Monday, May 20, 2024
- Advertisement -
- Advertisement -

ዜናእስከ መጋቢት ወር ግማሽ ቢሊዮን ዶላር ካልተገኘ የምግብ እጥረቱ ሊባባስ እንደሚችል ተገለጸ

እስከ መጋቢት ወር ግማሽ ቢሊዮን ዶላር ካልተገኘ የምግብ እጥረቱ ሊባባስ እንደሚችል ተገለጸ

ቀን:

እስከ መጋቢት ወር 2016 ዓ.ም. ድረስ ግማሽ ቢሊዮን ዶላር ካልተገኘ በኢትዮጵያ ድርቅና የምግብ እጥረት እንደሚባባስ፣ የተባበሩት መንግሥታት ድርጅት (ተመድ) የሰብዓዊ ጉዳዮች ማስተባበሪያ ጽሕፈት ቤት ባወጣው ሪፖርት አስታወቀ፡፡

የተጠቀሰው መጠን ገንዘብ የማይገኝ ከሆነ በአሁኑ ጊዜ የምግብ እጥረት ያጋጠማቸው ዜጎች ሁኔታ፣ እጅግ አስከፊ የሚባል ደረጃ ሊደርስ እንደሚችል ጽሕፈት ቤቱ ገልጿል፡፡

እስከ መጋቢት ወር ድረስ የሚመጡ የገንዘብ ድጋፎች የምግብ ዕርዳታ አቅርቦቶች ጊዜያቸውን ጠብቀው እንዲገዙ የሚያስችሉ መሆናቸውን፣ በዚህም መንግሥትና ዓለም አቀፍ አጋሮች እንደ አዲስ የሚከሰቱ የሰብዓዊ ዕርዳታ ፍላጎቶችን የማስታገስ አቅም ሊያገኙበት እንደሚችሉ በሪፖርቱ ተካቷል፡፡

- Advertisement -

የምግብ ድጋፍ አቅራቢ አጋሮች የዕርዳታ አቅርቦቶችን ለመግዛት ግማሽ ቢሊዮን ዶላር የምግብ ዕርዳታው ለሚያስፈልጋቸው 6.6 ሚሊዮን ሰዎች ለማጓጓዝ ደግሞ 80 ሺሕ ዶላር በፍጥነት እንደሚያስፈልግ የማስተባበሪያ ጽሕፈት ቤቱ ዘርዘር ያለ የግምገማ ሪፖርት ይገልጻል፡፡

‹‹የገንዘብ ድጋፉ ሲዘገይ የምግብ አቅርቦት ሰንሰለቱ ይበጠሳል፡፡ በመጋቢት ወር የምግብ ዕርዳታ እንደሚሰጣቸው በዕቅድ የተያዙ ሰዎች ይጎዳሉ፡፡ እንዲሁም አሁን ያሉበትን አስከፊ ሁኔታ ወደ ባሰ ደረጃ ይወስደዋል፤›› ሲል ሪፖርቱ ያሳስባል፡፡

በዋነኛነት በሰሜኑ የአገሪቱ ክፍል ያሉትን አካባቢዎች (ትግራይ፣ አማራና አፋር) ጨምሮ በተለያዩ ክልሎች በድርቅ በርካታ ሚሊዮን ሰዎች እንደተጎዱ የሚታወቅ ሲሆን፣ የምግብ እጥረትም ተባብሶ ቀጥሎ በመቶዎች የሚቆጠሩ ሰዎች እንደሞቱ የተለያዩ ሪፖርቶች እየወጡ መሆናቸው የሚታወስ ነው፡፡

እ.ኤ.አ. በ2024 የመጀመሪያዎቹ ሦስት ወራት 6.6 ሚሊዮን ሰዎች ምግብ ያላገኙና ድጋፍ የሚያስፈጋቸው እንደሆነ የማስተባበሪያ ጽሕፈት ቤቱ ሪፖርት ገልጿል፡፡ በቀጣይም 10.8 ሚሊዮን ሰዎች በሁሉም የአገሪቱ ክፍሎች (በሰሜን አካባቢዎች የበለጠ) የሚገኙ ዜጎች ቅድሚያ ተሰጥቷቸው የምግብ ዕርዳታ እንደሚሰጣቸው ዕቅድ እንዳለ በሪፖርቱ ሰፍሯል፡፡

ተመድ የሚያስተባብራቸው በኢትዮጵያ የሚደረጉ ሰብዓዊ ድጋፎች በእጅጉ የገንዘብ እጥረት እያጋጠማቸው እንደሆነ፣ በየጊዜው የሚወጡት መግለጫዎች ማሳወቃቸው አይዘነጋም፡፡

እ.ኤ.አ. በ2023 ተመድ በኢትዮጵያ ለሚያካሂደው ሰብዓዊ ድጋፍ አራት ቢሊዮን ዶላር እንደሚያስፈልገው አቅዶ ሲያፈላልግ የነበረ ቢሆንም፣ ሊያገኝ የቻለው ግን 1.4 ቢሊዮን ዶላር (34 በመቶ) ብቻ እንደነበር መገለጹ ይታወሳል፡፡

እ.ኤ.አ. በ2024 ደግሞ ፍላጎቱን ዝቅ በማድረግ 2.9 ቢሊዮን ዶላር በኢትዮጵያ ለሚያደርገው ሰብዓዊ ድጋፍ ያስፈልገኛል ብሏል፡፡ ከ20 ሚሊዮን በላይ ሰዎች ሰብዓዊ ድጋፍ የሚያስፈልጋቸው ቢሆንም፣ ተመድ ገንዘቡን ቢያገኝ 14 ሚሊዮን ሰዎችን ለመደገፍ ዕቅድ መያዙ ታውቋል፡፡

spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ

በሥጋ ላይ አላግባብ እየተጨመረ ያለውን ዋጋ መንግሥት ሊቆጣጠረው ይገባል

በአገራችን የግብይት ሥርዓት ውስጥ ኢኮኖሚያዊ ያልሆኑ ወይም ያልተገቡ የዋጋ...

ኢትዮጵያን የተባበረ ክንድ እንጂ የተናጠል ጥረት አይታደጋትም!

ኢትዮጵያ በአሁኑ ጊዜ ከምትገኝበት ውጥንቅጥ ውስጥ የምትወጣበት ዕድል ማግኘት...

የፖለቲካ ቅኝቱ የሕዝባችንን ታሪካዊ ትስስር ለምን አያከብርም?

በንጉሥ ወዳጅነው የዓብይ አህመድ (ዶ/ር) መራሹ የ2010 ዓ.ም. የለውጥ መንግሥት...

ዛሬም ኧረ በሕግ!

በገነት ዓለሙ በዚህ በያዝነው ሚያዝያ/ግንቦት ወይም ሜይ ወር ውስጥ የተከበረው፣...