Friday, March 1, 2024
- ማስታወቂያ -
- ማስታወቂያ -

በ30 ሚሊዮን ዶላር የተገነባው የመረጃ ቋት ማዕከል አገልግሎት መስጠት ጀመረ

ተዛማጅ ፅሁፎች

በ30 ሚሊዮን ዶላር በአይሲቲ ፓርክ ውስጥ የተገነባው የመረጃ ቋት ማዕከል (Data Center) አገልግሎት መስጠት መጀመሩን፣ ራክሲዮ ኢትዮጵያ የተሰኘ ተቋም አስታወቀ፡፡

ራክሲዮ የዳታና የደረጃ ሦስት አገልግሎት ሰጪ ገለልተኛ መረጃ ማዕከል በአዲስ አበባ በይፋ ሥራ ማስጀመሩን፣ ማክሰኞ ኅዳር 11 ቀን 2016 ዓ.ም. ባስመረቀበት ወቅት አስታውቋል፡፡

በምረቃ ሥነ ሥርዓቱ ላይ የሳይንስና ቴክኖሎጂ ሚኒስቴር የአይሲቲና ዲጂታል ኢኮኖሚ ሚኒስትር ደኤታ ይሽሩን ዓለማየሁ (ዶ/ር)፣ በኢትዮጵያ የፈረንሣይ አምባሳደር  ረሚ ማርቼክስ፣ እንዲሁም በኢትዮጵያ የአሜሪካ አምባሳደር ኧርቪን ማሲንጋ ተገኝተዋል፡፡

የዳታ ማዕከሉ አሥር ሺሕ ካሬ ሜትር ላይ በማረፍ በአንድ ዓመት ከስድስት ወራት ጊዜ ውስጥ ግንባታው መጠናቀቁን፣ የራክሲዮ ኢትዮጵያ ዋና ሥራ አስኪያጅ በዕውቀት ታፈረ ተናግረዋል፡፡

በኢትዮጵያ ለሚገነባው የዲጂታል ኢኮኖሚና ለመሠረተ ልማቶች ግብዓት መሆኑን በማሰብ መንግሥት በርካታ ድጋፎች ማድረጉን በመግለጽ፣ 95 በመቶ የሚሆኑ የመረጃ ማዕከሉ ዕቃዎች ከቀረጥ ነፃ መግባታቸውን አስረድተዋል፡፡

ራክሲዮ የአሜሪካ ኩባንያ የሆነው ሮሃ ግሩፕ ኢንቨስትመንት ኩባንያ አካልና በተለያዩ የአፍሪካ አገሮች በሚገኙ የንግድ ድርጅቶች ላይ የሚሠራ ተቋም ሲሆን፣ በምሥራቅና በደቡብ አፍሪካ የዳታ ማዕከል ሥራዎችን የሚያከናውን ነው ተብሏል፡፡

ማዕከሉ በ800 ራኮችና እስከ ሦስት ሜጋ ዋት የአይቲ ኃይል ደኅንነቱ በተጠበቀ የዳታ ማዕከል (Co-Location) አገልግሎት ለመስጠት፣ ለ24 ሰዓታት ያለ ማቋረጥ የሚሠራ የአይቲ መሠረተ ልማቶች ማዕከል ዝግጁ ማድረጉን አቶ በዕውቀት ገልጸዋል፡፡

አገልግሎቱ በአዲስ አበባ መጀመሩ ለራክሲዮና ለአገሪቱ በዲጂታል መሠረተ ልማት ረገድ መሠረት የሚጥል በመሆኑ የንግድ ድርጅቶቻችንና የመንግሥት ተቋማትን የሥራ እንቅስቃሴ የሚያፋጥን፣ እንዲሁም አኅጉራዊና ዓለም አቀፍ አገልግሎትና የይዘት አቅራቢዎችን ወደ ኢትዮጵያ ለመሳብ አጋዥ እንደሚሆን ጠቁመዋል፡፡

ራክሲዮ ኢትዮጵያ የአገሪቱ አንደኛው የግንኙነት ማዕከል ሆኖ በማገልገል የተለያዩ አገራዊና ዓለም አቀፍ አካላት እርስ በርስ በማስተሳሰር፣ በቅርበት መረጃ የሚለዋወጡበት የኢኮ ሥርዓት (Eco System) እንደሚያቀርብ አስረድተዋል፡፡

አንዱን ከሌላው ጋር ለማስተሳሰር የሚረዳውን የተለያዩ አገልግሎቶች የዳታ ፍሰትን ሙሉ በሙሉ በአገር ውስጥ በማድረግ፣ የአገልግሎቱ ተጠቃሚ ድርጅቶች ለኢንተርኔት አገልግሎት የሚያወጡትን ወጪ ለመቀነስ ያግዛል ሲሉ ዋና ሥራ አስኪያጁ አብራርተዋል፡፡

የራክሲዮ ግሩፕ ዋና ሥራ አስፈጻሚ ሮበርት ሙሊንስ በበኩላቸው፣ የራክሲዮ ማዕከል ዲዛይንና የመሣሪያ ምርጫዎች ከአገሩ የአካባቢና የአየር ንብረት ሁኔታዎች ጋር የተጣጣመ ነው ብለዋል፡፡

በአይሲቲ ፓርክ ውስጥ አራት የተለያዩ ኩባንያዎች የመረጃ ቋት ማዕከል እየገነቡ እንደሆነ የሚታወቅ ሲሆን እነሱም ሳፋሪኮም ኢትዮጵያ፣ ኢትዮ ቴሌኮም፣ ዊንጎና ራክሲዮ ናቸው፡፡

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች