Saturday, July 20, 2024
- Advertisement -
- Advertisement -
እኔ የምለዉብናረፍድም ድርድርና ሰጥቶ መቀበልን መሸሽ አያዋጣም

ብናረፍድም ድርድርና ሰጥቶ መቀበልን መሸሽ አያዋጣም

ቀን:

በአመሐ ኃይለ ማርያም

‹‹የታሪክ ዓላማው ሕዝብ ያለፈውን ዘመን ከፍታና ዝቅታ አስታውሶ፣ የአሁኑ ትውልድ ካለፈው ትውልድ በጎ ጎኖች ትምህርት ወስዶ፣ ከችግሮቹ ተምሮ በኑሮው መሻሻል እንዲያሳይ ማድረግ ነው፤›› ነፍሰ ኄር ፕሮፌሰር መስፍን ወልደ ማርያም፡፡

እንደ መግቢያ

ታዋቂውና ዝነኛው የጥንቱ የቻይና ሊቅ ሰን ዡ (Sun Tzu) በ“የጦርነት ጥበብ” (The Art of War) መጽሐፉ ከጻፈው ጠቅሼ ብጀምር የሚሻል መስለኝ፡፡ “Know the enemy and know yourself in a hundred battles you will never be in peril. When you are ignorant of the enemy but know yourself, your chances of winning or losing are equal. If ignorant both of your enemy and of yourself, you are certain in every battle to be in peril.” በደምሳሳው ትርጉሙ ‹‹ጠላትህን (ይቃወመኛል የምትለውን) የምታውቅ ከሆነ፣ ደግሞም ራስህን የምታውቅ ከሆነ የግጥሚያ ውጤት ከቶም አያጠራጥርም፡፡ ሆኖም ራስህን ብቻ አውቀህ ጠላት ነው (ተቃዋሚ ነው) የምትለውን የማታውቅ ከሆነ አሸነፍኩ ባልክ ቁጥር ሽንፈት ያጋጥምሃል። ከዚህ ውጪ ግን ራስህንም ጠላቴ (ተቃዋሚዬ የምትለውን) የማታውቃቸው ከሆነ በገጠምክ ቁጥር ሽንፈት ዕጣ ፈንታህ ይሆናል፤›› ይላል፡፡

ኢትዮጵያም ሆነ በዓለም አቀፍ ደረጃ ብዙዎችን ከሚያግባቡ ጉዳዮች መካከል አንዱ፣ ከትናንት ስህተቶች ለመማር አለመፈለግ ሊያስከትል የሚችለው ጦስ ነው፡፡ ብዙዎች እንደሚስማሙበት ትናንት የተፈጸሙ ስህተቶች ኢትዮጵያን ከማሽመድመድ አልፈው፣ ለዘመናት ቁስሉ የማይሽር ደዌ ተክለውባት አልፈዋል፡፡ የዚህ ዘመን ትውልድ የራሱ ተግዳሮቶች ሳይበቁት፣ ከትናንት በተላለፉ የታሪክ ዝንፈቶችና ትርክቶች ምክንያት ከባድ ዋጋ እየከፈለ ነው፡፡ በዚህ የሠለጠነ ዘመን የቀድሞ ስህተቶችን በማረም በልማትና በዕድገት ወደፊት መራመድ የሚገባት ኢትዮጵያን ተባብሮ መገንባት ሲገባ፣ አሁንም እዚያው የጦርነት ጉሰማና የመተላለቅ ድግስ ውስጥ መገኘት ያሳዝናል፡፡ ልዩነትን በሕጋዊና በሰላማዊ መንገድ የማስተናገድ ባህል መገንባት እየተቻለ፣ የንግግርና የድርድር አማራጮችን ገፍቶ የዕልቂትና የውድመት ጎዳናን መያዝ ያስደነግጣል፡፡ ግጭቶች ከመከሰታቸው በፊትም ሆነ በኋላ በባህላዊ ዘዴዎች የመፍታት በርካታ ልምዶች ያሉባት አገር ውስጥ፣ እነዚህን ዘመን ተሻጋሪ እሴቶች ወደ ጎን በማለት እየተገባበት ያለው የጥፋት መንገድ ከታሪክም ሆነ ከቅርብ ጊዜ ስህተቶች ለመማር አለመፈለግን ፍንትው አድርጎ ያሳያል፡፡ የአገር ጉዳይ ግድ ይለናል የምትሉ ሁሉ አስቡበት፡፡

እንደሚታወቀው የአገራችን ፖለቲካ ድርድርና ሰጥቶ መቀበልን አስወግዶ የፍጥጫና የንትርክ መድረክ ከሆነ ከሦስት አሥርት ዓመታት በላይ ነጉደዋል፡፡ በኢትዮጵያ ፖለቲካ ውስጥ ‹‹ተቀናቃኝነት›› የሚባለው ጽንሰ ሐሳብ ‹‹ጠላትነት›› በሚባለው ተለውጦ ለያዥ ለገናዥ እያስቸገረ ነው፡፡ ስለዴሞክራሲያዊ ሥርዓት ግንባታ ነጋ ጠባ የሚሰብኩ ፖለቲከኞቻችን ስለድርድርና ሰጥቶ መቀበል በሰከነ መንገድ ለመነጋገር ካለመፈለጋቸውም በላይ የሚተያዩት እንደ አባት ገዳይ ነው፡፡

ብዙ ጊዜ በሰከነ መንገድ በመነጋገር በሐሳብ ልዩነቶች ላይ ከመከራከር ይልቅ ትኩረት የሚደረገው በሰዎች ላይ ነው፡፡ ማንነትን የሚፈታተኑና ሰብዕናን የሚገዳደሩ ስድቦችን በመጠቀም አላስፈላጊ ድርጊቶች ይፈጸማሉ፡፡ ከቅርብ ጊዜ ወዲህ አገርንና ድርጅትን ወይም ግለሰብን መለየት እስኪያቅት ድረስ ጥላቸው ፈሩን ስቶ ሄዷል፡፡ ገዥው ፓርቲ ባላንጣዎቼ የሚላቸውን ‹‹ፀረ ሕዝቦች›› በማለት ሲፈርጅ፣ የእሱ ተቃራኒ የሆኑት ደግሞ ‹‹የአገር ጠላት›› ይሉታል፡፡ እነዚህን ሁለት ጫፍ የደረሱ ጽንፎችን የበለጠ በመወጠር አየሩን በጥላቻ እየሞሉት ነው፡፡

ብልፅግናን መንግሥት በጨረፍታ

የብልፅግናን መንግሥት የታሪክና የማኅበራዊ ሳይንስ ሊቃውንት ነገ ሲተነትኑት፣ “ዘመነ መሣፍንት ዳግማዊ” የሚሉት ይመስለኛል። በአገር ደረጃ ወደፊት መራመድ ራሱ ከባድ መሆኑን ይኸው የምታዩት ነውና።

የኢትዮጵያን ነገረ-ፖለቲካ በቅርበት የሚከታተሉ የአገር ውስጥና የምዕራቡ ዓለም ምሁራን የድኅረ ዓብይ አህመድ (ዶ/ር)፣ ኢሕአዴግ/ብልፅግና ፖለቲካዊ ማሻሻያዎችን ያደርጋል ብለው በተስፋ ቢጠብቁም ከታሰበው በተቃራኒ መንገድ ሲጓዝ እየታየ ነው። ተራማጅ የፖለቲካ ሐሳብ ያረጠበት ይመስላል። የአገዛዙን ምሰሶ ለማጥበቅ ሲባል ሕገ መንግሥታዊ ድጋፍ የሌላቸውን የፖለቲካ ሹመቶች በመንግሥታዊ መዋቅር ከመሰግሰግ ጀምሮ፣ በፓርቲና በመንግሥት መሀል ፍፁም ልዩነት የለሽ አሠራሮችን አጠንክሮ መጓዝን መፍትሔ አድርጎ ይዞታል።

በአራት ነጥብ ግትር አቋም የታጠረው የብልፅግናን መንግሥት የፖለቲካ ተቋማት የፖለቲካ ብዝኃነትን እንዲያስተናግዱ ምቹ መደላድል ከመፍጠር ይልቅ፣ የአንድ ፓርቲ ፍፁም የበላይነት የሚንፀባረቅባቸው ተቋማት እንዲሆኑ አድርጓል። የዴሞክራሲ ሥርዓት የግድ የሚለውን የፖለቲካ ብዙኃነት በኢትዩጵያ የፖለቲካ ተቋማት ላይ የቀበረው ብልፅግና የቁልቁለት ጉዞውን ተያይዞታል።

የዴሞክራሲ ተቋማት የገዥው ፓርቲ ምርኩዝ ከመሆን አልፈው የአድርባይነት ጉምቱ ምሳሌ ሆነዋል። በአገሪቱ የሙስና መበራከት ዜጎች “መንግሥት” በሚባለው አካል ላይ እምነት እንዲያጡ አድርጓቸዋል። የፖለቲካ ነፃነት፣ የማኅበራዊ ፍትህና ሌሎች ሕገ መንግሥታዊ የመብት ጥያቄዎችን ኃላፊነት በሚሰማው መንገድ ማስተናገድ የተሳነው ስብስብ ለሕዝባዊ ጥያቄዎች እስር፣ እንግልት፣ ስቅይትና፣ ግድያን እንደ ብቸኛ መፍትሔ አድርጎ ይዞታል።

የቀድሞው ጠቅላይ ሚኒስትር አቶ መለስ ዜናዊ አንዴ በሆነ አጋጣሚ ከተናገሩት የማስታውሰው፣ ‹‹በሩም መስኮቱም ከተዘጋ ሕዝቡ ግድግዳውን ሰብሮም ቢሆን ይወጣል፤›› ነበር ያሉት። ቃል በቃል መጥቀሴ ሳይሆን መንፈሱ ይኸው ነበር። ዛሬ በመላው ኢትዮጵያ የሚታየው ቃል በቃል ይኸው መሆኑ የሚያከራክር አይመስለኝም። በምድር ላይ የሚታየው ማስረጃ ይኸው ነው። በሰነዶች ላይ የሚታየው ይኸው ነው። ተቃዋሚዎች፣ መንግሥት አክራሪ ወይም አሸባሪ የሚላቸውም የሚናገሩት ይህንኑ ነው። አገራዊና ዓለም አቀፍ የሰብዓዊ መብት ተሟጋች አካላትም የሚሉት ይህንኑ ነው። ጠቅላይ ሚኒስትር ዓብይ (ዶ/ር) በተደጋጋሚ በሚያደርጉት ንግግር የሚሉት መንፈሱ ሲነጠር ይህንኑ ይመስላል።

ዛሬ በአገሬ በኢትዮጵያ ያለው በግሪክ ተረታ-ተረት (Mythology) ያለውን የፓንዶራን ሙዳይ (Pandora Box) ያስታውሰኛል። አማልክት እንደ ምርቃት/እርግማን ሙዳይዋን በዓለም ላይ በሚገኙ ክፋቶችና ተስፋ ሞልተው ለፓንዶራ ይሰጣታል። ፓንዶራ ቸኩላ ስትከፍተው ክፋቶቹ ሁሉ በረው ወጡና ዕቡይ (አሉታዊ) ሥራቸውን ተያያዙት። በዚህ የብልፅግና አዲስ የመንግሥት አወቃቀሩንና ሕገ መንግሥቱ ያደረገው የፓንዶርን ሙዳይ እንደ መክፈት መስሎ ይታየኛል። አንድ የሚያፅናናኝ ነጥብ ቢኖር ሙዳዩ ውስጥ አሁንም ተስፋ አለ። ብልፅግና ብርታትን፣ ቅንነትን፣ “ለጋራ ቤታችን” ዘላቂነትን የሚፈልግ ቢሆን ይህችን ሙዳይዋ ውስጥ የተረፈችውን ተስፋ አውጥቶ ተግባር ላይ ማዋል ብቻ ነው። ምርጫውም አንድ ብቻ ነው፡፡ እሱም የጉልበት መንገድን እርግፍ አድርጎ ትቶ በእኩልነት ተቀምጦ መደራደርና ዘለቄታ ያለው ሰላም ማስፈን ነው፡፡

ተቃዋሚ ፓርቲዎችን በወፍ በረር

ተቃዋሚ ፓርቲዎች በሕዝቡ ዘንድ እየተረሱ ነው የሚባል ነገር ይደመጣል፡፡ እንዲህ ዓይነቱ አዝማሚያ ካለ ይኼ ለአገር የሚበጅ አይደለም፡፡ ሁሌም እንደሚባለው ከ120 ሚሊዮን ሕዝብ በላይ ባላት አገር ውስጥ መቼም ቢሆን አንድ አስተሳሰብ ገዥ ሊሆን አይችልም፡፡ የተለያዩ ፍላጎቶችና ስሜቶች ባሉበት አገር ውስጥ አማራጭ ሐሳቦች መቅረብ አለባቸው፡፡ ሕዝቡ ዘንድ መድረስ ያለባቸው አማራጮች ደግሞ በሚገባ ውይይት ተደርጎባቸው ለሕዝቡ ውሳኔ መቅረብ አለባቸው፡፡ ይኼ ኃላፊነት ደግሞ አማራጭ አለን የሚሉ ፓርቲዎች ነው፡፡ በረባ ባልረባው ጉዳይ ጊዜያቸውን ከሚያጠፉ ሕዝብ ዘንድ የሚደርሱበትን መላ ማፈላለግ አለባቸው፡፡ ከተጨባጭ ሁኔታዎች ጋር ራሳቸውን እያዛመዱ ወቅቱን የሚመጥን ነገር ይዘው መቅረብ ካልቻሉ ጥፋቱ የራሳቸው እንጂ የማንም ሊሆን አይችልም፡፡ ‹‹የገዥው ፓርቲ አጃቢ መሆን ስለማንፈልግ  ምርጫ አንሳተፍም፤›› የሚሉ ፖለቲከኞች ጤነኞች መሆናቸውም ያጠራጥራል፡፡ የቤት ሥራቸውን ሠርተው ማቅረብ ሲሳናቸው አጉል ሰበብ የሚደረድሩ ያስመስልባቸዋል፡፡  አንድ የተቃዋሚ ፓርቲ የፖለቲካ ምኅዳሩ ፍትሐዊም ሆነ አልሆነ ሥርዓቱን ለመፈተን መታገል አለበት፡፡

ተቃዋሚ ፓርቲዎች ራሳቸውን በሚገባ ሊፈትሹ ይገባል፡፡ በአሁኑ ተጨባጭ ሁኔታ ሕዝብ ከእነሱ ጋር ያለ አይመስልም፡፡ በቅርቡ አንድ ጋዜጣ ላይ ሳነብ የአንድ ተቃዋሚ ፓርቲ መሪ፣ ‹‹ሕዝቡ የብልፅግናን መንግሥት በመጥላቱ ድጋፉ ለእኛ እንደሆነ እናውቃለን  አሉ፤›› ምኞታቸው ጥሩ ነው፡፡ ነገር ግን እሳቸው እዚህ ድምዳሜ ላይ የደረሱት ምን ዓይነት ጥናት ሠርተው ነው? ከየት ከየት ክልሎችና አካባቢዎች ናሙናዎችን ወስደው መርምረዋል? ምን ያህል ሕዝብስ አነጋግረዋል? በአጠቃላይ የእሳቸውን ድምዳሜ ለመቀበል የሚያስችል ተጨባጭ መረጃ አለ ወይ? ይህንን ጥያቄ የማነሳው በግምት ወይም በነሲብ የሚቀርቡ መላምቶችን መቀበል ስለማይቻል ነው፡፡ ‹‹የጠላቴ ጠላት ወዳጄ ነው›› በሚለው ሥሌት ቢኬድ እንኳ ሕዝባችን፣ ‹‹ከማያውቁት መልዓክ የሚያውቁት ሰይጣን ይሻላል፤›› እንደሚል ልብ ማለት ያስፈልጋል፡፡ በጨበጣ ጋዜጣዊ መግለጫ ሕዝብን ማታለል ወይም ራስን ማሞኘት ውጤት የለውም፡፡ እንዲህ ዓይነቱ ግራ የገባ ጉዳይ ደግሞ የአገራችን ፖለቲካ ትክክለኛው መገለጫ ሆኗል፡፡

በጭፍን የሚሰጥ ተቃውሞ የአገራችን ጽንፈኛ ፖለቲካ የወለደው አጉል ተግባር ነው፡፡ በምክንያታዊነት ላይ ተመሥርቶ መሬት የረገጠ እውነትን እየሸሹ ለዓመታት በሚንከባለለው ጥላቻ ላይ ብቻ ማተኮር ዋጋ የለውም፡፡ ድርድርና ሰጥቶ መቀበል የጊዜያችን ዓለም አቀፋዊ ልምድ ሆኖ እያለ ባልተጨበጠ ሁኔታ በጠላትነት መፈራረጅ ለማንም አይጠቅምም፡፡ ስለዴሞክራሲ እየደሰኮሩ ከዚያ በተቃራኒ ፀብና ዱላ ቀረሽ ስድብ ውስጥ መግባት ኋላቀርነት ነው፡፡ የድርድር ፖለቲካ ዋነኛ ጥቅሙ ሁለቱም ወገኖች አሸናፊ ሆነው እንዲወጡ በማድረጉ ነው፡፡ አንደኛው እጅ ጠምዛዥ ሌላው ተጠምዛዥ የሚሆኑበት አካሄድ ሥልጡን ፖለቲካ ሳይሆን አምባገነንነት ነው፡፡ የኢትዮጵያ ተቃዋሚ ፖለቲከኞች በመጀመሪያ ደረጃ ውስጣቸውን መፈተሽ ይኖርባቸዋል፡፡ ውስጣቸውን ሳያፀዱና ችግሮቻቸውን ሳይነቅሱ የሚጓዙበት መንገድ መድረሻው ውድቀት ነው፡፡

እንደ መውጫ

አገሪቱ ለገባችበት የፖለቲካ ቅርቃር ወታደራዊ ዕርምጃ ሳይሆን ፖለቲካዊ መፍትሔ ያሻታል። የኢትዮጵያ ፖለቲካ ልሂቃኑ በብቸኝነት የያዙት መሆኑ ለክርክር የሚቀርብ ጉዳይ አይደለም። ‹በልሂቃን የበላይነት ተጠፍንጎ የተያዘውን የፖለቲካ ተሳትፎ፣ የፖለቲካ ተሳታፊነት መብት የበርካታ የአገሪቱ ዜጎች መብት ማድረግ ይገባል› የሚለውን የተቺዎች ምልከታ እያሰመርንበት አፋጣኝ ጊዜያዊ መፍትሔ ከመሻት አኳያ፣ የአገሪቱ ልሂቃን በሰከነ መንገድ መወያየት ይኖርባቸዋል። ኢትዮጵያ ብለን የምንጠራት አገር እንድትሰነብት ከተፈለገ የምሁራን ሚና ጎልቶ ሊወጣ ይገባል። ጉዳዩ የአገር ህልውና መቋጠሪያ ውል ነውና ከጠባብ ልሂቅነት ሰፋ ያለ አገራዊ ምልከታ ማንሳት ተገቢ ነው። በእርግጥ ምሁራዊ ዋጋ በሚጠይቁ ጭብጦች ላይ ለመናገርና ለመወያየት ብሎም ለመጻፍ አለመፍቀድ የገዥው ፓርቲ ምሁር ጠል ፖሊሲ ውጤት ነው። ግና ይህን መሰል አፍራሽ የፖለቲካ መስመር ለመግራት ምሁራዊ ዓይናፋርነትን መግፈፍና እውነት ላይ ቁሞ በእውነት ስለእውነት መናገር፣ ‹ሳይማር ያስተማራችሁ› ሕዝብ ውስጣዊ መሻት ነው። መቼም በዚህ ጊዜ እንደ ንጉሡ ዘመን ለሥርዓት ለውጥም ሆነ ለአገራዊ ፈተናዎች መለኮታዊ ጣልቃ ገብነት መጠየቅ አዋጪነቱ አይታየኝም። የልሂቃኑ ሚናም ወሳኝነቱ ከዚህ አንፃር ነው።

የጥቅመኝነት ፖለቲካን በመሻገር ይህችን የበደል ቋት አገር እንደ አገር የሚያሰነብታትን ረብ ያለው የፖለቲካ ሐሳብ ወደ አደባባይ ማውጣት በዘመን የተፈተነ የአገር ጥሪ ነው። ዋጋ ባለው መንገድ አቻቻይ የፖለቲካ ሐሳብ ማፍለቅ አገርና ትውልድ ለልሂቃኖቻችን የጣሉት ኃላፊነት ሆኗል። መፍትሔው በዘገየ ቁጥር ግን ፖለቲካዊ መብቃት ላይ ያልደረሱ ብላቴኖች ሕግንና ፍርድን በእጃቸው ጨብጠው ጎዳናው ላይ እየተዋደቁ መቀጠላቸው አይቀሬ ነው። ከብላቴኖቹ ፍርካሽ ጭንቅላት ጀርባ የነገዋን ኢትዮጵያ መሰንበት መጠራጠር ተገቢ ነው።

በሌላኛው ጫፍ ከሕዝብ ጋር ደም እየተቃባ ያለው ገዥው የብልፅግና ፓርቲ  ነገን አሻግሮ ማየት ግድ ሊለው ይገባል። በዓለም ታሪክ ሕዝብን ገድሎም ሆነ አስሮ የጨረሰ አገዛዝ አልታየም። ከገዳዮች ቁጥር በላይ ለመሞት የተዘጋጀው ሕዝብ ይበልጣል። ከውልደቱ እስከ ሞቱ ድረስ በውጣ ውረድ የታጀበው ደርግ መቃብሩን የቆፈረው በገዛ እጁ ነው። ደርግ የሻዕቢያንና የሕወሓትን የገጠር ሽምቅ ውጊያ መቋቋም ተስኖት የወደቀው አንዳች ሕዝባዊ ቅቡልነት ስላልነበረው እንጂ በሸማቂዎቹ ብርታት አልነበረም። ማኅበራዊ መሠረቱን አጥብቦ፣ አጥብቦ… ባዶ እጁን የቀረው ገዥው የብልፅግና መንግሥት ጠመንጃን የብቻ መተማመኛ አድርጎ እስከምን ድረስ ይዘልቃል?!

ዛሬም የኢትዮጵያን ፖለቲካ በተሻለ መንገድ የማዘመን ዕድል በገዥው ፓርቲ  እጅ ላይ ነው። ለታሪክ የሚበቃ ዕድል እጁ ላይ ያለው ገዥው ፓርቲ ሥልጣን እስከ መቃብር ከሚለው የድርጅት ቀኖና ተሻግሮ ነገን ቢመለከት ለዚህች መከረኛ አገር ይበጃል (ከውስጣዊ ቀውስ መሻገር እንደ አገር ብቻ ሳይሆን ቀጣናዊ ትሩፋቱን ከገዥው ፓርቲ በተሻለ ማን ይረዳዋል?)፡፡ የብሔራዊ ዕርቅ መድረክ እንዲመቻች፣ የፖለቲካና የህሊና እስረኞች እንዲፈቱ፣ በአሸባሪነት ለተፈረጁም ሆነ ላልተፈረጁ የትጥቅ ትግልን እንደ አማራጭ ለያዙ ኃይሎች የሰላም ጥሪ ማድረግ፣ ወዘተ. ብሎም የብሔራዊ አንድነት መንግሥት ለማቋቋም የሚያስችሉ ፖለቲካዊ መደላድሎችን መፍጠር የገዥው ፓርቲ የመጀመሪያም የመጨረሻም በጎ ዕርምጃ ነው። ይህን ከማድረግ ይልቅ በማናህሎኝነት የትምክህት መንገድ ከሕዝብ ጋር ደም መቃባቱን ‹ግፋ በለው!› የሚል ከሆነ፣ የቁርጡ ቀን ሲመጣ በማልኮም ኤክስ አንደበት “The Chickens are Coming Home to Roost” በሚል “You are welcome!” ለማለት ዝግጁ ነን።

ይህችን ጽሑፍ በማዘጋጅበት ውድቅት ሌሊት “It is Dangerous to be Right When the Government is Wrong” ወይም ‹‹መንግሥት ሲሳሳት ትክክል መሆን አደገኛ ነው›› የሚለው ፍርኃት አዘል ምክር በአዕምሮዬ ይመላለስ ነበር። ግና የኢትዮጵያ ነገ የተሸከመው መዓት ከባድ ነውና እየመጣ ያለውን የበዛ መከራ መጠቆምም ሆነ ከሞት በመለስ መውጫ ጫፎችን ማሳየት ትውልዳዊ ጥሪ ነው። ይህችን ምክር ለማይቀበሉ የገዥው መደብ ልሂቃን ግን ወዮ ለዚያች ቀን እላለሁ፡፡

ከአዘጋጁ፡- ጸሐፊው ነዋሪነታቸው በሰሜን አሜሪካ ሲሆን፣ ጽሑፉ የእሳቸውን አመለካከት ብቻ የሚያንፀባርቅ መሆኑን እንገልጻለን፡፡

spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ

አቶ ሰብስብ አባፊራ የኢትዮጵያ ንግድና ዘርፍ ማኅበራት ምክር ቤት ፕሬዝዳንት ሆነው ተመረጡ

ከአዋጅና መመሪያ ውጪ ለዓመታት ሳይካሄድ የቆየው የኢትዮጵያ ንግድና ዘርፍ...

ቀጣናዊ ገጽታ የያዘው የኢትዮ ሶማሊያ ውዝግብ

ከአሥር ቀናት ቀደም ብሎ በተካሄደው የፓርላማ 36ኛ መደበኛ ስብሰባ፣...

የኢንሹራንስ ኩባንያዎች በዓረቦንና የጉዳት ካሳ ክፍያዎች ላይ ተጨማሪ እሴት ታክስ መጣሉን ተቃወሙ

በአዲሱ ተጨማሪ እሴት ታክስ አዋጅ ውስጥ የኢንሹራንስ ከባንያዎች ለሚሰበስቡት...