Friday, March 1, 2024
- Advertisement -
- Advertisement -
ማኅበራዊ‹‹የተሻለ ዕርዳታ ለማግኘት የተጎጂዎችን ቁጥር የሚያጋንኑ ክልሎች አሉ›› የአደጋ ሥጋት ሥራ አመራር...

‹‹የተሻለ ዕርዳታ ለማግኘት የተጎጂዎችን ቁጥር የሚያጋንኑ ክልሎች አሉ›› የአደጋ ሥጋት ሥራ አመራር ኮሚሽን

ቀን:

በአገር አቀፍ ደረጃ በድርቅ፣ በጎርፍና በግጭት ምክንያት የተፈናቀሉ ሰዎች ትኩረት እንዲያገኙና የተሻለ ድጋፍ እንዲኖራቸው፣ ክልሎች የተጎጂዎችን ቁጥር በማጋነን እንደሚያቀርቡ የኢትዮጵያ የአደጋ ሥጋት ሥራ አመራር ኮሚሽን አስታወቀ፡፡

በተለያዩ ምክንያቶች ጉዳት የደረሰባቸው ክልሎች ትኩረት ለማግኘትና የተሻለ ድጋፍ ለማግኘት ሲሉ ይህንን ያህል ሰዎች ሞተውብኛል፣ ይህንን ያህል ተጎድተውብኛል የሚል መረጃ እንደሚያመጡ የኮሚሽኑ ከፍተኛ የሕዝብ ግንኙነት ባለሙያ አቶ አታለል አቡሃይ ለሪፖርተር አስረድተዋል፡፡

በዚህ መሠረት እስካሁን ሁሉም ክልሎች ይህንን ያህል ሰዎች ሞተውብኛል ብለው ለኮሚሽኑ ሪፖርት አለማቅረባቸውን የገለጹት ባለሙያው፣ የቅድሚያ ቅድሚያ የምግብ ዕርዳታ ያስፈልገናል ብለው ለላኩ ክልሎች ኮሚሽኑ አስፈላጊውን ድጋፍ እያደረገ ነው ብለዋል፡፡

- Advertisement -

Video from Enat Bank Youtube Channel.

የዓለም የምግብ ፕሮግራምን ጨምሮ ሌሎች ለጋሽ ድርጅቶች ዕርዳታ መስጠት ካቆሙበት ጊዜ ጀምሮ፣ መንግሥት በራሱ አቅም ያለውን ክምችት በመጠቀም አስቸኳይ የምግብ ዕርዳታ ለሚፈልጉ ክልሎች ማሠራጨቱን አስታውሰዋል፡፡

በአሁኑ ወቅት በኢትዮጵያ 7.3 ሚሊዮን ሰዎች የቅድሚያ ቅድሚያ የምግብ ዕርዳታ እንደሚያስፈልጋቸው ገልጸው፣ እስካሁንም ለእነዚህ ሰዎች በሁለት ዙሮች የምግብና የገንዘብ ድጋፍ እንደተደረገላቸው አብራርተዋል፡፡

እስካሁን በአጠቃላይ 799 ሺሕ ኩንታል እህል በሁለት ዙሮች እንዲደርሳቸው የተደረገ መሆኑን፣ 1.5 ሚሊዮን ብር ድጋፍ በማድረግ በየአካባቢው እህል ገዝተው ማግኘት ይችላሉ ተብለው ለተለዩ ሰዎች በጥሬ ገንዘብ መሰጠቱን አክለዋል፡፡

ዕርዳታ ሰጪ ተቋማት ካቋረጡበት ጊዜ ጀምሮ 7.9 ቢሊዮን ብር የሚያወጡ ግብዓቶች ድጋፍ መደረጉን፣ መንግሥት በሦስተኛ ዙር ድጋፍ ለማድረግ በቂ የሆነ ዝግጅት ማድረጉን ተናግረዋል፡፡ በሌላ በኩል በአማራ ክልል ለ1.8 ሚሊዮን በላይ ሰዎች በድርቅ የተጎዱ መሆናቸውንና በትግራይ ክልል ሰሜን ምዕራብ፣ ማዕከላዊና ደቡብ ምሥራቅ ዞኖች የሚገኙ 981 ሺሕ ሰዎች በድርቅ ምክንያት ትልቅ ችግር ውስጥ መሆናቸውን ሳይገልጹ አላለፉም፡፡  

ከዚህ በተጨማሪ በአፋር ክልል ዞን አንድ፣ ዞን ሁለት፣ ዞን ሦስት፣ ዞን አራትና ዞን አምስት የሚገኙ 225 ሺሕ ሰዎች ለከፍተኛ ረሃብ የተጋለጡ መሆናቸውንና በአጠቃላይ 7.3 ሚሊዮን ሰዎች አስቸኳይ ድጋፍ እንደሚሹ ጠቁመዋል፡፡

በድርቅ፣ በጎርፍና በሌሎች ችግሮች የተጎዱ የማኅበረሰብ ክፍሎች ድጋፍ እንዲያገኙ የሚንቀሳቀሱ ግብረ ሰናይ ድርጅቶች፣ መንግሥት የሚከተለውን አሠራር ተከትለው ከሠሩ አብሮ ለመሥራት ዝግጁ ነው ብለዋል፡፡

በተለያዩ ጊዜያት ኮሚሽኑ ከክልሎች ጋር ተከታታይ ስብሰባ ሲያደርግ፣ ይህንን ያህል ሰዎች ሞተውብኛል በማለት ያነሳ ክልል እንደሌለ አጽንኦት ሰጥተው በማስረዳት ብዙ ጊዜ ጉዳዩን ለሌላ አጀንዳ ይጠቀሙበታል ሲሉ አስረድተዋል፡፡

spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ

[ክቡር ሚኒስትሩ ወደ መኖሪያ ቤታቸው ሲገቡ ባለቤታቸው በቴሌቪዥን የሚተላለፈውን ዜና በመደነቅ እየተመለከቱ አገኟቸው]

እንዲያው የሚደንቅ ነው እኮ። ምኑ? ዜና ተብሎ በቴሌቪዥን የሚተላለፈው ነገር ነዋ፡፡ ምኑ...

በኦሮሚያ የሚፈጸሙ ግድያዎችና የተጠያቂነት መጥፋት

የካቲት 11 ቀን 2016 ዓ.ም. ቢሾፍቱ አቅራቢያ በሚገኘው የዝቋላ...

የኢትዮጵያ መዋዕለ ንዋይ ገበያ ከሚያስፈልገው ካፒታል ውስጥ 90 በመቶውን ሰበሰበ

እስካሁን 15 ባንኮች የመዋዕለ ንዋይ ገበያው ባለድርሻ ሆነዋል የኢትዮጵያ መዋዕለ...

አዲሱ የንብ ባንክ ቦርድ የባንኩን ካፒታል በአሥር ቢሊዮን ብር ለማሳደግ ማቀዱ ተሰማ

አዲሱ የንብ ኢንተርናሽናል ባንክ የዳይሬክተሮች ቦርድ የባንኩን ካፒታል በአሥር...