[ክቡር ሚኒስትሩ በቴሌቪዥን የሚተላለፈውን የአርሶ አደሮች የማዳበሪያ እጥረት ቅሬታ ዘገባ እየተከታተሉ ሳለ ባለቤታቸው በጥያቄ ያዟቸው]

• ሕዝቡ በጣም እየተማረረ መምጣቱን ግን ታውቁታላችሁ?
• በምን ምክንያት?
• በኑሮ ውድነቱም በሌላውም። ግን ግን?
• ግን ምን?
• ሕዝቡ ተማሯል ያልኩትን ተወውና …
• እ …?
• በአገሪቱ ከፍተኛ የኑሮ ውድነት መኖሩን ግን ታውቃላችሁ?
• እንዴት አናውቅም? ሚኒስትር ብሆንም የቤቴ ወጪ መጨመሩን ይጠፋኛል ብለሽ ነው?
• የቤትህ ወይም የቤታችሁ ወጪ መጨመሩን ብቻ ነው የምታውቁት?
• ለምን?
• እ …?
• የሁሉም ነገር ዋጋ መጨመሩን እናውቃለን። ነገር ግን ደግሞ የአገሪቱ የኢኮኖሚ ዕድገት ያመጣው መሆኑንም እንገነዘባለን።
• እንዴት?
• የአገሪቱ ኢኮኖሚ ሲያድግ የምርቶች ዋጋ ይጨምራል።
• የአገሪቱ ኢኮኖሚ አድጎ ከሆነማ የተትረፈረፈ ምርት ባይሆንም በቂ ምርት እየተመረተ ነው ማለት ነው።
• እሱን እኮ ነው የምልሽ?
• አይደለም። በቂ ምርት እየተመረተ ከሆነማ ዋጋ ይወርዳል። ዋጋ ከወረደ ደግሞ የኑሮ ውድነት አይኖርም ወይም ሕዝብ አያማርርም።
• የዋጋ ንረቱ የተባባሰው በእኛ ምክንያት አይደለም።
• ታዲያ ምንድነው?
• የዋጋ ንረት በዓለም አቀፍ ደረጃ በመከሰቱ ነው።
• ምን?
• በአሁኑ ወቅት በዋጋ ንረት ያልተጠቃ የዓለም አገር ፈልገሽ አታገኚም። ሁሉም በዋጋ ንረት ተመቷል።
• የዋጋ ንረት ተስቦ ሆኗል በለኛ?
• ማለት ይቻላል።
• ተስቦ ከሆነማ ተዛምቶ ሕዝቡ እንዳይጎዳ አንድ ነገር ማድረግ አለባችሁ።
• ምን እናድርግ?
• መከተብ!
• ምንድነው የምታወሪው?
• የኑሮ ውድነት ተስቦ ሆኗል አልክ አይደል እንዴ?
• እና ብልስ?
• እንዳይዛመት መከተብ ነዋ፣ ካልሆነ ደግሞ ባህላዊ ሐኪሞችንም ማማከር ነው።
• ትቀልጃለሽ አይደል?
• እናንተ ስትቀልዱ ምን ላድርግ?

[ክቡር ሚኒስትሩ በችግኝ ተከላ ፕሮግራም ላይ ሳይገኝ ከቀረው አንድ የተቋማቸው ባልደረባ የሆነ የተቃዋሚ ፓርቲ አባልን አስጠርተው እያናገሩ ነው]

• ለምንድን ነው በዚህ አገራዊ ፋይዳ ባለው ፕሮግራም ላይ ያልተገኘኸው?
• ክቡር ሚኒስትር ህሊናዬ አልፈቀደልኝም።
• እንዴት?
• ክቡር ሚኒስትር ችግኝ መትከል እንዳለበት አምናለሁ ነገር ግን ሰው ይቀድማል።
• ሰው ይቀድማል ስትል ምን ማለትህ ነው?
• መንግሥትም ሆነ ገዥው ፓርቲ ለችግኝ የሰጡትን ያህል ትኩረት ለዜጋው እየሰጡ አይደለም።
• እንዴት? እና ማንን ነው እያገለገልን ያለነው?
• ዜጋው ለችግኝ የተሰጠውን ያህል ትኩረት አላገኘም። በኑሮ ውድነት እየተሰቃየ ነው። በልቶ የሚያድረው እያጣ ነው።
• እርግጥ ነው የሁሉም ነገር ዋጋ ጨምሯል። ቢሆንም መንግሥት ዝም ብሎ አልተቀመጠም።
• ክቡር ሚኒስትር ተሳስተዋል።
• ምን?
• የሁሉም ነገር ዋጋ ጨምሯል ያሉት ትክክል አይደለም።
• እንዴት?
• ያልጨመረ አለ።
• ምን?
• የሰው ልጅ ዋጋ ቀንሷል።
• መቃወምና መተቸት ብቻ ውጤት የሚያመጣ መስሎህ ከሆነ ተሳስተሃል።
• አልተሳሳትኩም ክቡር ሚኒስትር?
• ቆይ የመጀመሪያ ዓመት የችግኝ ተከላ ፕርግራም ላይ ግንባር ቀደም አልነበርክም እንዴ?
• ነበርኩ።
• እንዲያውም ችግኝ ስታድል እንደነበር አስታውሳለሁ።
• ልክ ነው።
• ታዲያ አሁን ምን ተፈጠረ? ምን የተለየ ነገር መጣ?
• ክቡር ሚኒስትር ያኔ ችግኝ ተከላውን ሳስተባብር ዜጎች ክብር ነበራቸው።
• አሁንስ?
• ክቡር ሚኒስትር አሁን ችግኝ እንትከል ትላላችሁ በሌላ በኩል ደግሞ ነዋሪዎችን …
• ነዋሪዎችን ምን?
• ከመኖሪያ ቤታቸው ትነቅላላችሁ!