Saturday, April 20, 2024
- Advertisement -
- Advertisement -
ኪንና ባህልለጥበብ የተሰጡ ሠዓሊያት

ለጥበብ የተሰጡ ሠዓሊያት

ቀን:

ሴቶች ወደ ሥዕል ሙያ ለመምጣት ብዙ መንገድ ያልፋሉ፡፡ ሴት በቤት ውስጥ ካላት የበዛ ሃላፊነት በተጨማሪ፣ ራሷን የምታስተዳድርበት የመንግሥትም ይሁን የግል ሥራ ይኖራታል፡፡

ለጥበብ የተሰጡ ሠዓሊያት | Ethiopian Reporter | ሪፖርተር

በእነዚህ ጫና ውስጥ ሆና የሥዕል ሥራዎቿን እንዳታቋርጥና ከሌሎች አባላት ልምድ እንድትለዋወጥ በማኅበር መደራጀቱ ጠቃሚ ነው፡፡ ይህንን መሰረት አድርጎም፣ የኢትዮጵያ ሴት ሠዓሊያንና ቀራፂያን ማኅበር በአሥራ ሁለት አባላት የተመሠረተው በ1988 ዓ.ም. ነበር ፡፡

- Advertisement -

Video from Enat Bank Youtube Channel.

ሠዓሊና የማኅበሩ ፕሬዚዳንት ወ/ሮ ስናፍቅሽ ዘለቀ እንደሚናገሩት፣ ማኅበሩ ሠዓሊያትን ለማበረታታት፣ በኅብረት ዓውደ ርዕይ እንዲያዘጋጁና በሥራዎቻቸውም ተጠቃሚ እንዲሆኑ ለማስቻል የተቋቋመ ነው፡፡

በአሁኑ ወቅት ሠዓሊያቱ ዓውደ ርዕይ በኅብረት ከማዘጋጀት አልፈው በግል ኤግዚሽን የማድረግ ደረጃ ላይ መድረሳቸውንና ለዚህም የማኅበሩ ጥንካሬ አስተዋጽኦው የጎላ መሆኑን ፕሬዚዳንቷ ያክላሉ፡፡

እንደ ፕሬዚዳንቷ፣ ኅብረተሰቡ ለጥበብ ሥራ በተለይም ለሥዕል ያለው ግንዛቤ ከትናንት ዛሬ ይሻላል፡፡ በተለያዩ አጋጣሚዎች የሚዘጋጁ ዓውደ ርዕዮች የሰውን የቀደመ አተያይ ከመቀየር ባሻገር፣ የሥዕል ሥራዎችን እስከመግዛት ትልቅ ለውጥ እያመጣ ነው፡፡ ሆኖም ለውጦቹ ሙያውን የሙሉ ጊዜ ሥራ አድርጎ ለመያዝና ቤተሰብ ለማስተዳደር የሚያስችል ገቢ የሚፈጥር ነው ለማለት አያስደፍርም፡፡

በአዲስ አበባ፣ በክልሎች፣ በተለያዩ ዩኒቨርሲቲዎችና በውጭ አገሮች በተናጠልና በኅብረት በርካታ የሥዕል ዓውደ ርዕዮችን ማዘጋጀታቸውን የሚናገሩት ወ/ሮ ስናፍቅሽ፣ በአገሪቱ የሥዕል ሥራ ተቀባይነት እያገኘ መምጣቱንና ወደፊት ሙያው እያደገ ስለመሄዱ አመላካቶች መኖራቸውን ይገልጻሉ፡፡

ለጥበብ የተሰጡ ሠዓሊያት | Ethiopian Reporter | ሪፖርተር

እንደ ወ/ሮ ስናፍቅሽ፣ ማኅበሩ ከምሥረታው ጀምሮ የሥዕልን ጥበብ በማሳደግና ሴት ሠዓሊያን ጎልተው እንዲወጡ በማድረግ ረገድ ከፍ ያለ ሥራ በማከናወን ላይ የሚገኝ ቢሆንም፣ የቢሮና የመሥሪያ ቦታ ዕጦት የተፈለገውን ርቀት እንዳይራመድ አግዶታል፡፡

ስለሆነም የጥበብ ሥራ ያገባኛል፣ የሥዕል ሙያም ማደግ አለበት የሚል መንግሥታዊም ሆነ መንግሥታዊ ያልሆኑ አካላት የማኅበሩን ችግር መቅረፍ ይኖርባቸዋል፡፡

የማኅበሩ አባል የሆነችው ሠዓሊ ዜና ሞገስ እንደምትገልጸው፣ በማኅበሩ በመታቀፏና አባል በመሆኗ በርካታ ጥቅሞችን አግኝታለች፡፡ በተለያዩ ጊዜያት በኤግዚቢሽን ማዕከል፣ በብሔራዊ ሙዚየም፣ በሸራተንና በግዮን ሆቴሎች፣ በመስቀል አደባባይና በሌሎችም ሥፍራዎች ከሌሎች ሠዓሊያት ጋር በአንድነት በመሰባሰብ የሥዕል ሥራዎቿን ለሕዝብ የማቅረብ ዕድል አግኝታለች፡፡

‹‹የሥዕል ሙያ በኢትዮጵያ ከሥነ ጽሑፍም ሆነ ከሙዚቃ የቀደመ ታሪክ አለው፤›› የምትለው ሠዓሊዋ፣ ነገር ግን እንደ ቀደምትነቱና እንደ ዕድሜው ዘርፉ አላደገም፡፡ ዛሬም ድረስ ሥዕልን እንደ ሙያ፣ ጥበብና ለአገር እሴት እንደሚያበረክት የማይረዱና የሕፃናት መጫወቻ ብቻ እንደሆነ አድርገው የሚመለከቱ መኖራቸውን ትገልጻለች፡፡

የዘር፣ የቀለምና የቋንቋ ልዩነት በገነነበት፣ ኢትዮጵያዊነት በደበዘዘበት በዚህ ዘመን ሥዕል የሁሉም መግባቢያ በመሆን፣ ድንበር ተሻግሮ ሰውን በአንድ ሐሳብ የማስማማት፣ የማግባባትና የማቀራረብ አቅም አለው፡፡ አማርኛና እንግሊዝኛ ፊደሎችን በመመልከት ይህ አማርኛ ነው፣ ያኛው ደግሞ እንግሊዝኛ ነው እንደምንለው ሳይሆን፣ አማራውንም ሆነ ኦሮሞውንም፣ እንግሊዛዊውንም ሆነ ግሪካዊውን በአንድ የሚያግባባ ጥበብ ቢኖር ሥዕል ነው ትላለች፡፡  

እንደ ሠዓሊዋ ገለጻ፣ ይህንን የሥዕል ጥበብ በኢትዮጵያ ለማስፋትና ለማሳደግ ብርቱ ጥረትና ትኩረት ይፈልጋል፡፡ አብዛኛው ሠዓሊ ራሱ ጥሮና ግሮ የሥዕልን ሙያ ከፍ እያደረገ ይገኛል፡፡ መንግሥትም ይህንን ዘርፍ ለማሳደግ ለማኅበሩ ቢሮ በመስጠት መተባበር ይኖርበታል፡፡

ሌላዋ የማኅበሩ አባል ሠዓሊ ሠናይት በቀለ በበኩሏ፣ ኅብረተሰቡ ለሥዕል ያለው አረዳድና አመለካከት እየተለወጠ መጥቷል፡፡ ሥዕልን በዓውደ ርዕዮች እየተገኙ የመመመልከት ልምድም እየዳበረ ነው፡፡ ነገር ግን የሥዕል ሥራዎችን በመግዛት ረገድ የውጭ አገር ዜጎች ካልሆኑ በስተቀር፣ ኢትዮጵያውያን ብዙም አይደፍሩትም ትላለች፡፡

‹‹ሥዕል መሣል ከጀመርኩና ሙያ አድርጌ ከያዝኩት ሃያ ዓመታት ያህል ሆኖኛል፤›› የምትለው ሠናይት፣ ሞቅና ደመቅ ያሉ ቀለሞችን በመጠቀም አገርና ባህልን የሚወክሉ ሥዕሎችን በሸራ ትሠራለች፡፡ በጆንያ፣ በቅልና በመሳሰሉት ደግሞ ቅርፃ ቅርፆችን ትቀርፃለች፡፡

የሥዕል ሙያዋ የሙሉ ጊዜ ሥራዋ ሳይሆን፣ ጎን ለጎን የምትሠራው መሆኑን፣ በአሁኑ ወቅት የቀለም ዋጋ መወደዱና ለሥዕል ስራ የሚውሉ ግብዓቶች ከውጭ በዶላር መግባታቸው አቅማቸውን እየፈተነው እንደሚገኝ ትገልጻለች፡፡

ከሥዕል ሙያቸው እንዳይርቁ፣ በሥራቸው እንዲጠቀሙ፣ ገቢያቸው እንዲያድግና ጥበቡም በአገር ደረጃ እንዲስፋፋ መንግሥት ለሥዕል ሥራ የሚረዱ ግብዓቶችን ከቀረጥ ነፃ እንዲፈቀድላቸው ጥሪ አቅርባለች፡፡

‹‹አብዛኛዎቻችን ሠዓሊያት ሥራዎቻችንን የምንሠራበት ስቱዲዮ፣ የምናሳይበት ጋላሪ የለንም፡፡ እንደ ማኅበር ለመሰባሰብያ የሚሆነን ቢሮ በተደጋጋሚ ጠይቀን ምላሽ አጥተናል፡፡ የጥበብ ዘርፉን የሚመሩት የመንግሥት አካላት ችግራችንን በመመልከት አፋጣኝ መፍትሔ ሊሰጡን ይገባል፤›› ትላለች፡፡

የማኅበሩ አባል ሠዓሊ ሰሎሜ ስብሐቱ በበኩሏ፣ ከልጅነቷ ጀምሮ ካዳበረችው ሠዓሊና ዲዛይነር የመሆን ፍላጎት በመነሳት፣ አዲስ አበባ ዩኒቨርሲቲ አለ ፈለገ የሥነ ጥበብና ዲዛይን ትምህርት ቤት በመግባት ተሰጥዖዋን በትምህርት አዳብራለች፡፡

በሸራተን አዲስ፣ በአሊያንስ ኢትዮ ፍራሴስ፣ በሒልተን አዲስ አበባ፣ በአዲስ አበባ ሙዚየምና በሌሎችም ሥፍራዎች፣ የሥዕል ዓውደ ርዕዮችንና ጋላሪዎችን በማኅበርና በቡድን አቅርባለች፡፡

የኢትዮጵያ ሴት ሠዓሊያንና ቀራፂያን ማኅበር አባል መሆኗ ከሌሎች ሠዓሊያን ጋር በመሆን ሥራዎቿን ለሕዝብ ዕይታ ለማቅረብ ዕድል ፈጥሮላታል፡፡ እርስ በእርስ በመቀራረብ የሚገኙ ዕውቀቶችንም ለማዳበር አባልነቱ እንዳገዛት ትገልጻለች፡፡

በሥዕል ሥራዎቿ የተለየ ተብሎ የሚገለጽ የቀለም ምርጫ እንደሌላት፣ ሴቶችና ተፈጥሮ ላይ ያተኮሩ ሥራዎችን መሥራት እንደምትመርጥ የምትናገረው ሰሎሜ፣ በአገራችን የሥዕል ሙያ በሰዎች ዘንድ ያለው ዕይታ እየተሻሻለ ቢመጣም፣ ዘርፉ አላደገም ብላለች፡፡

የሥዕል ሥራ የኑሮዋ መተዳደሪያ እንዳልሆነ፣ ለነፍሷ ዕርካታ ስትል ጎን ለጎን  የምትሠራው መሆኑም ትገልጻለች፡፡        

spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ

ሰላማዊ የፖለቲካ ትግልና ፈተናው

የኦሮሞ ነፃነት ግንባር (ኦነግ) የፖለቲካ ኦፊሰር የአቶ በቴ ኡርጌሳን...

አበጀህ ማንዴላ! አበጀሽ ደቡብ አፍሪካ!

በአየለ ት. የፍልስጤም ጉዳይ የዓለም አቀፍ ፖለቲካንም ሆነ የተባበሩት መንግሥታትን...

የውጭ ባለሀብቶች ለኢትዮጵያውያን ብቻ በተፈቀዱ የንግድ ዘርፎች እንዲገቡ የመወሰኑ ፋይዳና ሥጋቶች

ጠቅላይ ሚኒስትር ዓብይ አዓመድ (ዶ/ር) የውጭ ኩባንያዎች በጅምላና ችርቻሮ...