Friday, March 1, 2024
- Advertisement -
- Advertisement -
- Advertisement -

ፌርማታ ፅሁፎች

ሕገ ሰካራም!

ትኩስ ፅሁፎች

‹‹ነገሩ ነው እንጂ፣ አረቄ አያሰክርም

አሳሪ ከሌለ፣ ገመድ ሰው አያስርም

ወዳጅ ዘመድ እንጂ…

አፈር ሰው አይቀብርም፡፡››

ይላል የሰከረ!

አረቄ ቤት ሆኖ፣

መተዳደሪያውን፣ ሕግ እያዋቀረ፡፡

እንደሰካራም ሕግ፣ እንደስካር ወሬ

አረቄ ቤት ሆኜ…

አረቄ እየጠጣሁ፣ በነገር ሰክሬ

ስለ ሰካራም ሕግ፣ ላውራሽማ ፍቅሬ፡፡

እዚህ አረቄ ቤት…

ከተሰበሰበው፣ የሰካራም አባል

ስሙን የማላውቀው፣ ‹‹ሰካራም›› የሚባል

አንድ የሰከረ ሰው፣ እንደተናገረው

አገርሽ አገሬ…

‹‹መልሱን ጠጣንበት››፣

በሚለው ሕግ ነው፣ የሚተዳደረው፡፡

‹‹ለመብራት›› እያሉን፣ ገንዘብ እያዋጣን፣

‹‹ለመንገድ›› እያሉን፣ ገንዘብ እያዋጣን፣

‹‹ለውኃ›› እያሉን፣ ገንዘብ እያዋጣን

ለምን መብራት ጠፋ?

ለምን ውኃ የለም?

እንዴት መንገድ አጣን?፣ ብሎ ከመጠየቅ፣

ሳይሻል አይቀርም…

መልሱን ጠጣንበት፣ የሚል ሕግ ማፅደቅ

ወንጀለኛው ሁላ…

ዳኛውን ጠብቆ ገንዘብ ካቀበለ

በሺሕ ምስክር ፊት…

የመሠረትነው ክስ፣ ‹‹ውድቅ›› ከተባለ

ለምን እዴት? የሚል…

የከሳሽ ጥያቄ፣ መልስ ካልተሰጠው፣

በሰካራም አንቀፅ…

መልሱን ጠጣንበት!

የሚለው ሕግ ነው፣ የሚረጋገጠው፡፡

እንደ ሕገ መንግሥት…

ተፈጻሚነቱ፣ ቢሠራም ባይሠራም

መልሱን ጠጣንበት!

ብሎ ያፀደቀው፣ ሕግ አለው ሰካራም፡፡

እንደሰካራም ሕግ፣ እንደስካር ወሬ

አረቄ ቤት ሆኜ…

አረቄ እየጠጣሁ፣ በነገር ሰክሬ

እኔን አረቄ ቤት፣ ምን እንደወሰደኝ

አረቄ መጠጣት፣ ማን እንዳስለመደኝ፣

አትጠይቂኝ ፍቅሬ፡፡

መልሱን ጠጣሁበት!!

(ከግጥምብቻ ማኅበራዊ ትስስር ገጽ የተወሰደ)

- Advertisement -
- Advertisement -

ተጨማሪ ለማንበብ

በብዛት የተነበቡ ፅሁፎች