ ጉዳይ ሚኒስቴር ማስታወቁ ይታወሳል፡፡

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች