Monday, February 26, 2024
- ማስታወቂያ -
- ማስታወቂያ -

በመጀመሪያ ሩብ ዓመት 262 ሜትሪክ ቶን ምርቶች ጥራታቸው በመጓደሉ ወደ አገር ውስጥ እንዳይገቡ ተደርገዋል ተባለ

ተዛማጅ ፅሁፎች

በ2016 ዓ.ም. የመጀመሪያው ሩብ ዓመት ከደረጃ በታች ወይም ጥራታቸውን ያልጠበቁ 262.14 ሜትሪክ ቶን የሚሆኑ ምርቶች ወደ አገር ውስጥ እንዳይገቡ መታገዳቸውን፣ የንግድና ቀጣናዊ ትስስር ሚኒስቴር ገለጸ፡፡

የ2016 ዓ.ም. የመጀመሪያው ሩብ ዓመት ክንውን መሠረት ከውጭ ወደ አገር ውስጥ የሚገቡ ምርቶችን ጥራት ለማረጋገጥ በተከናወነው ሥራ፣ ጥራት የሌላቸውን ምርቶች ወደ አገር ውስጥ እንዳይገቡ መደረጉን የንግድና ቀጣናዊ ትስስር ሚኒስቴር ሪፖርት ያመለክታል፡፡

በሪፖርቱ መሠረተ በመጀመሪያ በሩብ ዓመት ብቻ 649,383 ቶን የተለያዩ ምርቶችን ደረጃ ለማረጋገጥ ታቅዶ፣ ለ992,287 ቶን ምርቶችን ማረጋገጥ መቻሉ ተገልጿል፡፡

በተደረገው ማረገገጥ በተለያዩ ምክንያቶች ከደረጃ በታች የሆኑ 262.14 ሜትሪክ ቶን ምርቶች ወደ አገር ውስጥ እንዳይገቡ ዕግድ መደረጉን ሪፖርቱ ያመለክታል፡፡

የገቢ ምርቶችን ጥራት ማረጋገጥ በአሥር የምርት ዓይነቶችና በሌሎች አስገዳጅ ደረጃ በሌላቸው ምርቶች ላይ ቁጥጥር የተደረገ መሆኑን፣ በዚህ መሠረት ለ2,647 ምርቶች ከተደረገው የጥራት ማረጋገጫዎች ውስጥ ስምንቱ መሥፈርታቸውን አለማሟላታቸው ተገልጿል፡፡

ከእነዚህ ውስጥ ለምግብ ውጤቶች በተሠራው የደረጃ ቁጥጥር አራት፣ ለኬሚካል ውጤቶች ሁለት፣ ለግንባታ መሣሪያዎች አንድ፣ ለአሌክትሪክ ዕቃዎች አንድ፣ በአጠቃላይ ስምንት ዓይነት ምርቶች ከደረጃ በታች ሆነው መገኘታቸው ሪፖርቱ ያመላክታል፡፡

ከደረጃ ጥራት ጋር በተገናኘ ከውጭ አገር ወደ አገር ውስጥ የሚገቡ ምርቶችን የጥራት ደረጃ ከመከታተል በተጨማሪ፣ በአገር ውስጥ የሚገኙ ፋብሪካዎች ላይ የሚደረገው ቁጥጥር ይገኝበታል፡፡

ከዚህ ቁጥጥር የሚደረግባቸው 390 ፋብሪካዎች የጥራት ደረጃቸው ሲረጋገጥ እንደነበር፣ በ2016 ዓ.ም. በመጀመሪያ ሩብ ዓመት ግን 410 ፋብሪካዎች የጥራት ደረጃቸውን ለማረጋገጥ መታቀዱን ሪፖርቱ ያመለክታል፡፡

በዚህ መሠረት ቁጥጥር ከተደረገባቸው ፋብሪካዎች መሀል ስድስቱ የምርት ጥራታቸው ከደረጃ በታች መሆኑ በተደረገው ክትትል ተረጋግጧል ተብሏል፡፡

በሪፖርቱ መሠረት በሩብ ዓመቱ በአዳዲስ የደረጃዎች ዝግጅት ላይ የተከናወነው ሥራ አፈጻጸሙ ከ100 ፐርሰንት በላይ መሆኑ በሪፖርቱ ተገልጿል፡፡

ሚኒስቴሩ የአገልግሎት አሰጣጥን፣ የአሠራር ማሻሻያዎችንና ቅንጅታዊ ሥራዎችን ለማሳደግ፣ የፖሊሲና የሕግ ማዕቀፍ ማሻሻያና ዝግጅት ሥራ መከናወኑን ሪፖርቱ ይጠቁማል፡፡

በዚህም መሠረት የንግድ ፖሊሲ፣ የብሔራዊ የጥራት ፖሊሲና የቁም እንስሳት ፖሊሲ ተዘጋጅቶ ለፕላንና ልማት ሚኒስቴር መቅረቡ በሪፖርቱ ተገልጿል፡፡

የኢትዮጵያ ደረጃዎች ረቂቅ አዋጅና የሕጋዊ ሥነ ልክ ረቂቅ አዋጅን ጨምሮ፣ ሦስት እንደ አዲስ የሚዘጋጁ የተቋማት ማቋቋሚያ አዋጅና ደንብ ለጠቅላይ ሚኒስትር ጽሕፈት ቤት መቅረባቸው በሪፖርቱ ተካቷል፡፡  

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች