Saturday, April 20, 2024
- Advertisement -
- Advertisement -
ኪንና ባህል‹‹ያልገሩትን ፈረስ››

‹‹ያልገሩትን ፈረስ››

ቀን:

በየማነ ብርሃኑ

 የኢትዮጵያ አየር መንገድ ንብረት የሆነ ቦይንግ 737 ማክስ 8 አውሮፕላን 149 መንገደኞችንና ስምንት የበረራ ሠራተኞችን አሳፍሮ ከጠዋቱ 2፡38 ሰዓት ከቦሌ አየር ማረፊያ ተነስቶ ወደ ኬንያ፣ ናይሮቢ በመብረር ላይ ሳለ መጋቢት 1 ቀን 2011 ዓ.ም. ቢሾፍቱ (ደብረ ዘይት) አካባቢ መከስከሱ የሚታወስ ነው፡፡

‹‹ያልገሩትን ፈረስ›› | Ethiopian Reporter | ሪፖርተር

- Advertisement -

Video from Enat Bank Youtube Channel.

በአደጋውም በአይሮፕላኑ ውስጥ የነበሩ 157 ሰዎች ሕይወታቸው ያለፈ ሲሆን ከእነዚህም ውስጥ 17ቱ ኢትዮጵያውያን፣ የተቀሩት ደግሞ የ33 አገሮች ዜጎች ናቸው፡፡ ይህ አስደንጋጭና የብዙኃንን ልብ በሐዘን የሰበረ አደጋ ከተከሰተ አምስተኛ ዓመቱን አስቆጥሯል፡፡

የአውሮፕላን አደጋውን በተመለከተ፣ የተጎጂ ቤተሰቦችን ቃለ መጠይቅ በማድረግና የአውሮፕላን አደጋ መርማሪዎች በተለያዩ ጊዜ ያወጧቸውን ሪፖርት መሠረት በማድረግ የተዘጋጀ መጽሐፍ በየካቲት መካተቻ ለንባብ በቅቷል፡፡ ‹‹ያልገሩትን ፈረስ›› በሚል ርዕስ መጽሐፉን ያዘጋጁት ወ/ሮ ፋሲካ ሙሉ ሲሆኑ የካቲት 30 ቀን 2016 ዓ.ም. ታዋቂ ደራሲዎች፣ የሥነ ጽሑፍ ባለሙያዎችና ታዳሚዎች በተገኙበት በዓለም ሲኒማ ተመርቋል፡፡

‹‹ያልገሩትን ፈረስ›› መጽሐፍ ደራሲ የሆኑት ወ/ሮ ፋሲካ ሙሉ እንደገለጹት፣ መጽሐፉን ለመጻፍ ያነሳሳቸው ወንድማቸውን በአደጋው ማጣታቸው ነው፡፡ ‹‹የወንድሜን ስም ከመቃብር በላይ ለማኖር በማሰብ የጀመርኩት ጽሑፍና የሄድኩበት መንገድ የአደጋውን መንስዔ በይበልጥ እንድረዳው፣ በወቅቱ በአውሮፕላኑ ላይ የነበረው የኢንጂነሪንግ ስህተት ምን ነበር? በዚህ በትክክል ባልተሠራ አውሮፕላን ንፁኃን ዜጎችን ለምን አሳፍረው ተጓዙ? የሚሉ ነጥቦችና ጥያቄዎች ሐሳቤን በማስቀየር የጀመርኩትን ጽሑፍ ወደ መጽሐፍ ደረጃ እንዳሳድግ አድርጎኛል፤›› ብለዋል፡፡

በአደጋው የሞቱ ኢትዮጵያውያንን ለመዘከርና የሚገባቸውንም ክብር ለመስጠት ታቅዶ መጽሐፉ መዘጋጀቱንም ይጠቅሳሉ፡፡

እንደ ደራሲዋ ገለጻ፣ መጽሐፉ 14 የአደጋ ሰለባ ቤተሰቦችን ቃለ መጠይቅ በማድረግ፣ የኢትዮጵያ የአውሮፕላን አደጋ መርማሪ ሪፖርትና የአሜሪካ የንግድና የትራንስፖርት ሚኒስቴር ያወጣው 246 ገጽ ያለው የምርመራ ውጤትን መሠረት አድርጓል፡፡

ከዚህ ቀደም መጽሐፍ ጽፈው ለኅትመት ባያበቁም ውስጣቸው ያለን ሐሳብ የመጻፍ ልምድና መጽሐፍ የማንበብ ፍቅር ያላቸው መሆኑን የሚገልጹት ደራሲዋ፣ የኅትመት ብርሃን ያላያቸውና የመደርደሪያ ሲሳይ የሆኑ በርካታ ጽሑፎች እንዳሏቸው ይናገራሉ፡፡ በዚህ መጽሐፍ መነሻነትም በቀጣይ ተጽፈው ያልታተሙ ሥራዎቻቸውን ለሕዝብ የማቅረብ ዕቅድ አላቸው፡፡

መጽሐፉ 395 የገጽ ብዛት ያለው ሲሆን፣ ጽፎ ለማጠናቀቅም አራት ዓመታትን የፈጀ ነው፡፡ ‹‹የእመጓ›› መጽሐፍ ደራሲ ዓለማየሁ ዋሴ (ዶ/ር)፣ ገጣሚና ጸሐፌ ተውኔት አያልነህ ሙላት መጽሐፉ ከመታተሙ በፊት አይተው ሐሳብ ሰጥተውበታል፡፡ ‹‹ይህ መጽሐፍ መነበብ የሚችል ነው፣ ቤት መቅረት የለበትም፣ ታትሞ ለሕዝብ መቅረብ ይኖርበታል፤›› በማለት ብርታት ስለሰጡኝ ለኅትመት በቅቷል ይላሉ ደራሲዋ፡፡

እንደ ደራሲዋ በአገራችን መጽሐፍ የማንበብ ልማድ አልጎለበተም፡፡ ‹‹አንባቢ የለም›› እስከማለት የሚያስደፍር ነው፡፡ የሚጽፉ ሰዎች (ደራሲዎች) ጎልተው የማይወጡበት ምክንያት አንደኛው የአንባቢው ቁጥር አናሳ መሆን፣ ሁለተኛው ደግሞ የኅትመት ዋጋው እጅግ በመናሩ ነው፡፡ በእነዚህም ምክንያቶች ሊነበቡ የሚገባቸው የበሰሉ የሥነ ጽሑፍ ሥራዎች ሳይታተሙ በየቤቱ መደርደሪያ ላይ እንዲቀመጡ ሆነዋል፡፡

‹‹ያልገሩትን ፈረስ›› መጽሐፍ ለማሳተም የኅትመት ዋጋ መናር ተግዳሮት የሆነባቸው ቢሆንም ይህንን ተቋቁመው ለኅትመት ለማብቃታቸው እንደ ስኬትና ድል የሚቆጠር መሆኑን ይገልጻሉ፡፡

‹‹አንድ ሰው መጽሐፍ ለመጻፍ ሲያስብ በቅድሚያ የመጻፍ ፍቅሩ ውስጡ ሊኖር ይገባል፣ ያ መክሊት ውስጡ ካለ የሥራ መደራረብ፣ የቤተሰብ ኃላፊነትና ሌሎችም ምክንያቶች ሊያስቆሙት አይችሉም፡፡ የድርሰት መክሊቱ ያለው ሰው ካልጻፈ ውስጡ አያርፍም፡፡ ስለዚህ ተወደደም ተጠላም ትጽፋለህ፤›› የሚሉት ደራሲዋ፣ ትልቁ ጥያቄ የጻፍኩትን ነገር ወደ ሕዝብ አደርሰዋለሁ ወይ? ሕዝቡስ ሥራዎቼን ይቀበለዋል ወይ? የሚለው ስለሆነ፣ አንድ ደራሲ እነዚህን ፈተናዎች ተቋቁሞ መጽሐፍን ማሳተምና ለሕዝብ ማቅረብ ከቻለ ሌሎች ተጨማሪ ሥራዎችን ለማበርከት ተነሳሽነቱን የሚፈጥርለት ይሆናል ሲሉም ይገልጻሉ፡፡

ገጣሚ፣ ጸሐፌ ተውኔትና በአዲስ አበባ ዩኒቨርሲቲ መምህር የሆኑት አያልነህ ሙላት እንደገለጹት፣ ‹‹ያልገሩትን ፈረስ›› መጽሐፍ አሁን ባለንበት ዘመን ልዩ የአጻጻፍ ሥልት ይዞ የተነሳ፣ የደራሲዋ የመጀመሪያ ልጅ (ሥራ) ነው ተብሎ የማይገመት፣ በሥነ ጽሑፍ የበሰለ ሰው ሊያቀርበው የሚችል ድንቅ መጽሐፍ ነው፡፡

መጽሐፉ ከእውነተኛ ተጨባጭ ነገር ላይ ተነስቶ የወንድምን፣ የእናትንና የቤተሰብን ፍቅር አጉልቶ ከማሳየት ባሻገር፣ ‹‹ያልተገራ ፈረስ›› ማለት ያልተዘጋጀ ቴክኖሎጂ በሰው ልጆች ላይ ያስከተለውን ሞትና የፈጠረውን የልብ ስብራት ያሳያል፡፡ ‹‹ያልገሩትን ፈረስ›› በተራ ቋንቋ ሳይሆን ምናባዊና ሥነ ጽሑፋዊ በሆነ ቋንቋ የተጻፈ፣ ከባድ ፍልስፍናዎች በውስጡ የያዘና በአጻጻፍ ሥልቱ የረቀቀ ነው ሲሉም ያክላሉ፡፡

ምሁሩ እንደሚሉት መጽሐፉ በእውነተኛ ነገር ላይ ተመርኩዞ ልቦለዳዊ ፈጠራ የታከለበት ሲሆን እያለቀሱ የሚያነቡት፣ እያነቡ የሚያነቡት መጽሐፍ ነው፡፡

spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ

ሰላማዊ የፖለቲካ ትግልና ፈተናው

የኦሮሞ ነፃነት ግንባር (ኦነግ) የፖለቲካ ኦፊሰር የአቶ በቴ ኡርጌሳን...

አበጀህ ማንዴላ! አበጀሽ ደቡብ አፍሪካ!

በአየለ ት. የፍልስጤም ጉዳይ የዓለም አቀፍ ፖለቲካንም ሆነ የተባበሩት መንግሥታትን...

የውጭ ባለሀብቶች ለኢትዮጵያውያን ብቻ በተፈቀዱ የንግድ ዘርፎች እንዲገቡ የመወሰኑ ፋይዳና ሥጋቶች

ጠቅላይ ሚኒስትር ዓብይ አዓመድ (ዶ/ር) የውጭ ኩባንያዎች በጅምላና ችርቻሮ...