Tuesday, April 23, 2024
- ማስታወቂያ -
- ማስታወቂያ -

በ55 ሚሊዮን ዶላር በ15,000 ካሬ ሜትር ቦታ ላይ የተገነባው የካርጎ ማዕከል አገልግሎት መስጠት ጀመረ

ተዛማጅ ፅሁፎች

የኢትዮጵያ አየር መንገድ ግሩፕ በ55 ሚሊዮን ዶላር በ1,5000 ካሬ ሜትር ቦታ ላይ ያስገነባውን ለኤሌክትሮኒክስ ግብይት (ኢ ኮሜርስ) አገልግሎት የሚውል የካርጎ ማዕከል አስመርቆ አገልግሎት መስጠት ጀመረ፡፡

የኢትዮጵያ አየር መንገድ ግሩፕ አዲሱ የኢኮሜርስ ማዕከል በሆነው የካርጎና የሎጂስቲክስ ቅጥር ግቢ ውስጥ የካቲት 21 ቀን 2016 ዓ.ም. የትራንስፖርትና ሎጂስቲክስ ሚኒስትር ዓለሙ ስሜ (ዶ/ር)፣ የኢኖቬሽንና ቴክኖሎጂ ሚኒስትር በለጠ ሞላ (ዶ/ር)፣ የገንዘብ ሚኒስትር ደኤታ ሰመሪታ ሰዋሰው፣ የአየር መንገዱ የቦርድ አባላት፣ የተለያዩ አገሮች አምባሳደሮች፣ የዲፕሎማቲክ ማኅበረሰብ አባላት፣ እንዲሁም የካርጎ ተጠቃሚ ዓለም አቀፍ አስመጪና ላኪዎች በተገኙበት ተመርቆ ሥራ መጀመሩ ይፋ ተደርጓል።

በምረቃው ሥነ ሥርዓት ላይ ዘመናዊ አሠራሮችን በመተግበር አየር መንገዱ በዓለም አቀፍ ተወዳዳሪነቱን ማስቀጠል ይገባዋል ያሉት፣ የኢትዮጵያ አየር መንገድ ግሩፕ ዋና ሥራ አስፈጻሚ አቶ መስፍን ጣሰው ናቸው፡፡ 

የካርጎ አገልግሎት እየሰፋ በመምጣቱ አየር መንገዱ በርካታ ተግባራትን እያከናወነ በመሆኑ፣ እንዲሁም በዓለም ላይ የዲጂታል ግብይት እያደገ በመምጣቱ የመደበኛ ካርጎ አገልግሎት መቀነሱን ዋና ሥራ አስፈጻሚው ገልጸዋል።

አየር መንገዱ ዘመናዊ የካርጎ አገልግሎት ለመስጠት በ15 ሺሕ ካሬ ሜትር ላይ ሦስተኛውንና ለኢኮሜርስ (በኦንላይን የሚገዙ ዕቃዎች) የሚውል ዘመናዊ የካርጎ ማዕከል ማስገንባቱን ዋና ሥራ አስፈጻሚው አስረድተዋል።

ከተለያዩ የዓለም አገሮች ጋር የገበያ ትስስር ለማጠናከርና በኤሌክትሮኒክ ግብይት ሥርዓት የሚገዙ ዕቃዎችን ወደ ተለያዩ የዓለም አገሮች በአዲስ አበባ በኩል ለማጓጓዝ የሚያስችል አገልግሎት ነው ብለዋል፡፡ 

የኢትዮጵያ አየር መንገድ ከአጠቃላይ ገቢው ከ30 እስከ 35 በመቶ የሚሰበሰበው ከካርጎ አገልግሎት ነው ሲሉ አቶ መስፍን ተናግረዋል፡፡

የኢትዮጵያ አየር መንገድ ባለፈው በጀት ዓመት ካስገባው አጠቃላይ 6.1 ቢሊዮን ዶላር ገቢ፣ ሁለት ቢሊዮን ዶላር ያህሉ በካርጎና ሎጂስቲክስ አገልግሎት ያገኘው መሆኑን የድርጅቱ መረጃዎች ያሳያሉ። 

ከኮቪድ-19 ወረርሽኝ ወዲህ የኢትዮጵያ አየር መንገድ የካርጎ ንግድ ከፍተኛ ዕድገት ማሳየቱ መገለጹ ይታወሳል። 

በኢትዮጵያና በሌሎች የአፍሪካ አገሮች ቁጥራቸው ቀላል የማይባሉ ሰዎች ከአሜሪካ፣ ከአውሮፓ፣ ከቻይናና ከሌሎችም ቦታዎች ዕቃዎችን መግዛት እንደሚፈልጉ፣ ነገር ግን እነዚህን ምርቶች ወደ አፍሪካ ለማጓጓዝ የሚያስችል ዘመናዊ አሠራር ባለመኖሩ አዲሱ ኢኮሜርስ የካርጎ ማዕከል ይህንን ችግር ይፈታል ተብሏል።

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች