Friday, March 1, 2024
- Advertisement -
- Advertisement -
- Advertisement -

ፌርማታ ፅሁፎች

አዲሲቱ ጋዛ

ትኩስ ፅሁፎች

ሄዷል፤ ጊዜው ሞቷል፤

በእናትህ ማኅፀን፤ መንጋለል ይበቃል።

አንተ ፅንሱ ልጄ፤ ገስግስ ድረስልኝ፤

ናፍቄህ አይደለም፤ እኔ እምልህ ናልኝ፤

ጦርነት ነው እልቂት፤ አንተን እሚያስጠራኝ።

ሳታያት እንዳትቀር፤ ፈራሁኝ አገርክን፤

እኔ እንዳለምኩልህ፤ እንዳልሆነች ሳትሆን።

አገርህ ደርሶ አፈር አይደለችም ባህር ብቻ፤

ዕጣችንን ተንብያ፤ ያየች የሞቷን መባቻ።

አገርህ ሕዝብህ ናት፤

ቅረባት እወቃት፤

ፈንጂው ሳያፈርሳት።

ፍርስራሹን ሰውነት፤ ለመሰብሰብ ሳልሰቃይ

የጠፉትን ውብ ሰዎች፤ ንፁኃንን ለአንተ ላሳይ፤

አንተን የመሰሉ፤ ሕፃናት ያሏቸው

ከበረዶው የሬሳ ቤት፤ የሚያስመልጧቸው፤

እጓለ ሙውታን፤ በየውርጅብኙ ለጨዋታ ዘላይ

የሙጥኝ ያሉ ሕይወትን፤ በቀጭኗ ገመድ ላይ።

 

ከረፈደ ከዘገየህ፤

ላታምነኝ ትችላለህ።

ትላለህ አገሬ መሬት ናት

ሕዝብ የሌላት ያልነበራት።

እኛም እንመስልሃለን፤

እዚህ በወል ያልነበርን።

በድርብ ስደት ተሰቅይተን፤

በክፉ ዕጣችን አመፅን፤

በሰባ አምስት ዓመታት፤ በምሬቱ ተንገፈገፍን፤

ኑሯችን ጨርሶ ቢመክን፤

ተስፋችን ቢጠይምብን።

አውቃለሁ ሸክምህ ከመርግ ይገዝፋል፤

ልትቋቋመው ይከብዳል።

ይቅር በለኝ አባተትኩህ፤ አስቀጨነኩህ በፍርኃት፤

ምጤ ሆኖ እንደ እናት ሰስ፤ አውሬ እንዳስጨነቃት፤

ፈርቻለሁ ቢከቡኝ፤ ጅቦቹ ቢዞሩኝ፤

አድብተው ከጎሬ፤ ልጄን እንዳይነጥቁኝ።

እና ልጄ ክነፍ ብረር፤

ና ተወለድ ሩጥ ፍጠን፤

እንዳይበላኝ ፀፀት፤ እንዳይገለኝ ሰቀቀን።

ትናንትና ማታ፤ ተስፋ ማጣት አዛለኝ፤

ፀጥታ፤ ፀጥታ ይሁን አልኩኝ።

አሁን ይሄ ከእሱ ጋራ፤ እንዴት ብሎ ይገናኛል?

የልጄ ስስ ትንፋሽ፤ ከገዘፈው ወጀብ በምን ይማሰላል?

ግና ዛሬ ዳግም ፊት እንዳይ ተፈረደብኝ፤

ፀጥታዬን ሰብሬ፤ መርዶ ነጋሪ ሆንኩኝ፡

አጋዩት፤ በፈንጂ አደባዩት፤

የጋዛን ባፕቲስት ሐኪም ቤት።

ከአምስት መቶ ሰለባዎች ከሞቱት ከቆሳሰሉት

አንድ ሕፃን ልጅ ነበረ፤ ወንድሙን ፍለጋ እሚዋትት፤

ጭንቅላቱ ተገምሶ፣ የልጅ አናቱ ተበርቅሶ፤

ዓይኖቹን አፍጥጦ፣ እሚጣራ በደም ርሶ።

‹‹ወንድምዬ! እታይሃለሁ?›› እያለ በጣር ቢጣራም፤

ወንድሙን አያይም፤ እንደ አበደው ዓለም፤

ለሁለት ሰዓታት፤ አውግዞና ከሶ ከዚያ እንደሚተኛው፤

ኋላ እንደሚረሳው፤

ወንድሙን ይረሳል፤

እንዳያይ ይሆናል።

እኔ ምን አፍ አለኝ? አሁን ምን ልበለው?

ዕልቂትና ጥፋት እትማማች ናቸው።

ወዲህ አይጠረቁ፣ ወዲያም ብርቱ ሆነው፤

ይደቀድቁኛል እስኪንቀጠቀጡ ከናፍሬ ዝለው፤

እስኪንጠባጠቡ ተመሳሳይ ቃላት፤

ለአስክሬን ስያሜ ለሞተ ሰውነት።

በጦርነት ሰዓት፤ የቱንም ገጣሚ ፈፅሞ አትመኑት፤

ቀርፋፋ እንደ ዔሊ፤ ጉዞው ነው የዝግመት።

ከጥንቸልም የፈጠነን፤ የጭፍጨፋ እሳት ሰደድ፤

ላይሆንለት የሚከተል፤ ላይደርስበት የሚያሳድድ።

ዔሊው ሲሳብ ከጋት ስንዝር፤

ጥንቸል ሲዘል ከወንጀል ሠፈር፣ ወንጀል ሠፈር፤

ሲያዳርስ፤ አገሩን ሲያጥን፤

እስከ ኦርቶዶክስ ቤተ-ክርስቲያን፤

እግዜር እያየ እስካጋዩት

መስጊዱም ትቢያ ሲሆን፤ ዓይቶ በመጣው አምላክ ፊት።

እሱን አምነው ተጠልለው፤ መድኅን አገኘን ባሉበት።

የት ይሆን መድኅኑ፤ አዳኙ የት አለ?

በሰማያት ያለው አባት፤ አውሮፕላኑ ከሆነ።

አምሳያ የሌለው፤ ተተካካይ ተወዳዳሪ፤

ከገዳያችን ከእሱ በቀር፤ ከአውሮፕላኑ አብራሪ።

ሆኖም ተፍፃሜቱ የጥቃቱ፤

የእኛ መውደቅ ነው ከፊቱ።

መስቀል ላይ ነህ አሁን ልጄ፤ አንተን ይስፋህ አልልህም፤

አግዳሚና ወራጁ፤ ለነቢያቱ አይጠብም።

አምላክ ሁሉን ያውቃል፤

አንተና መሳዮችህ፤ ንፁኃን ፅንሶች ግና፤

ልታውቁት ይሆናል ገና።

  • (ገጣሚ ማርዋን ማክኹል – ተርጓሚ ሱራፌል ወንድሙ)
- Advertisement -
- Advertisement -

ተጨማሪ ለማንበብ

በብዛት የተነበቡ ፅሁፎች