Tuesday, April 23, 2024
- ማስታወቂያ -
- ማስታወቂያ -

የንግድ ሥራ መሪዎችና ሥራ ፈጣሪዎች የልምድ ልውውጥ የሚያደርጉበት መድረክ ሊካሄድ መሆኑ ተሰማ

ተዛማጅ ፅሁፎች

የንግድ ሥራ መሪዎች ልምድና ተሞክሮ የሚዳሰስበትና አዳዲስም ሆኑ በሥራ ላይ ያሉ ሥራ ፈጣሪዎች የልምድ ልውውጥ የሚያደርጉበት መድረክ ሊካሄድ መሆኑን፣ የአዲስ አበባ ንግድና ዘርፍ ማኅበራት ምክር ቤት አስታወቀ፡፡

ንግድ ምክር ቤቱ ከኤስኤኬ የሥልጠናና የማማከር ተቋም ጋር በጋራ በመተባበር የሥራ መሪዎች መድረክ (Forum For Executives) የተሰኘ አዲስ የመማሪያ፣ የልምድ ልውውጥና የግንኙነት መረብ (Networking) ማዳበር ላይ መሠረት ያደረገ አገልግሎት ለመጀመር ቅድመ ዝግጅት ማጠናቀቁን፣ ሰኞ የካቲት 11 ቀን 2016 ዓ.ም. በሰጠው ጋዜጣዊ መግለጫ አስታውቋል፡፡

ትልልቅ የአገሪቱ የሥራ መሪዎች ባለፉባቸው የአመራር ዘመናት፣ የተለያዩ ባለድርሻ አካላት ሲገጥሟቸው የነበሩ የኢኮኖሚና የቢዝነስ ተግዳሮቶችን እንዴት እንደተወጡት ለሥራ መሪዎች አቅጣጫ የሚያስቀምጡበት መድረክ መሆኑን፣ የምክር ቤቱ ምክትል ዋና ጸሐፊ አቶ ዘካርያስ አሰፋ ተናግረዋል፡፡

የካቲት 21 ቀን 2016 ዓ.ም. በርካታ የሥራ መሪዎችና ሌሎች ባለድርሻ አካላት በተገኙበት የውይይት መድረኩ የሚጀመር መሆኑን የተናገሩት ዋና ጸሐፊው፣ የውይይት መድረኩም በየወሩ ከ11፡00 ሰዓት በኋላ ለሁለት ሰዓታት ያህል እንደሚካሄድ አክለው ገልጸዋል፡፡

በመድረኩ የመጀመሪያውን ዙር ልምድ የሚያካፍሉት የቀድሞ የሚድሮክ ቴክኖሎጂ ግሩፕ ዋና ሥራ አስፈጻሚና በአሁኑ ወቅት የዩኒቲ ዩኒቨርሲቲ ፕሬዚዳንት አረጋ ይርዳው (ዶ/ር) መሆናቸውን ጠቁመዋል፡፡

በዚህም መሠረት በአንድ ጊዜ ከሰማንያ በላይ የቢዝነስ ሥራ መሪዎች የሚታደሙበት ይህ የልምድ ልውውጥ መድረክ፣ ማኅበረሰቡ የራሴ የሚለውን ቢዝነስ ተነቃቅቶ እንዲጀምርና አዳዲስ የሥራ ዕድሎች እንዲከፈቱ መንገድ ይከፍታል ብለዋል፡፡

በሌላ በኩል የንግዱ ኅብረተሰብ በዕውቀት ላይ የተደገፈ የንግድ ሥራ ውሳኔ ላይ እንዲደርስ በማስቻል፣ ወጣትና አዳዲስ የንግድ ሥራ መሪዎች የላቀ ተሞክሮ ካላቸው መሪዎች የአመራር ጥበብና ዘዴዎችን በመቅሰም ተወዳዳሪ እንዲሆኑ የሚያስችላቸው መሆኑን ገልጸዋል፡፡

የንግድ ተቋማት መድረኩ አቅም ግንባታን ለማዳበር ያለውን ፋይዳ በማወቅ፣ በአሁኑ ወቅት ሥራ አመራር ኃላፊነት ላይ ያሉ መሪዎችን ወይም ወደፊት መሪ ለመሆን የታጩትን ወጣቶች ወደ መድረኩ በመላክ ብቃታቸውን እንዲገነቡ፣ የተፈጠረውን ዕድል እንደ መልካም አጋጣሚ መጠቀም እንደሚኖርባቸው ተናግረዋል፡፡  

የኤስኤኬ የሥልጠናና የማማከር ተቋም ዋና ሥራ አስፈጻሚ አደራ አብደላ (ዶ/ር) እንደተናገሩት፣ በኢትዮጵያ መልካም ተሞክሮ ያላቸው የቢዝነስ መሪዎች ተሞክሮዎቻቸውን ለሥራ ፈጣሪዎች እንዲያካፍሉ መድረኩ ትልቅ አስተዋጽኦ ይኖረዋል፡፡

በመድረኩ የሚሳተፉ ሥራ ፈጣሪዎች በ3,500 ብር ክፍያ የሚሳተፉ መሆኑን ገልጸው፣ ክፍያውንም አንድ ጊዜ ከፈጸሙ በኋላ በተከታታይ በየወሩ በሚደረጉ የውይይት መድረኮች ላይ መሳተፍ እንደሚችሉ አስረድተዋል፡፡

በቅርቡ በሚካሄደው መድረክ ማንኛውም የዓላማው ደጋፊ የሥራ መሪዎችና የንግድ አከናዋኞች፣ እንዲሁም የሥራ ፈጣሪዎች ተሳታፊ መሆን እንደሚችሉ ዋና ሥራ አስፈጻሚው ተናግረዋል፡፡  

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች