Monday, April 15, 2024
- Advertisement -
- Advertisement -
ማኅበራዊድጋፍ የሚሻው የታዳጊዎች የተሃድሶ ተቋም

ድጋፍ የሚሻው የታዳጊዎች የተሃድሶ ተቋም

ቀን:

በአዲስ አበባ ከተማ አስተዳደር ሴቶች፣ ሕፃናትና ማኅበራዊ ጉዳይ ቢሮ በወንጀል ነክ ነገር ውስጥ ገብተው የተገኙ ሕፃናት ማቆያና ተሃድሶ ተቋም፣ በተለያዩ ክልሎች የሚገኙ ሕፃን ጥፋተኞች የሚታረሙበት ብቸኛ ማዕከል ነው፡፡

የተቋሙ ሥራ አስኪያጅ አቶ እንግዳ መንግሥቱ ለሪፖርተር እንደገለጹት፣  ተቋሙ ሕፃናት ጥፋተኞች ከአዋቂዎች ጋር ተቀላቅለው መታሰር የለባቸውም በሚል፣ የንጉሠ ነገሥት ኃይለ ሥላሴ የሕግ አማካሪ በነበረው እንግሊዛዊው ጀምስ መንድ ሐሳብ አመንጪነት በ1936 ዓ.ም. የተመሠረተ ነው፡፡

እስከ 1994 ዓ.ም. ‹‹የወጣት ጥፋተኛ ማዕከል›› በሚል መጠሪያ ይታወቅ የነበረው ተቋሙ፣ ከሁሉም የአገሪቱ ክልሎች የሚገኙና በተለያዩ የወንጀል ድርጊቶች ውስጥ ተሳትፈው የተገኙ ሕፃናት በፍርድ ቤት ትዕዛዝ መሠረት የሚታረሙበትና የሚቆዩበት ነው፡፡

- Advertisement -

Video from Enat Bank Youtube Channel.

እንደ ሥራ አስኪያጁ ገለጻ፣ ተቋሙ ከዘጠኝ እስከ አሥራ አምስት ዓመት ዕድሜ ያላቸው ታራሚ ሕፃናት የሚቆዩበት ሲሆን፣ በአሁኑ ወቅት 67 ታራሚዎችን ይዟል፡፡ ከእነዚህ ውስጥ 62ቱ ወንዶች፣ 5ቱ ደግሞ ሴቶች ናቸው፡፡ እነዚህ ሕፃናት በማዕከሉ ቆይታቸው ከጥፋታቸው ታርመውና መልካም ዜጋ ሆነው ከማኅበረሰቡ ጋር እንዲቀላቀሉ የተለያዩ ተግባራት ይከናወናሉ፡፡

የሥነ ልቦናና የምክር ድጋፍ፣ የትምህርት፣ የጤና፣ የምግብ፣ የመጠለያ፣ የአልባሳትና ከዕርምት በኋላ ከቤተሰብ የማቀላቀል ሥራ ለታራሚ ሕፃናቱ ከሚሰጡ አገልግሎቶች መካከል የሚጠቀሱ ናቸው፡፡

በማዕከሉ ሕፃናቱ በሥነ ልቦና ለአማካሪዎችና በማኅበራዊ አገልግሎት  ባለሙያዎች የሥነ ልቦና ድጋፍ እንዲያገኙ እየተደረገ ይገኛል፡፡     ይህም በፈጸሙት የጥፋት ድርጊት እጅግ የበዛ የጥፋተኝነት ስሜት እንዳይሰማቸው፣ በማኅበረሰቡ ውስጥ የማይፈለጉ እንዳይመስላቸውና ለአገር የተሻለ ሥራ ማበርከት የሚችሉ ታዳጊዎች መሆናቸውን እንዲረዱ የሚያደርግ ነው፡፡   

ከአንደኛ እስከ ስምንተኛ ክፍል በአማርኛና በአፋን ኦሮሞ ቋንቋዎች የቀለም ትምህርት በተቋሙ እየተሰጠ እንደሚገኝ የጠቆሙት አቶ እንግዳ፣ የተለያዩ የሙያ ሥልጠናዎችንም ለመስጠት በዝግጅት ላይ መሆናቸውን ይናገራሉ፡፡  

ታራሚዎቹ በፍርድ ቤት የተሰጣቸውን ቅጣትና ፍርድ ሲያጠናቅቁ ከቤተሰብ ጋር ማቀላቀሉን ተቋሙ የሚሠራ ሲሆን፣ ቤተሰብ የሌላቸውን ደግሞ በሕፃናት ላይ ለሚሠራ ‹‹ደምበስኮ›› ከተባለ ድርጅት ጋር በማገናኘት፣ ሕፃናቱ በተለያዩ ሙያዎች ሠልጥነው ራሳቸውን እንዲችሉ እየተደረገ ይገኛል፡፡

በተሃድሶ ተቋሙ በማኅበራዊና ሥነ ልቦና ክፍል የሶሻል ወርከር ባለሙያ አቶ ዮሐንስ ታዬ በበኩላቸው፣ በወንጀል ድርጊት ውስጥ ተሳትፈው የተገኙና በማዕከሉ የተጠለሉ ሕፃናት፣ ከመደበኛ ትምህርት ባሻገር በሥነ ልቦና የማነፅ ሥራ ትኩረት የተሰጠው ተግባር መሆኑን ነግረውኛል፡፡

እንደ ልጆቹ የጥፋት ሁኔታ እየታየ፣ ታራሚ ልጆችን ለማነፅና ለአገርና ለወገን የሚጠቅሙ ዜጎች እንዲሆኑ ለማስቻል ከፍ ያለ ሥራ እየተሠራ ይገኛልም ብለዋል፡፡

እንደ አቶ ዮሐንስ፣ ቅጣታቸውን ጨርሰው ከቤተሰብና ከማኅበረሰቡ ጋር በሚቀላቀሉበት ጊዜ ችግር እንዳይገጥማቸው ከወላጆቻቸው ጋር ምክክር ይደረጋል፡፡ እነሱ በፈጸሙት ወንጀልና ጥፋት ምክንያት የተጎዳ ቤተሰብ ካለ ዕርቅ እንዲወርድና የሕፃናቱ ቀጣይ ሕይወት ሰላማዊና የተረጋጋ እንዲሆን ተቋሙ ኃላፊነት ተረክቦ ይሠራል፡፡  

በተሃድሶ ተቋሙ የትምህርት ክትትል ባለሙያ አቶ ከበደ ከነቶ እንደሚሉትም፣ ተቋሙ ለታራሚ ሕፃናቱ ከአንደኛ እስከ ስምንተኛ ክፍል ትምህርት እየሰጠ ይገኛል፡፡

ከመማር ማስተማር ሒደት ጎን ለጎን ታዳጊ ሕፃናቱ በግብረ ገብ፣ በሚኒ ሚዲያ፣ በኤችአይቪ ኤድስና በሌሎችም ክበባት በመታቀፍ ልምዳቸውን እንዲያዳብሩ ይደረጋል፡፡

በተሃድሶ ተቋሙ ትምህርታቸውን በመከታተል ላይ የሚገኙ ሕፃናት ከወላጆቻቸው ጋር ተቀምጠው እንደሚማሩ ሕፃናት ባለመሆናቸው የተለየ ድጋፍ ቢያስፈልጋቸውም ይህንን ለማሟላት እክሎች አሉ፡፡

ከእነዚህም ትምህርት ቤቱ በመንግሥት አካላት ትኩረት ባለማግኘቱ የሚደረግለት ድጋፍና ዕገዛ አነስተኛ መሆኑ ይገኝበታል፡፡

ትምህርት ቤቱ እንደ ሌሎች መደበኛ ትምህርት ቤቶች እንደማይታይ፣ መምህራኑም በውጪ እንዳሉትና በሌሎች ትምህርት ቤቶች እንደሚያስተምሩ መምህራን ጥቅማ ጥቅም እንደማያገኙ የሚገልጹት ባለሙያው፣ ትምህርት ቤቱ ከሕንፃ በስተቀር ወንበር፣ ጠረጴዛ፣ ብላክ ቦርድና የመሳሰሉ ለመማር ማስተማር የሚያገለግሉ ግብዓቶች እንዳልተሟላለት ጠቁመዋል፡፡

በተቋሙ የሚማሩ ሕፃናት የቦርሳ፣ የዩኒፎርምና የተለያዩ ለትምህርት ግብዓት የሚያስፈልጉ ቁሳቁሶች እጥረት ቢገጥማቸውም፣ ትምህርት ቤቱ በእነዚህ ተግዳሮቶች ውስጥ ሆኖ በልደታ ክፍለ ከተማ ብቻ ሳይሆን በአዲስ አበባ ከተማም የስድስተኛና የስምንተኛ ክፍል ሚኒስትሪ ተፈታኝ ተማሪዎችን መቶ በመቶ በማሳለፍ ውጤታማ መሆኑን ይናገራሉ፡፡

ታራሚ ሕፃናቱ ከመደበኛ ትምህርት ባሻገር የእጅ ሙያ እንዲያዳብሩ፣ ቀደም ሲል እንደ ሲንጀር፣ የቆዳ ውጤቶች፣ የእንጨት ሥራ፣ የብረታ ብረት፣ የሽመና፣ የሥጋጃ ምንጣፍና የመሳሰሉ ሥልጠናዎች በተቋሙ ይሰጥ የነበረ ቢሆንም፣ ከ2006 ዓ.ም. ጀምሮ ሙሉ በሙሉ በሚባል ደረጃ እነዚህ የሥልጠና መስኮች ቆመዋል፡፡ ይህም ሕፃናቱ ከማዕከሉ በሚወጡበት ጊዜ በተለያዩ ሙያዎች ተሰማርተው ራሳቸውን እንዳይደግፉ አሉታዊ ተፅዕኖ የሚፈጥር ነው፡፡

በተሃድሶ ተቋሙ የነርስ ባለሙያ የሆኑት ሲስተር ማሚት ገብረ ማርያም እንደተናገሩት፣ ተቋሙ ሕፃናት ታራሚዎች ለሚያጋጥሟቸው የጤና እክል የመጀመሪያ ደረጃ ሕክምና ይሰጣል፡፡

ከተቋሙ አቅም በላይ የሆነ የጤና ችግር ካለ ወደ ልደታ ጤና ጣቢያ ሄደው እንደሚታዩ፣ ከዚያም ያለፈ ሕመም ካጋጠመና ከፍተኛ ሕክምና የሚያስፈልጋቸው ካሉም እስከ ሆስፒታል የዘለቀ አገልግሎት እንዲያገኙ እንደሚደረግም ገልጸዋል፡፡

እንደ ሲስተር ማሚት፣ በተሃድሶ ማዕከሉ የሚገኙ ሕፃናት ጤናቸው የተጠበቀ እንዲሆን የምግብ፣ የውኃ፣ የመኝታ፣ የአልባሳት፣ የሽንት ቤትና የሌሎችም አገልግሎቶች የተሟሉና ንፅህናቸው የተጠበቀ ስለመሆኑ በየዕለቱ ክትትል ይደረጋል፡፡፡

በታራሚ ሕፃናት ላይ በአብዛኛው የሚታየው የጤና ችግር የሳንባ ምች/ኒሞኒያ/ እና በቆዳ ላይ የሚወጣ እከክ እንደሆነ የሚገልጹት ሲስተር ማሚት፣ ይህም ችግር በቀላሉ በሕክምና እየተቀረፈ ይገኛል ብለዋል፡፡

በተሃድሶ ተቋሙ ለሚገኙ ታራሚ ሕፃናት ከኤችአይቪ ኤድስ የምክርና የምርመራ አገልግሎት ባሻገር፣ በሌሎችም ተላላፊና ተላላፊ ያልሆኑ በሽታዎች መንስዔና የመከላከያ መንገዶች ዙሪያ የግንዛቤ ማስጨበጫ ትምህርት ይሰጣል፡፡

ተቋሙ የራሱ መመርመሪያ ላቦራቶሪ፣ ሐኪምና ሌሎችም ለሕክምና የሚያገለግሉ ቁሳቁሶች ቢሟሉለት፣ በተቋሙ የሕክምና አገልግሎቱን በተቋሙ ለመስጠት እንደሚያስችል የሚገልጹት ባለሙያዋ፣ የአዲስ አበባ ጤና ቢሮም ሆነ ጉዳዩ የሚመለከታቸው አካላት በተቋሙ የሕክምና አገልግሎት አሰጣጥ ዙሪያ ትኩረት ሰጥተው እንዲሠሩ አሳስበዋል፡፡    

spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ

ቪር ጀነራል ትሬዲንግ ኃ/የተ/የግ/ማኀበር የጨረታ ማስታወቂያ

ቪር ጀነራል ትሬዲንግ ኃ/የተ/የግ/ማኀበር በገቢ እና በውጭ ንግድ እንዲሁም...

ያልተቃናው የልጆች የንባብ ክህሎት

አንብቦና አዳምጦ መረዳት፣ የተረዱትን ከሕይወት ጋር አዋህዶ የተቃና ሕይወት...

እንስተካከል!

ሰላም! ሰላም! ውድ ኢትዮጵያውያን ወገኖቼ እንዲሁም የሰው ዘር በሙሉ፣...

የሙዚቃ ምልክቱ ሙሉቀን መለሰ ስንብት

የኢትዮጵያ ዘመናዊ ሙዚቃ በ1950ዎቹ እና በ1960ዎቹ በኪነ ጥበባትም ሆነ...