Monday, February 26, 2024

መከላከያን እረፍት የነሱ የፀጥታ ችግሮችና የተቋሙ ፈተናዎች

- Advertisement -spot_img

በብዛት የተነበቡ

የአገር መከላከያ ሠራዊት የሕዝብ ግንኙነት ኃላፊ ኮሎኔል ጌትነት አዳነ ነሐሴ 17 ቀን 2016 ዓ.ም. በዋልታ ቴሌቪዥን በተሠራጨው ነፃ ሐሳብ ፕሮግራም ላይ ቁልፍ ጥያቄዎች ቀርቦላቸው ነበር፡፡ በአማራ ክልል አስቸኳይ ጊዜ አዋጅ ታውጆ መከላከያ ኦፕሬሽን ከጀመረ በኋላ በአጭር ጊዜ ውስጥ ብዙ ለውጥ መምጣቱን ኃላፊው ገለጹ፡፡ መከላከያው የክልሉን ሁኔታ ወደ ሰላም የመለሱ ስኬታማ ሥራዎችን በአጭር ጊዜ ማከናወኑንም በሰፊው አብራሩ፡፡

በመካከሉ ግን ‹‹በአማራ ክልል ግጭት የማርገብ ሥራ ነው እየተካሄደ ያለው ወይስ ውጊያ ነው?›› የሚል ጥያቄ ቀረበላቸው፡፡ ይህ ጉዳይ በአተናተን እንደሚለያይ የጠቆሙት ኮሎኔል ጌትነት የግጭት፣ የውጊያና የጦርነትን ምንነት ወደ ማብራራቱ ገቡ፡፡ ‹‹ጦርነት አጠቃላይ የዲፕሎማሲ፣ የፖለቲካና የጦር ሜዳ ውጊያዎችን የሚይዝ ሰፊ ዓውድ ያለው ነው፤›› ሲሉ የተነተኑት የጦር መኮንኑ፣ በአማራ ክልል ያለው ሁኔታ ከዚህ የተለየ መሆኑን አስረድተው ነበር፡፡

‹‹ውጊያ የምንለው ተመጣጣኝ ኃይል ያላቸው ሁለትም ሦስትም የሆኑ ኃይሎች የሚያደርጉት ፍልሚያ ነው፤›› ያሉት ኮሎኔሉ፣ ግጭት ግን ተመጣጣኝ የሌለው ኃይል የሚፈጥረው የሰላም ማደፍረስ ችግር እንደሆነ በማመልከት በአማራ ክልል ያለው ሁኔታም በግጭት መልክ የሚታይ እንደሆነ ተናግረው ነበር፡፡

ነገሩ እሳቸው እንደሚሉት ግጭት ከሆነ ጉዳዩ የሚሊሻና የፖሊስ ሥራ እንጂ መከላከያ ምን ያደርጋል የሚል ጥያቄም ቀርቦላቸው ነበር፡፡ ለጥቂት የመንደር ሽፍቶች አስቸኳይ ጊዜ አዋጅ ማወጅን ምን አመጣው? እንዲሁም ጉዳዩ በታጠቁ ሰዎች የተወሰነ ከሆነ ሕዝቡን ሰብስቦ ማወያየትስ ለምን አስፈለገ በሚሉ ነጥቦችም ኮሎኔሉ መሞገታቸው ይታወሳል፡፡

ለእነዚህ ቁልፍ ጥያቄዎች ማብራሪያ የሰጡት ሕዝብ ግንኙነት ኃላፊው፣ ‹‹ሌባም ሆነ ግጭት ፈጣሪ ሕዝብ ውስጥ ነው የሚደበቀው፡፡ ከሕዝብ ነጥሎ ለመምታት አቅም ያለው መከላከያ በመሆኑ ነው ሥምሪት የወሰደው፡፡ ይህን ደግሞ በአጭር ጊዜ እያሳካው ይገኛል፤›› በማለት ገልጸው ነበር፡፡ ያም ቢሆን ግን የነበረው የክልሉ ሁኔታ ከባድ እንደነበር አምነዋል፡፡ አስቸኳይ ጊዜ አዋጅ የማወጁ ጉዳይ የመንግሥት እንጂ የመከላከያ አለመሆኑን አመልክተዋል፡፡

ኮሎኔል ጌትነት በዚህ ቃለ መጠይቃቸው መከላከያ በአማራ ክልል ኦፕሬሽኑ በአጭር ጊዜ የሚታይ ውጤት ማምጣቱን ተከራክረዋል፡፡ ሠራዊቱ ያመጣውን የሰላምና መረጋጋት ውጤት ግን፣ ‹‹ተከታትሎ መኮትኮት፣ ማሳደግና ወደ ዘላቂ ሰላም የማምጣት ደግሞ ከመከላከያው ውጪ ያለ ኃይል (መንግሥት) የሚሠራው ነው፤›› በማለት አክለዋል፡፡

በአማራ ክልል ተገኘ ያሉትን ሰላም ዘላቂ የሚያደርገው፣ ‹‹መከላከያ ኦፕሬሽን ሲሠራ እግር በእግር እየተከተለ ኅብረተሰቡ፣ የአካባቢው መስተዳድር፣ የአካባቢው የፀጥታ አካል የራሱን ሥራ ሲሠራ ነው፤›› በማለት አጠንክረው አስረድተዋል፡፡ ‹‹በትግራይ ክልል ጦርነት ወቅት እነዚህ ነገሮች በመታጣታቸው ነው ግጭቱ መልሶ ያገረሸው፤›› ሲሉም በማሳያነት ጠቅሰዋል፡፡

ኮሌኔሉ ይህን ይበሉ እንጂ አሁን ላይ በተለያዩ አካባቢዎች የሰላም መድረኮችን ሲመራና ሕዝባዊ ውይይቶችን ሲያካሂድ የሚታየው የመከላከያ ሠራዊቱ መሆኑ ብዙ ጥያቄዎችን እያስነሳ ነው፡፡ በአማራ ክልልም ሆነ በሌሎች አካባቢዎች የተለያዩ የመከላከያ ዕዞች የጦር መኮንኖች ከነዋሪዎች ጋር ተወያዩ የሚሉ ዜናዎች በተደጋጋሚ ሲነገሩ ይሰማል፡፡ የሲቪል አስተዳደሩ ወይም መንግሥታዊ መዋቅሩ የት ሄዶ ነው፣ መከላከያው ሕዝባዊ ውይይቶችን የሚመራው የሚል የሚና መደበላለቅ ጥያቄ ቀድሞ ይነሳል፡፡

መከላከያው ልክ እንደ ፖሊስና የሚሊሻ ኃይል በየቦታው ለሚፈጠሩ ቀውሶች መሰማራቱ ሳያንስ የሲቪል አስተዳደሩን (ካድሬውን) ሚና ተክቶ ከአገር ሽማግሌዎችና ከሃይማኖት አባቶች ጋር ተቀምጦ፣ በየአካባቢው የፀጥታ ችግር የውይይት መድረኮችን እንዲመራ መደረጉ የሠራዊቱን ሸክም የሚያከብድ መሆኑ እየተነሳ ይገኛል፡፡

የኢትዮጵያን ሉዓላዊ ዳር ድንበርን ማስከበር በራሱ ከባድ ፈተና ሆኗል በሚባልበት በዚህ ወቅት፣ የአገር ዋልታና ማገር ነው የሚባለው መከላከያው በረባ ባልረባው፣ እንዲሁም በሚመለከተውም በማይመለከተውም ጉዳይ እንዲጠመድ መደረጉ የተቋሙን የቤት ሥራ አብዝቶታል የሚል ሥጋት ከብዙ አቅጣጫዎች ይደመጣል፡፡

ተከብሮና ታፍሮ ዘመናትን የዘለቀው የመከላከያ ተቋም በየመንደሩና በየክልሉ በሚፈጠሩ ግጭቶች ዋናው ሕግ አስከባሪ ተደርጎ በተልዕኮዎች መጠመዱ፣ ሠራዊቱን ከባድ መስዋዕት እንዲከፍል እያደረገው ነው ይባላል፡፡ ይህ ሁሉ ሳይንስ ደግሞ ሕዝባዊ የውይይት መድረኮችን ለመምራት መጠመዱ ኃላፊነቱን ከማክበድ ባለፈ የሚና መደበላለቅ እየፈጠረ ነው እየተባለም ነው፡፡

የመከላከያ ሚኒስትር ባለሥልጣናት ከሰሞኑ ለፓርላማው የሰላምና የውጭ ጉዳዮች ቋሚ ኮሚቴ የሦስት ወራት ዕቅድ አፈጻጸምን ሲያቀርቡ ተቋሙን የከበቡ ብዙ ጉዳዮችን በሰፊው አንስተው ነበር፡፡ የመከላከያ ሚኒስትር ደኤታዋ ወ/ሮ ማርታ ሉጂ፣ ‹‹መከላከያ እንኳን የኢትዮጵያን ዜጎች ቀርቶ የውጭ አገሮችን ጭምር ለሰላም ማስከበር ተልዕኮ ይግባልን የሚሉትና የሚመኩበት ነው፤›› ሲሉ ተቋማቸውን አወድሰዋል፡፡

‹‹ሁሉም ዜጋ ስለመከላከያችን ባህሪ፣ ተግባር፣ ቁርጠኝነትና ለአገር ደኅንነት መስዋዕት እስከመክፈል ድረስ ያለው ዓላማን መረዳት አለበት፤›› ሲሉ ያከሉት ሚኒስትር ደኤታዋ፣ ያልተቋረጠና ሰፊ ግዳጆችን እየተሰጠው ያለውን የመከላከያ ሠራዊቱን ሁሉም ዜጋ ማገዝ እንዳለበት ነው ያሳሰቡት፡፡

የመከላከያ ሚኒስትሩ አብርሃም በላይ (ዶ/ር) በበኩላቸው፣ የመከላከያ ተልዕኮና መሠረታዊ ኃለፊነት የተለየ ስለመሆኑ በሰፊው አብራርተዋል፡፡ ተራ ዘረፋ፣ የመንደር ረብሻና መለስተኛ የሽፍታ እንቅስቃሴ በተፈጠረ ቁጥር መከላከያ የታለ የሚል ጥያቄ መነሳቱ ፍፁም የተሳሳተ አመለካከት መሆኑን ተናግረዋል፡፡

የሠራዊቱን ስም የማጠልሸት ሥራ በውስጥም በውጭም ጠላቶች እንደሚሠራ ያመለከቱት ሚኒስትሩ፣ ‹‹መከላከያውን ማዳከም የዚህን አገር ዋና አቅም ማዳከም ነው በሚል እምነት ፀረ መከላከያ የስም ማጥፋት ይሠራል፤›› ብለዋል፡፡ የመከላከያው ተልዕኮ የየአካባቢውን ሰላምና ፀጥታ የመቆጣጠር አለመሆኑን የተናገሩት ሚኒስትሩ፣ በየቀበሌው ለሚፈጠር ችግር መከላከያ ይግባልን ሊባል እንደማይችል አመልክተዋል፡፡

‹‹የቀበሌ፣ የወረዳና የዞን ፀጥታ ጉዳዮችን ማስተዳደር ያለበት ማነው? ቀበሌን ማስተዳደር ያለበት ቀበሌ አስተዳደር ነው፡፡ ወረዳን ማስተዳደር ያለበት ወረዳው ነው፡፡ የአካባቢውን ፀጥታም ሆነ ደኅንነትን ጨምሮ ሕዝቡን ማስተዳደር አለበት ማለት ነው፡፡ አሁን እየሆነ ያለው ግን ቀበሌ የሚያስተዳድረው ሕዝቡን አስተዳድሮ ሽፍታ እንዳይኖርበት መሥራት እያለበት መከላከያ ይምጣልኝ ይላል፡፡ የመከላከያ ተልዕኮ ግን በየቀበሌም እየዞረ ሽፍታና ሌባ ማፅዳት አይደለም፡፡ ሚሊሻ ምን ይሠራል? ፖሊስ ምን ይሠራል? ከእነዚህ ያለፈ ችግር ካለ ፌዴራል ፖሊስ ጋር ይኬዳል፡፡ ይህ አስተሳሰብ ካልተስተካከለና በየአካባቢው ወይም በየቀበሌው መከላከያ እየገባ ሌባ ያፅዳ የሚለው ከቀጠለ መከላከያ መደበኛ ሥራውን መሥራት አይችልም፤›› ሲሉ ነው አብርሃም (ዶ/ር) ተቋማቸውን የተከላከሉት፡፡

መከላከያው ከዚህ የሰፋ እጅግ ብዙ ተልዕኮ እንዳለው የተናገሩት ሚኒስትሩ፣ ‹‹የአገር ሉዓላዊነትን ለማስጠበቅ፣ በአገር ላይ የሚደቀኑ አደጋዎችን መክቶ ለማስቀረት መዘጋጀትና ተከታታይ ሥራ መሥራት ይጠበቅብናል፤›› ብለዋል፡፡ አብርሃም ይህን በተመለከተ የእኛ ሥራ በየመንደሩ ያለ ሌባን ማሳደድ አይደለም በማለት ነው ያሰመሩበት፡፡  

የአዲስ አበባ ዩኒቨርሲቲ የሰላምና ደኅንነት ጥናት ኢንስቲትዩት ባልደረባው ዮናስ ታሪኩ (ዶ/ር) እ.ኤ.አ. ዲሴምበር 2022 ባቀረቡት ጥናት፣ የኢትዮጵያ መከላከያ ሠራዊት ከኢሕአዴግ ሥልጣን ዘመን ጀምሮ ያለፈባቸውን ተቋማዊ ውጣ ውረዶች በሰፊው ፈትሸዋል፡፡ “The Red Book: The Political Foundation of the Ethiopian Notional Defense Forces Under the EPRDF” በሚል ርዕስ የቀረበው ይህ ጥናት፣ ከደርግ ውድቀት በኋላ ኢትዮጵያ ምን ዓይነት ጦር ሠራዊት ገንብታ እንደኖረች ብዙ ጉዳዮችን ይዳስሳል፡፡ ተመራማሪው በዚህ ብቻ ሳይወሰኑ በኢትዮጵያ የፖለቲካ ለውጥ ከመጣ ወዲህ በመከላከያ ውስጥ ተደረገ ስለሚባለው ሪፎርም የተለያዩ ነጥቦችን ይፈትሻሉ፡፡

‹‹ትልቅ ቦታ የሚሰጠው የሠራዊት ግንባታ በግልጽ የሚታወቅ ዓላማ ላይ ተመሥርቶ መካሄድ ያለበት ነው፡፡ የተገነባው ሠራዊት ዓላማውን ማሳካት ካልቻለ መገንባቱ ትርጉም የሌለው ይሆናል፡፡ አንድ ሠራዊት ዓላማውን እንዲያሳካ ተደርጎ ከተገነባ ግን ሠራዊቱን ለመገንባት የዋለው ጉልበት፣ ሀብትና ገንዘብ የባከነ አይሆንም፡፡ ስለሆነም የሠራዊት ግንባታ በግልጽ የሚታወቅ ዓላማን ያነገበ መሆን ይገባዋል፤›› የሚል ከቀዩ መጽሐፍ የተገኘ ጥቅስን መንደርደሪያ የሚያደርጉት ዮናስ (ዶ/ር)፣ በኢሕአዴግ ዘመን የነበረውን የሠራዊት ግንባታ ሒደት በጥልቀት ያያሉ፡፡ ‘ቀዩ መጽሐፍ’ በተለምዶ የሚባለው፣ በቀድሞው ጠቅላይ ሚኒስትር መለስ ዜናዊ የተጻፈ የሚባለውና የመከላከያው ዋና ሰነድ ሆኖ ማገልገሉ የሚነገረው የሠራዊት ግንባታውን ብቻ ሳይሆን አደረጃጀቱንና ተልዕኮውን ጭምር ሲበይን መቆየቱን ነው ያመለከቱት፡፡ በዚህ መጽሐፍ የሠራዊቱ ቅርፅና አደረጃጀት ብቻ ሳይሆን፣ የፖለቲካ ሥርዓቱን ምንነትና ባህሪም የሚገልጹ ሐሳቦች መቀመጣቸውን አውስተዋል፡፡

የኢሕአዴግ ሥርዓት የሚከተለው አብዮታዊ ዴሞክራሲ ርዕዮተ ዓለም ዋና ምሽግ የመከላከያ ተቋሙ አንደሆነ ያስቀመጠ እንደነበር ይገልጻሉ፡፡ የኢትዮጵያ የፖለቲካ ሁኔታ በጊዜ ሒደት እየተበላሸ መጥቶ የሕዝቡ ቁጣ ገንፍሎ መንግሥት ሥልጣኑን የማጣት አደጋ በተጋፈጠበት ወቅትም፣ ሥርዓቱ መሸሸጊያ ወደሚለው መከላከያ መጠጋትን እንደመረጠ ያስታውሳሉ፡፡ ሥርዓቱ ጫና እያደረበት ሲመጣ በተለይም ከለውጡ ወዲህ መከላከያውን ሪፎርም የማድረጉ ጥያቄ ሲጨምር የመከላከያ ተቋሙ ዋና የፖለቲካ መሻኮቻ ሜዳ መሆኑንም በግልጽ ያስቀምጡታል፡፡ ተመራማሪው በመከላከያ ውስጥ በተለይ በአመራርነት ደረጃ ካሉ የጦር መኮንኖች ሕወሓትን በሚደግፉና የፖለቲካ ለውጡ አስፈላጊ ነው በሚሉ ኃይሎች መካከል በዚያን ወቅት ከባድ ሽኩቻና መገፋፋት ተፈጥሮ እንደነበር ነው የገለጹት፡፡

‘የሠራዊት ግንባታ በአብዮታዊ ዴሞክራሲ’ ወይም ‘ቀዩ መጽሐፍ’ በተባለው ሰነድ ሲካሄድ የቆየውን የሠራዊት ግንባታ ከለውጡ በኋላ ለመቀየር እንደተሞከረ ዮናስ (ዶ/ር) ይጠቅሳሉ፡፡ በጠቅላይ ሚኒስትር ዓብይ አህመድ (ዶ/ር) የሚመራው የብልፅግና መንግሥት የሠራዊት ግንባታ የሚወስኑ አዳዲስ ሰነዶችን ማዘጋጀቱን ጥናታቸው ይጠቁማል፡፡

የሰላምና ደኅንነት ጥናት ምሁሩ ዮናስ (ዶ/ር) በኢሕአዴግ ወቅት የነበረው የሠራዊት ግንባታ ሒደት ‘የአማፂ ቡድን ተዋጊን ወደ ብሔራዊ መከላከያ ሠራዊትነት የመቀየር (From a Kebele Army to a National Defence Force)’ ገጽታ እንደነበረው አመልክተዋል፡፡ የፖለቲካ ለውጥ በመጣ ማግሥት መከላከያውን ሪፎርም የማድረግ ጉዳይ ገፍቶ ቢመጣም፣ ነገር ግን የብሔርና የፖለቲካ ቡድን ሚዛንን ያላመጣጠነ ሠራዊት በመገንባቱ በሒደት በሠራዊቱ ውስጥ ጎራ ለይቶ መቆራቆስ እንደተፈጠረም አመልክተዋል፡፡

ይህ መከላከያውን ሪፎርም የማድረግ ጥረት ለውጥ አመጣ ቢባልም በሒደት ግን የግጭት ምንጭ ሲሆን መታየቱን እኚህ አጥኚ ብቻ ሳይሆኑ፣ የመከላከያ ባለሥልጣናቱና ጠቅላይ ሚኒስትሩም ጭምር ያመኑት ጉዳይ ነበር፡፡

‹‹የብሔር ፖለቲካ ቁርሾና የፖለቲካ ክፍፍል መጀመርያ ሰለባ ያደረገው እኛን ነው፤›› ሲሉ የተናገሩት የመከላከያ የሕዝብ ግንኙነት ኃላፊ ኮሎኔል ጌትነት፣ ይህ ለትግራይ ጦርነት መነሻ እነደነበር አስታውሰዋል፡፡

ጠቅላይ ሚኒስትር ዓብይ (ዶ/ር) በአንድ ወቅት በፓርላማ ሠራዊቱ ውስጥ ነበር ያሉትን ብሔርና ብዝኃነትን ያላመጣጠነ የአንድ ወገን የበላይነትን የተከተለ አደረጃጀት በስተመጨረሻ ፈንድቶ፣ አገሪቱን ለግጭት መዳረጉን በሰፊው መዘርዘራቸው የሚታወስ ነው፡፡

የኢፌዴሪ መከላከያ ሠራዊት ሕገ መንግሥታዊ መርሆዎችን ተከትሎ መገንባቱ ለረጅም ጊዜ ሲነገር ቢቆይም፣ ሕገ መንግሥቱን በሚቃረን ‹ቀዩ መጽሐፍ› የሚባል ዶክመንትን መሠረት አድርጎ መገንባቱን ዓብይ (ዶ/ር) አዲሱን የመከላከያ ስትራቴጂ ይፋ ሲያደርጉ ተናግረው ነበር፡፡

‹‹የመከላከያ ሠራዊት የኢትዮጵያን ህልውና የሚታደግና የሚጠብቅ እንጂ፣ የመጣው ፓርቲ ሁሉ የእኔ ዘብ የሚለው ሚሊሻ አይደለም፤›› በማለት ነበር ዓብይ (ዶ/ር) በዚሁ መድረክ ላይ አጠንክረው የገለጹት፡፡

ይህ ከተባለና የተሳካ የመከላከያ ሪፎርም ከተደረገ ጥቂት ዓመታት የተቆጠሩ ቢሆንም፣ በሒደት መከላከያውን አዳዲስ የፀጥታ ችግሮች እየፈተኑት ነው የሄዱት፡፡ በየክልሉ የፈነዱ ግጭቶች ጋብ ሳይሉ መቀጠላቸው መከላከያውን ዕረፍት በሌለው ተልዕኮ እየወጠሩት ነው፡፡ ከጎረቤት አገሮች ጋር በተያያዘ ያጋጠሙ የሉዓላዊ ድንበር ጥሰት ችግሮችን መከላከያው በቅጡ ሳይፈታ፣ ልክ እንደ ፖሊስና ሚሊሻ በየአካባቢው የሚፈጠሩ ግጭቶችን በማብረድ መወጠሩ ለመከላከያው ትልቅ ራስ ምታት እንደሆነ እየተነገረ ነው፡፡

ይህን ጉዳይ የተቋሙ አመራሮች ጭምር በግልጽ ያመኑ ሲሆን፣ ከሰሞኑ ለፓርላማው ቋሚ ኮሚቴ፣ ‹‹የፖሊስና የሚሊሻ ሥራ እየሠራን ነው፤›› የሚል አቤቱታ ሲያቀርቡ መደመጣቸው ይህንኑ አረጋግጧል፡፡

ይሁን እንጂ በመንግሥት ወገን መከላከያው በግጭት ማብረድ አዙሪት ተወጠረ የሚለው ስሞታ ገና ተቀባይነት ያገኘ አይመስልም፡፡ ጠቅላይ ሚኒስትር ዓብይ (ዶ/ር) የሚመሩት መንግሥት መከላከያው በግጭት ማብረድ ሥራ ከመወጠር ባለፈ፣ የሲቪል መንግሥቱን አስተዳደራዊ ሥራዎች ጭምር ተክቶ እንዲሠራ ያለውን ፍላጎት በተደጋጋሚ ሲገልጽ ነው የሚደመጠው፡፡

ዓምና በሚያዝያ ወር ዓብይ (ዶ/ር) ለሠራዊቱ ጄኔራል መኮንኖች የሰጡት ገለጻ በኢሕአዴግ ጊዜም ቢሆን ከዋና ዋና ከተሞች ውጪ ሲቪል መንግሥቱ ሳይሆን መከላከያው ሲያስተዳድር እንደኖረ ተናግረው ነበር፡፡ ‹‹በየቦታው ሽፍታን ማፅዳት እየተባለ ብዙ ቦታዎችን ሲያስተዳድር የነበረው መከላከያው ነው፤›› በማለት ነበር የተናገሩት፡፡

‹‹ቤጊ ላይ ኢሕአዴግ እያስተዳደረ እንዳልነበረ የማኅበራዊ ትስስር ሚዲያ እንደ ዛሬው ስላልነበረ አይነገርም፡፡ ኢሕአዴግ በዋና ዋና ከተሞች የተወሰነ ነበር፡፡ ጎጃም ላይ ሽፍታ እየተባለ ለዓመታት እየተለቀመ በርካታ ሰው አልቋል፡፡ መንግሥት ሳይሆን እንደ ዛሬው ያልተደራጀው መከላከያው ነበር ንቅናቄዎችን እየለቀመ ያስተዳድር የነበረው፤›› በማለትም አስረድተው ነበር፡፡

በኢሕአዴግ ዘመን በብዙ የአገሪቱ ክፍሎች የአስተዳደር ሥራዎችን የሚሸፍነው ሲቪሉ መንግሥት ሳይሆን ጦሩ እንደሆነ ጠቅላይ ሚኒስትሩ በአፅኖት አውስተዋል፡፡ ከዚህ በመነሳትም ዛሬ ላይ በየአካባቢው ሲሆን በሚመለከቱት ነገር እንዳይደናገጡ የጦሩን መኮንኖች አሳስበዋል፡፡ በአንድ አገር የሚመጣ የፖለቲካ ለውጥ አራት ዓይነት መልክ እንዳለው በዚሁ መድረክ ያስረዱት ጠቅላይ ሚኒስትሩ፣ በሠራዊት ደረጃ በኢትዮጵያ የተደረገውን ለውጥ ደግሞ ሦስት ዓይነት መልክ እንዳለው አብራርተዋል፡፡ አንደኛው ‘ቀዩን መጽሐፍ’ በመቀየር ተቋሙ አገር በሚመጥን አደረጃጀት እንዲዋቀር ማድረግ መሆኑን ገልጸዋል፡፡

መከላከያና ፖለቲካ የነበራቸውን ግንኙነት የመቀየር ሥራ በሁለተኝነት መሠራቱን አመልክተዋል፡፡ ‹‹ካድሬው የራሱን ሥራ ሳይሠራና ልማት ሳያመጣ በሙስና ሕዝብ እያሳቀቀና እየገደለ መከላከያ ላይ ተለጥፎ እንዲጨማለቅ መፍቀድ የለባችሁም፡፡ አጭበርባሪው ካድሬ ይሰርቃል መልሶ ኦሮሞ አማራ እያለ መጠቀሚያ ያደርጋል፡፡ እናንተ ክብራችሁን መጠበቅ አለባችሁ፤›› ሲሉ ዓብይ (ዶ/ር) ተናግረው ነበር፡፡

ሲቀጥሉም፣ ‹‹የትኛውም ካድሬ የእናንተን ሩብ አያህልም፡፡ በጭንቁ ጊዜ እናንተ ናችሁ ሕዝቡን ያያችሁት፣ የተዋጋችሁት፣ በቦቴ ውኃ ያጠጣችሁት፣ ካድሬው አይደለም፤›› በማለትም አስረግጠዋል፡፡ ስለሠራዊት የፖለቲካ ግንባታ ወደ መዘርዘር ሲገቡ ደግሞ ሙያዊነትና አገራዊ ውቅርን ታሳቢ ያደረገ የሠራዊት ግንባታ መንግሥታቸው እንደተከተለ ገልጸዋል፡፡

ጠቅላይ ሚኒስትር ዓብይ (ዶ/ር) ከጦሩ የወጡ በመሆናቸው ጭምር ለመከላከያ ሪፎርምና ለጠንካራ የሠራዊት ግንባታ ልዩ ትኩረት መንግሥታቸው ሰጥቷል የሚለው ከብዙ አቅጣጫ ይነሳል፡፡ ይሁን እንጂ በእሳቸው የሥልጣን ዘመን የተፈጠረው የግጭት መበራከት ጦሩን በግጭት እሳት ማጥፋት ሥራዎች የተወጠረ አድርጎታል የሚል አስተያየትም ይደመጣል፡፡ ይህ ሳያንስ ሠራዊቱ በየአካባቢው የሲቪል አስተዳደሩን ሥራ ተክቶ እንዲሠራ በከፍተኛ ባለሥልጣናት አይዞህ እየተባለ መበረታታቱ ሌላ አደጋ ሊጋብዝ እንደሚችል ነው አንዳንዶች ሥጋታቸውን እየገለጹ የሚገኙት፡፡ በየአካባቢው ሕዝባዊ ውይይቶችን እየመራ ያለውና የአንዳንድ አካባቢዎች አስተዳደራዊ ሥራን ተክቶ እየሠራ የሚገኘው መከላከያው በሒደት ሲቪል አስተዳደሩን ከጨዋታ ውጪ የሚያደርግ ዕርምጃ ወደ መውሰድ ቢገባስ የሚል ሥጋት ይሰማል፡፡

ይህ ደግሞ በሌሎች አገሮች የሚዘወተር የሲቪል አስተዳደሮች የግልበጣ ዜና በኢትዮጵያም እንዲሰማ የሚያደርግ ስለመሆኑ ሥጋት የሚገባቸው አሉ፡፡

spot_img
- Advertisement -

ትኩስ ጽሑፎች

ተዛማጅ ጽሑፎች

- Advertisement -
- Advertisement -