Monday, April 15, 2024
- Advertisement -
- Advertisement -
ማኅበራዊከሐሳብ እስከ ትግበራ የዘለቀው ፈጠራ

ከሐሳብ እስከ ትግበራ የዘለቀው ፈጠራ

ቀን:

አበባው ደመቀና ጓደኛው አማረ አዲስ የዓውድ ቴክኖሎጂ መሥራች ናቸው፡፡ ከሁለት ዓመታት በፊት ለተመሠረተው ድርጅታቸው ደግሞ በደብረ ማርቆስ ዩኒቨርሲቲ በሜካኒካል ኢንጂነሪንግ ክፍል የሦስተኛ ዓመት ተማሪ ሳሉ ያቀረቡት ፕሮጀክት መሠረት ሆኗቸዋል፡፡

በ2013 ዓ.ም. ከዩኒቨርሲቲው የተመረቁት አበባውና ደመቀ የገበሬውን ድካም ያቃልላል፣ የምርት ብክነትን ይቀንሳል፣ የአዝመራ መሰብሰብ ጊዜን ያሳጥራል ያሉትን ፕሮጀክት የዩኒቨርሲቲው የትምህርት አካል ብቻ አድርገው አላስቀሩትም፡፡

ፕሮጀክቱን ወደ ተግባር ለመቀየር የዩኒቨርሲቲው መምህራንን እያስገመገሙ ለአርሶ አደሩ የሚያገለግለውን ማጨጃና መውቂያ ማሽን ሠርተው ጥቅም ላይ እንዲውል አድርገዋል፡፡

- Advertisement -

Video from Enat Bank Youtube Channel.

ወጣቶቹ ይዘው በቀረቡት ፕሮጀክት ከዚህ ቀደም የሥራና ክህሎት ሚኒስቴር በአገር አቀፍ ደረጃ ባዘጋጀው የብሩህ የፈጠራ ውድድር የ200 ሺሕ ብር ተሸላሚ ነበሩ፡፡

ከዩኒቨርሲቲው ድጋፍ እየተደረገላቸው ሲሠሩ ለነበረው ፕሮጀክት የ200 ሺሕ ብሩ ሽልማት አቅም የፈጠረላቸው ሲሆን፣ ይህንን የተመለከተው የደብረ ማርቆስ ከተማ አስተዳደርም የመሥሪያ ቦታ ሰጥቷቸዋል፡፡

ፐርፐዝብላክ ባዘጋጀውና የካቲት 6 ቀን 2016 ዓ.ም. ፍፃሜውን ባገኘው የፐርፐዝብላክ ብሔራዊ የአግሪ ኢኖቬሽን ውድድርም፣ በሒደት እያሻሻሉ የመጡትን ፕሮጀክታቸውን አቅርበው ከ95 ተወዳዳሪዎች አንደኛ በመውጣት የአንድ ሚሊዮን ብር ተሸላሚ ሆነዋል፡፡

ወጣት አበባው ደመቀ ለሪፖርተር እንደገለጸው፣ የማጨጃና የመውቂያ ማሽኑ ከጤፍ ውጪ ሁሉንም ሰብሎች ማጨድ የሚችል ነው፡፡ ጤፍን ጨምሮ ሁሉንም አዝዕርቶች ይወቃል፡፡ አርሶ አደሩ አንድ ማሽን ተጠቅሞ ጤፍ፣ ስንዴ፣ ገብስ፣ ባቄላ፣ በቆሎና ሌሎችንም መውቃት የሚችልበት ነው፡፡

ማሽኑን ለመሥራት ሁለትና ሦስት ወራት ብቻ በቂ ቢሆንም፣ የገንዘብ እጥረት መኖርና ማስተዋወቅ ቅድሚያ ይፈልግ ስለነበር አብዝቶ ወደ ማምረት አልገቡም፡፡

‹‹አንድ አርሶ አደር ሰብሉን በማጭድ ካጨደ በኋላ ለትንሽ ቀን ከምሮ ያስቀምጠዋል፡፡ ከተወሰኑ ቀናት በኋላ በበሬ ይወቃል፡፡ ፕሮጀክቱ በማሽን እንዲያጭድና ከጥቂት ቀናት በኋላ በማሽኑ እንዲወቃ ተደርጎ የተሠራ ነው፡፡ በአንድ ሞተር ለማጨድም ለመውቃትም ያገለግላል፤›› ሲልም ስለማሽኑ ይገልጻል፡፡

በዩኒቨርሲቲ እያሉ ካቀረቧቸው አማራጮች አንዱ በሞተር የሚሠራ ሲሆን፣ ሌላኛው ትልቅ ጉልበት ያለው ሆኖ ትራክተር ላይ የሚገጠም መሆኑንም ያክላል፡፡

‹‹አርሶ አደሩ ምርቱን ለመሰብሰብ የሚጠቀምበት ቴክኖሎጂ ባህላዊ ነው፡፡ ባህላዊ አስተራረስና ባህላዊ የእህል አሰባሰብ ዘዴን በየአካባቢያችን ዓይተናል፤›› የሚለው አበባው፣ የዩኒቨርሲቲ ተማሪ ሆነው በተለይ ድንገት ዝናብ በሚመጣበት ወቅተ ተማሪ በደቦ ወጥቶ የአርሶ አደሩን ማሳ እንዲሰበስብ እንደሚደረግ ይገልጻል፡፡

በዚህ የደቦ አጨዳ ተማሪዎች ብቻ ሳይሆኑ የመከላከያ ሠራዊት አካላትና ሠራተኞች ሁሉ ሲተባበሩ ማየት የተለመደ እንደሆነም ያክላል፡፡

ይህንን በተግባር ማየታቸውና የሜካኒካል ኢንጂነሪንግ ተማሪ መሆናቸው የፈጠረላቸው ግንዛቤ፣ ችግሩን እንዴት መፍታት እንችላለን ብለው እንዲነሱና ለዛሬ ስኬት እንዲበቁ አድርጓቸዋል፡፡

በምርት ስብሰባ ወቅት 35 በመቶ ምርት እንደሚባክን መገንዘባቸውና በተለይ በዝናብ ወቅት ሙሉ በሙሉ የሚባክነውን ምርት ለመታደግ ፕሮጅክቱ እንደሚያግዝ፣ የዩኒቨርሲቲ ተማሪዎች ለአጨዳ እንዲወጡ ጥሪ ሲደረግ ማጭድ ይዞ ከመውጣት፣ ማሽን ይዞ ለመውጣት እንደሚያግዝ ወጣት አበባው የፕሮጅቱን መነሻ ሐሳብና አበርክቶውን አስመልክቶ ገልጿል፡፡

በከተሞች ለተለያዩ ሥራዎች ሥራን የሚያቀሉና ድካምን የሚቀንሱ የተለያዩ ማሽኖች ቢኖሩም፣ በርካታው አርሶ አደር ቴክኖሎጂ ሳይቀርብለት ለዓመታት መድከሙን በማስታወስም፣ ሥራውን እንደ ንግድ ሳይሆን ችግር ከመፍታት አንፃር አልመው መጀመራቸውንም አክሏል፡፡

ችግሩን በቴክኖሎጂ ለመፍታት የተወጠነው ፕሮጀክት ዛሬ ላይ ወደ ንግድ ለመቀየር እየተንደረደሩ መሆኑን ገልጿል፡፡

ፕሮጀክቱን ከጀመሩ አምስት ዓመታትን እንዳሳለፉ፣ በዚህም የመንግሥት ቢሮክራሲ፣ ለማሳመን ያለውን ውጣ ውረድ ሐሳብ እንጂ ገንዘብ አለመኖርና የመሳሰሉ ችግሮችን ለማለፍ በዩኒቨርሲቲውና ከኅብረተሰቡ ጋር የግብርና ፕሮግራሞች ሲኖሩ በመሳተፍ፣ በሬዲዮ በመቅረብ አርሶ አደሩ ጋር በቴክኖሎጂው ዙሪያ ግንዛቤ እንዲፈጠር መጣራቸው አግዟቸው ዛሬ ላይ ትንሽ አቅም ማግኘት መቻላቸውንም ተናግሯል፡፡

በተሰጣቸው ቦታ ወርክሾፕ እየገነቡ ሲሆን፣ ዓላማቸው ደግሞ በሁሉም ክልሎች ያሉ አርሶ አደሮችን የቴክኖሎጂ ተጠቃሚ ማድረግ ነው፡፡

ከፐርፐዝብላክ የተሸለሙት ገንዘብ አንድ ዕርምጃ እንዲሚያራምዳቸው፣ ከዚህ በፊት የተሸለሙት 200 ሺሕ ብር ፕሮጀክቱን ለማንሳት እንደጠቀማቸው፣ ይህኛው ገንዘብ ለፕሮጀክታቸው መነሻ (ስታርትአፕ) ሆኖ ወርክሾፓቸውን ገንብተው፣ ቀጥታ ሥራ ለመጀመር እንደሚያስችላቸው ገልጿል፡፡  

ላለፉት ሦስት ወራት በፐርፐዝብላክ አማካይነት በገበሬው ቴሌቪዥን ሲደረግ የነበረው የአግሪ ኢኖቬሽን ውድድር፣ 95 የፕሮጀክት ተወዳዳሪዎችን ያሳተፈ ሲሆን፣ በሦስት ደረጃዎች በተደረገ የማጣራት ሒደት 10 አሸናፊዎች ተለይተዋል፡፡

አንደኛ ለወጣው ፕሮጀክት አንድ ሚሊዮን ብር ሲሰጥ፣ ለመጨረሻዎቹ 10 ለደረሱት ተወዳዳሪዎች ደግሞ የአክሲየን ዋጋቸው 1,000 ብር የሆነ 10 አክሲዮንና ሰርተፊኬት ተሰጥቷቸዋል፡፡

ፐርፐዝብላክ ውድድሩን ከኢኖቬሽንና ቴክኖሎጂ ሚኒስቴርና ከተለያዩ ተቋማት ጋር በመሆን እንዳከናወነው በሽልማት ሥነ ሥርዓቱ ላይ አስታውሷል፡፡   

spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ

ቪር ጀነራል ትሬዲንግ ኃ/የተ/የግ/ማኀበር የጨረታ ማስታወቂያ

ቪር ጀነራል ትሬዲንግ ኃ/የተ/የግ/ማኀበር በገቢ እና በውጭ ንግድ እንዲሁም...

ያልተቃናው የልጆች የንባብ ክህሎት

አንብቦና አዳምጦ መረዳት፣ የተረዱትን ከሕይወት ጋር አዋህዶ የተቃና ሕይወት...

እንስተካከል!

ሰላም! ሰላም! ውድ ኢትዮጵያውያን ወገኖቼ እንዲሁም የሰው ዘር በሙሉ፣...

የሙዚቃ ምልክቱ ሙሉቀን መለሰ ስንብት

የኢትዮጵያ ዘመናዊ ሙዚቃ በ1950ዎቹ እና በ1960ዎቹ በኪነ ጥበባትም ሆነ...