Monday, February 26, 2024
- Advertisement -
- Advertisement -
ዜናየፍርድ ቤቶች ደመወዝ ካልተስተካከለ ሠራተኞችን ማቆየትም ሆነ አዳዲስ ባለሙያዎች ማግኘት እንደማይቻል የጠቅላይ...

የፍርድ ቤቶች ደመወዝ ካልተስተካከለ ሠራተኞችን ማቆየትም ሆነ አዳዲስ ባለሙያዎች ማግኘት እንደማይቻል የጠቅላይ ፍርድ ቤት ፕሬዚዳንት አስታወቁ

ቀን:

  • የዳኞችን የማኅበራዊ ሚዲያ አጠቃቀም የሚገዛ መመርያ እየወጣ መሆኑ ተገልጿል

በአሁኑ ወቅት ለፍርድ ቤቶች ሠራተኞች የሚከፈለው ወርኃዊ ደመወዝና የጥቅማ ጥቅም ክፍያ ካልተስተካከለ፣ ሠራተኞችን ማቆየትም ሆነ አዳዲስ ባለሙያዎች ለማግኘት አስቸጋሪ እንደሚሆን የጠቅላይ ፍርድ ቤት ፕሬዚዳንት አስታወቁ፡፡

የፍርድ ቤት ሠራተኞች ደመወዝና ጥቅማ ጥቅም በቂ ባለመሆኑ፣ በፍትሕ ሥራ ችግር ላይ የሚወድቅበት ደረጃ መድረሱን የጠቅላይ ፍርድ ቤት ፕሬዚዳንት አቶ ቴዎድሮስ ምሕረት ተናግረዋል፡፡

የሕዝብ ተወካዮች ምክር ቤት የሕግና ፍትሕ ጉዳዮች ቋሚ ኮሚቴ የፌዴራል ጠቅላይ፣ ከፍተኛና የመጀመሪያ ደረጃ ፍርድ ቤቶችን የ2016 በጀት ዓመት የአንደኛ ሩብ ዓመት ዕቅድ አፈጻጸም ሰኞ ኅዳር 10 ቀን 2016 ዓ.ም. ገምግሟል፡፡

- Advertisement -

Video from Enat Bank Youtube Channel.

በፍርድ ቤቶች ሊደረግ የታሰበውን ማሻሻያ ለማከናወን የሚያስፈልግ የሰው ኃይል መሳብም ሆነ አሁን በሥራ ላይ ያሉትንም ማቆየት የማይችልበት ደረጃ ላይ በመደረሱ፣ ‹‹ምክር ቤቱ የተለየ ድጋፍ ያድረግልን፤›› ሲሉ የጠቅላይ ፍርድ ቤት ፕሬዚዳንቱ ጠይቀዋል፡፡

ከመጀመሪያ ደረጃ ፍርድ ቤቶች በ2015 ዓ.ም. 248 ሠራተኞች መልቀቃቸውን ገልጸው፣ በተያዘው 2016 ዓ.ም. ሩብ ዓመት ብቻ 41 ሠራተኞች መልቀቃቸውን የፌዴራል መጀመርያ ደረጃ ፍርድ ቤት ፕሬዚዳንት አቶ ፉአድ ኪያር ለቋሚ ኮሚቴው ገልጸዋል፡፡

በመሆኑም በዚህ ዓይነት ሁኔታ ፍትሕ ፈላጊውን ኅብረተሰብ ማገልገል እጅግ ከባድ እንዳደረገው ጠቅሰው፣ ‹‹ምክር ቤቱ ዕገዛ ያድርግልን፤›› ብለዋል፡፡

አቶ ፉአድ ባለፉት ሁለት ዓመታት በመጀመሪያ ደረጃ ፍርድ ቤቶች ውስጥ የሚገኙ ሠራተኞች ካለባቸው የኢኮኖሚ ችግር በመነሳት በመንግሥት የተያዘውን የማዕድ ማጋራት ተግባር በመከተል፣ ቢያንስ በታችኛው ዕርከን ላሉ ሠራተኞች የዱቄትና ዘይት ድጋፍ መደረጉን ተናግረዋል፡፡

የጠቅላይ ፍርድ ቤት ፕሬዚዳንት አቶ ቴዎድሮስ በሦስት ወራት ዕቅድ አፈጻጸም ሪፖርታቸው እንዳብራሩት፣ በተያዘው ዓመት የዳኞችን የማኅበራዊ ሚዲያ አጠቃቀም ማሻሻልና መግዛት የሚያስችል መመርያ ለማውጣት ዕቅድ ተይዟል፡፡

በዚሁ የዳኞች የሥነ ምግባር ደንብ ውስጥ በማካተት የማኅበራዊ ሚዲያ አጠቃቀማቸውን የሚገዛ ድንጋጌ ለማውጣት መታሰቡን፣ የጠቅላይ ፍርድ ቤት ፕሬዚዳንቱ አስታውቀዋል፡፡

በተያዘው በጀት ዓመት በመንግሥት ውሳኔ መሠረት ለጠቅላይ ፍርድ ቤት ተጠሪ እንዲሆን የተደረገው የፍትሕና ሕግ ምርምር ተቋም፣ ግንኙነቱን በሕግ እንዲገዛ ለማድረግ የሚያስችል የአደረጃጀት ማስተካከያ እንደሚከናወን ገልጸዋል፡፡

በተጨማሪም በዚህ ዓመት መቶ በመቶ ጉዳዮች በግልጽ ችሎት ይከናወናሉ ያሉት የጠቅላይ ፍርድ ቤት ፕሬዚዳንቱ፣ የማስቻያ ቦታ ካልገደበ በቀር ዓመቱን ሙሉ በሙሉ ግልጽ ችሎት ለማከናወንና ቢያንስ ከአምስት እስከ ሰባት በሚደርሱ ችሎቶች ዘመናዊ የማስቻያ ቦታዎችን (Smart Court Room) እንዲኖሩ ለማድረግ ሥራ ተጀምሯል ብለዋል፡፡

በሦስቱ ፍርድ ቤቶች በበጀት ዓመቱ ይቀርባሉ ተብለው የሚጠበቁት መዝገቦች 213,659 ሲሆኑ፣ ከእነዚህ ውስጥ እልባት ለመስጠት የታቀደው 200 ሺሕ ለሚሆኑት ነው ተብሏል፡፡

spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ

የመጣንበትና አብረን የምንዘልቅበት የጋራ እሴታችን ለመሆኑ ነጋሪ ያስፈልጋል ወይ?

በኑረዲን አብራር በአገራችን ለለውጥ የተደረጉ ትግሎች ከመብዛታቸው የተነሳ ሰላም የነበረበት...

አልባሌ ልሂቃንና ፖለቲከኞች

በበቀለ ሹሜ በ2016 ዓ.ም. ኅዳር ማክተሚያ ላይ ፊልድ ማርሻል ብርሃኑ...

አሜሪካ የኢትዮጵያ የባህር በር ጥያቄ ተገቢነት ቢኖረውም ከጎረቤት አገሮች ጋር በሚደረግ ንግግር መሆን አለበት አለች

መንግሥትን ከፋኖና ከኦነግ ሸኔ ጋር ለማነጋገር ፍላጎቷን ገልጻለች የኢትዮጵያ የባህር...