Sunday, March 3, 2024
- Advertisement -
- Advertisement -
ዝንቅዓለምና ጊዜ

ዓለምና ጊዜ

ቀን:

እኔማ አቶ ጊዜ፣ ከጥንት ዠምሬ፣

ለፍጥረት ታዛቢ፣ ሆኜ በመኖሬ፣

እጅግ በረዘመው፣ በራቀው መንገዴ፣

- Advertisement -

Video from Enat Bank Youtube Channel.

ቸኩዬ በፍጥነት፣ ሳልፍ እንደ ልማዴ፣

መቼም አይቀርና፣ ዓይቶ መመልከት፣

ትልቅ ግቢ ዓይቼ፣ ባለ ብዙ ቤት፣

ከደጅ ሲተራመስ፣ ሰው ከቤት ተርፎ፣

ይመስል ነበረ፣ ንብ ያለበት ቀፎ።

የአጥሮቹ አሠራር፣ የግቢውም መድመቅ፣

የቤቶቹም ብዛት፣ በጣም የሚደነቅ፣

እንደዚህ ግቢውን፣ ሠርቶ ያሳመረ፣

ማን ይሆን? አልኩና፣ ከዚህ የሠፈረ፣

ደንቆኝ ስመለከት፣ በጣም ተገርሜ፣

ሰው አገኘሁና፣ አልኩት “በል ወንድሜ፣

የዚህ የውብ ግቢ፣ ባለቤቱ ማነው?”

“ያባት ያያቱ ርስት፣ ያንድ ከበርቴ ነው፣

ርስቱም ዘላለም፣ አለ ሳይነካ”፣

ብሎ መለሰልኝ፣ ኰርቶ እየተመካ።

ብዙ ትውልድ አልፎ፣ ለትውልድ ደርሼ፣

ደግሞ በዚያው መንገድ፣ መጣሁ ተመልሼ።

ከዚያ ካጥር ግቢ፣ ከዚያ ሁሉ ቤት፣

ከቁመቱ ርዝመት፣ ከጎኑ ስፋት፣

አንድ ድንጋይ እንኳን፣ ጠፍቶ ምልክት፣

ያ ያየሁት ሁሉ፣ እንዳልነበር ሆኖ፣

ከግቢው ቦታ ላይ፣ አየሁ ትልቅ መስኖ።

የለመለመበት፣ አንድ ትልቅ ጨፌ፣

ተመለከትኩና፣ ልሄድ ስል አልፌ፣

አንድ ትልቅ ዛፍ ሥር፣ ተጠግቶ ጥላ፣

አንድ እረኛ አገኘሁ፣ ከብቶች ሳር ሲያበላ።

“እንደዚህ ያለ ሳር፣ የበቀለበት፣

ከመቼ ወዲህ ነው?” ብዬ ጠየቅሁት፤

እሱም ቁጭ እንዳለ፣ ቀና ብሎ ዓይቶኝ፣

‹‹ዘለዓለም ለከብቶች፣ ግጦሽ የሚገኝ፣

ከዚሁ መስኖ ነው” ሲል መለሰልኝ።

ብዙ ትውልድ አልፎ፣ ለትውልድ ደርሼ፣

ደግሞ በዚያው መንገድ፣ መጣሁ ተመልሼ

መስኖውም ጠፋና፣ ጨፌነቱ ቀርቶ፣

ከመስኩ ቦታ ላይ፣ ከተማ ተሠርቶ፣

የቤቱ መበርከት፣ የመንገዱ ማማር፣

የከተማው ፅዳት፣ የግንቡም አሠራር፣

የሕዝቡ አበዛዝ፣ የገበያው መድመቅ፣

ታይቶ እማይጠገብ፣ እጅግ የሚደነቅ።

ያማረች ከተማ፣ የጥበብ መዝገብ፣

ጠንተው የቆሙባት፣ አዋጅና ደንብ፣

ውበቷን አድንቄ፣ ስመለከታት፣

ዕድሜው የጠና ሰው፣ አግኝቼ ድንገት፣

“መቼ ነው የተሠራች?” ብዬ ጠየቅሁት።

እሱም መለሰልኝ፣ በጣቱ አመልክቶ፣

“ይህች ትልቅ ከተማ፣ ከጥንትም አንሥቶ፣

መልኳ እየታደሰ፣ ውበቷ እያበራ፣

ይኖራል ዘለዓለም፣ ሥልጣኗ እንደ ኰራ”።

ብዙ ትውልድ አልፎ፣ ለትውልድ ደርሼ፣

ደግሞ በዚያው መንገድ፣ መጣሁ ተመልሼ።

ከዚያች ከከተማ፣ ጠፍቶ ምልክት፣

አየሁ ከዚያ ቦታ፣ ጫካ በቅሎበት፤

ሲተራመሱበት፣ ዥብ ነበር አንበሳ፣

በያይነቱ አውሬ፣ አዕዋፍ እንስሳ፣

ሁሉም በየቋንቋው፣ ድምፁን እያሰማ፣

ለጫካው ሲሰጡት፣ የሚያስፈራ ግርማ፣

የዛፉ አበዛዝ፣ ያውሬው መበርከት፣

እጅግ አስደናቂ፣ ሆኖ አገኘሁት።

ደኑን ተመልክቼ፣ እያየሁ ስሄድ፣

አገኘሁ ያገር ሰው፣ ድንገት በመንገድ፤

‹‹ዛፍ እንጨቱ፣ በቅሎ ጫካው የደመቀው፣

ከመቼ ወዲህ ነው?›› ብዬ ብጠይቀው፣

ትክ ብሎ እያየ፣ ጫካ ጫካውን፣

እንዲህ መለሰልኝ፣ እሱም ተራውን፤

“ይህን መጠየቅህ፣ እንግዳ ነህ ለካ፣

ጥድ የሚበቅልበት፣ ግራርና ወርካ፣

ጥንቱንም ደን ነው፣ የዘላለም ጫካ”።

አንዱ ሥፍራ ሲለቅ፣ አንዱ እየተተካ፣

ሁሉም ርስቴ ነች፣ እያለ ሲመካ፣

ሞኝነት አድሮብን፣ ሳናስበው እኛ፣

ዓለም ሠፈር ሆና፣ ሕዝቡ መንገደኛ፣

ትውልድ ፈሳሽ ውኃ፣ መሬቷም ዥረት፣

መሆኑን ዘንግቶ፣ ይህ ሁሉ ፍጥረት፣

ስትመለከቱት፣ በሠልፍ ተጉዞ፣

ሁሉም በየተራው፣ ያልፋል ተያይዞ።

(ደራሲና ባለቅኔ ከበደ ሚካኤል፣ ከበደ ሚካኤል፣ የቅኔ አዝመራ) 

spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ

የአዲስ አበባ ነዋሪዎች ቁጥር ሲጨምር የሚኒባስ ታክሲዎች ቁጥር እየቀነሰ መምጣቱ ሊታሰብበት ይገባል

በአዲስ አበባ ከተማ የትራንስፖርት አገልግሎት በመስጠት ከፍተኛ የሚባለውን ድርሻ...

ሃምሳ ዓመታት ያስቆጠረው አብዮትና የኢትዮጵያ ፖለቲካ ውጣ ውረድ

የኢትዮጵያ ሕዝቦች የዴሞክራሲ ለውጥ ጥያቄ የሚነሳው ከፋሺስት ኢጣሊያ ወረራ...

በአዲስ አበባ ንግድና ዘርፍ ማኅበራት ምክር ቤት የተፈጸመው ሕገወጥ ተግባር ምንድነው?

የአዲስ አበባ ንግድና ዘርፍ ማኅበራት ምክር ቤት የዳይሬክተሮች ቦርድ፣...

በአዲስ አበባ ንግድና ዘርፍ ማኅበራት ምክር ቤት ላይ ምርመራ እንዲደረግ ውሳኔ ተላለፈ

ፕሬዚዳንቷና ዋና ጸሐፊው ተጠያቂ ሊሆኑ ይችላሉ ተብሏል ከአዲስ አበባ ንግድና...