Tuesday, April 23, 2024
- Advertisement -
- Advertisement -

- Advertisement -

ፌርማታ ፅሁፎች

የካቲት ፲፪

ትኩስ ፅሁፎች

አገር ተቃጠለ
እሳተ ጎመራ ወረደ ከሰለ።
ጭስ አመድ አዋራ ሰማዩን ሸፈነው
ጥቁር ሰማይ ጥቁር!
የቀን ጨለማ ሞት በእናት አገር ሰማይ
በጀግናው ሕዝብ ላይ የጠላት ግፍ ቀንበር።
ፋሺስት አስተጋባ ፋስ ተሰነዘረ
ባካፋ መዶሻ ሕዝብ ተወገረ።
የሰው ጭንቅላት ኳስ፤ …
አባቶች ታረዱ
እናቶች ታረዱ
ቤት ንብረት ፈረሰ ከብቶች ተነዱ።
ዓለም መና ቀረ …
ውብ ለምለሙን መሬት ደም አጥለቀለቀው
ቅጠሉ ረገፈ ደረቀ ቡቃያው
ረሃብ እሳት ግለት
አሸዋ አዋራ አፈር፤
ቸነፈር ቸነፈር
መታሰር መጉላላት
ንፁህ ቅድስት ሃገር!
ንጽህት እናት ሽቱ።
ሰው የሬሳ ክምር!
አስክሬን ባስክሬን ጥንብ የሞት ቁሻሻ
ጥንብ የሞት ጭቅቅት …
የጭካኔ አዝመራ የጦርነት ፍሬ
ጥንብ የጠላት ሽታ!
ቅድስት ንጽህት ሃገር።
ኦ ሰንደቅ ዓላማ
ኦ አንተ ነፃነት!
አንተ መተባበር ኦ፤ አንተ ሆይ እምነት!
በዚች መሬት አድጎ
በዚች መሬት ሞቶ፤
ግፍን ተቋቁሞ ጠላትን መክቶ
ላላማው ለእምነቱ ራሱን ሰዉቶ፤
ሰው ያድጋል ሰው ትልቅ
ሰው ይሆናል ታሪክ።
ሌት ይነጋል ሊመሽ …
ዘመን ሲፈራረቅ ትውልድ ይለወጣል
ይህ መሬት ቅዱስ ነው፤
ይህ መሬት አድባር ነው፤
ያባቶች ውቃቤ አለ ያንዣብባል።
ጀግናው ልጅ ለጠላት ፊቱን አይመልስም፤
ሞት ይቀዘቅዛል ደም ሲረጋ ፈሶ
ግን ምንድነው ሕይወት!
ነፃነት ለቆመ ጉልበት ተጨርሶ።
ዘመን ያልፋል ዘመን …
ኅሊና ይወቅሳል እምነት ሲያወላውል
ኃላፊነት ከባድ …

ያገር ንፁህ ውኃ መች ይደፈርሳል
ጠላት በወንዛችን እንዴት ይታጠባል!
ድል የድል ድል ድል ነው!
ተነሱ ዘምሩ!
እናንት የተኛችሁ መች ሞታችሁና
ይናገራል ቆሞ ሥራችሁ ያውና።
ተነሱ ዘምሩ!
እዩት ልጆቻችሁ በሰማይ ሲበሩ፤
እዩት የፈረሰው ተክቦ ተሠርቶ፤
እዩት ዕውቀት በርቶ፤
እዩት አገራችሁ የሺ ዓመት ጎዳና
እዩት ሄዳ ዘልቃ፤
እዩት ብልፅግና።
እዩት አገራችሁ ኮከብ ስታበራ
የባህር አበባ ያፍሪቃ ላይ ጮራ።
ብርቅ ሉል ወርቅ አልማዝ።
እናት ሃገር ገነት …

እንግዲህ ምሽግ ነው ተራራው አገሬ
ወዮ ጠላት ነገ!
ወዮ ጠላት ዛሬ!
የጀግናው ልጅ አጥንት የተከሰከሰው
ምሽግ ነው ምሽግ ነው
አጋሙ ተዋጋ ቆንጥሩ ቧጠጠ
የተሰነጠቀ መሬት ጠላት ዋጠ።
ዝናሙ ዘነመ፤ የደሙን ጭቅቅት
ጎርፍ አጠበው ነጣ ሄደ ውኃ ይዞት።
ቡቃያው አሸተ፤
ቦምብ የገነጠለው ዛፉ አኮተኮተ።
ፀሐይ በራ ወጣ!
አንድ አካል፤ አንድ ሕዝብ።
ኦ ሰንደቅ ዓላማ!
ኦ ኃያል ነፃነት! 

– ገብረ ክርስቶስ ደስታ ‹‹መንገድ ስጡኝ ሰፊ››

- Advertisement -
- Advertisement -

ተጨማሪ ለማንበብ

በብዛት የተነበቡ ፅሁፎች