Sunday, March 3, 2024
- ማስታወቂያ -
- ማስታወቂያ -

እናት ባንክ የተጣራ 543 ሚሊዮን ብር አተረፈ

ተዛማጅ ፅሁፎች

እናት ባንክ በ2015 የሒሳብ ዓመት በባንኩ ታሪክ ከፍተኛ ሆኖ የተመዘገበ የተጣራ 543.6 ሚሊዮን ብር ማትረፉን አስታወቀ።

አንድ ሺሕ ብር ዋጋ ያለው የባንኩ 239 ብር የትርፍ ድርሻ ማግኘት የቻለ ሲሆን፣ ይህም በ2014 የሒሳብ ዓመት አንድ አክሲዮን ካገኘው 185 ብር የትርፍ ድርሻ ጋር ሲነፃፀር ከፍተኛ ነው።

በዚህም ምክንያት የባንኩ ዳይሬክተሮች ቦርድ ሰብሳቢ ወ/ሮ ፍሬሕይወት ወርቁ፣ ‹‹የ2015 ዓመታዊ ሪፖርት የማቀርበው ከደስታና ከፍተኛ ምሥጋና ጋር ነው፤›› በማለት የሥራ አፈጻጸማቸውን ሰሞኑን ለተካሄደው የባንኩ ባለአክሲዮኖች ጠቅላላ ጉባዔ አቅርበዋል።

የባንኩ ፕሬዚዳንት አቶ ኤርሚያስ አንዳርጌም፣ የ2015 በጀት ዓመት ለእናት ባንክ የስኬት ዓመት እንደነበር በመጥቀስ የሥራ አፈጻጸማቸውን አቅርበዋል።

ባንኩ በሒሳብ ዓመቱ ያገኘው ገቢ በ52.4 በመቶ ዕድገት በማሳየት 3.3 ቢሊዮን ብር የደረሰ ሲሆን፣ በተቀማጭ ገንዘብ አሰባሰብ ረገድም በሒሳብ ዓመቱ ብቻ 4.8 ቢሊዮን ብር አዲስ ተቀማጭ ገንዘብ ማሰባሰብ ችሏል። በዚህም ምክንያት በሒሳብ ዓመቱ መጨረሻ ላይ አጠቃላይ የባንኩ የተቀማጭ ገንዘብ መጠኑ 18 ቢሊዮን ብር ደርሷል፡፡ 

በብድር አቅርቦት ረገድም 3.9 ቢሊዮን ብር አዲስ ብድር ለተለያዩ የቢዝነስ ዘርፎች በመስጠት አጠቀላይ የብድር ክምችቱን 15 ቢሊዮን ብር ማድረስ ችሏል፡፡ የባንኩ አጠቃላይ የሀብት መጠንም በ2014 የሒሳብ ዓመት መጨረሻ ላይ 22.8 ቢሊዮን ብር መድረሱን የባንኩ አመራሮች ያቀረቡት ሪፖርት ያመለክታል።

እናት ባንክ በተጠናቀቀው የሒሳብ ዓመት የባንኩን የተከፈለ ካፒታል መጠን ከ1.93 ቢሊዮን ብር ወደ 2.53 ቢሊዮን ብር ማሳደግ የቻለ ሲሆን፣ ይህ አፈጻጸሙም ብሔራዊ ባንክ፣ የባንኮች ካፒታል አምስት ቢሊዮን ብር እንዲሆን ካስመቀጠው የጊዜ ገደብ በፊት ካፒታሉን ለመሙላት የሚያስችለው መሆኑ ተጠቅሷል፡፡ 

በዕለቱ የባለአክሲዮኖች ጉባዔ ላይም ሲሰነዘሩ የነበሩ አስተያየቶች የባንኩ አመራሮችን በማመሥገን የታጀበ ነበር፡፡ 

የባንኩ ፕሬዝዳንት፣ በተጠናቀቀው የሒሳብ ዓመት ከተመዘገበው የተሻለ ውጤት በዘንድሮው በጀት ዓመት ለመድገም እንደሚሠሩም ተናግረዋል። 

በዓለም አቀፍ ደረጃ የዋጋ ንረት በመጦዙ ምክንያት የኢትዮጵያ ባንኮች ንረቱን ለመከላከል ከፍተኛ የወለድ ምጣኔ ጭማሪ ማድረጋቸውን በማስታወስ የዋጋ ንረቱ ለኢንዱስትሪው ትልቅ ፈተና መሆኑን ጠቅሰዋል፡፡

‹‹የዓለም የብሔራዊ ባንኮች እንዳደረጉት ሁሉ የኢትዮጵያ ብሔራዊ ባንክም የዋጋ ግሽበትን ለመከላከል የሚረዱ መመርያዎችን አውጥቷል፤›› ያሉት አቶ ኤርሚያስ፣ የዋጋ ንረቱ ከ30 በመቶ በሆነበት ሁኔታ ይህ መደረጉ የሚገርም ባይሆንም፣ ሥራቸውን አስቸጋሪ ማድረጉን ግን መካድ እንደማይችል አመልክተዋል፡፡ 

የአገር ውስጥ ኢኮኖሚው የሚደነቅ ፅናት ቢያሳይም፣ የኑሮ ውድነትና ድርቅ በአገሪቱ የተለያዩ ክፍሎች የተከሰቱ ግጭቶች ከፍተኛ ጫና እንደነበራቸውና እንዲህ ያሉ ፈተናዎችን በማለፍ በ2015 ከፍተኛ ውጤት መመዝገቡን የባንኩ ፕሬዚዳንት አቶ ኤርሚያስ አስረድተዋል። መጪው ዓመትም የራሱ ፈተናዎች የሚኖሩት ቢሆንም፣ ባንኩ ፈተናዎችን ተቋቁሞ ውጤታማ እንደሚሆን ገልጸዋል።

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች