Thursday, April 18, 2024
- Advertisement -
- Advertisement -
ማኅበራዊ‹‹ባክ ቱ ስኩል አፍሪቃ››

‹‹ባክ ቱ ስኩል አፍሪቃ››

ቀን:

ከቅድመ መደበኛ ጀምሮ ከፍተኛ ትምህርት ተቋማት የተሳተፉበትን የመጀመርያው ‹‹ባክ ቱ ስኩል ኢትዮጵያ›› ዓውደ ርዕይና ጉባዔ በነሐሴ 2009 ዓ.ም. ያካሄደው ኑስፊር አፊርስ፣ አምስተኛውን ዓውደ ርዕይ ግንቦት 12 እና 13 ቀን 2015 ዓ.ም. በአብርሆት ቤተ መጻሕፍት ቅጥር ግቢ አካሂዷል፡፡

የዓውደ ርዕዩ ስያሜ የአፍሪካን ጥንታዊ መጠሪያ ‹‹አፍሪቃ››ን ማዕከል በማድረግ ‹‹ባክ ቱ  ስኩል አፍሪቃ›› ብሎታል፡፡

ድርጅቱ በትምህርትና በቴክኖሎጂ ዘርፍ እየሠራ የሚገኘው እንቅስቃሴ በአኅጉሪቱና  በዓለም እንዲስፋፋ ካለው ዕቅድ አንፃር፣ ከሦስተኛው ዓውደ ርዕይ ጀምሮ ‹‹ባክ ቱ ስኩል አፍሪቃ›› በሚል እያከናወነ ሲሆን፣ በዘንድሮው ዓውደ ርዕይ፣ የኢትዮጵያ ሲቪል አቪዬሽንን ጨምሮ ከ60 በላይ መንግሥታዊና መንግሥታዊ ያልሆኑ ተቋማት በአካል፣ ከ150 በላይ የአገር ውስጥና የውጭ ድርጅቶች ደግሞ በበይነ መረብ ተሳትፈዋል፡፡

- Advertisement -

Video from Enat Bank Youtube Channel.

የኢትዮጵያ ሲቪል አቪዬሽን ባለሥልጣን፣ ጂኦስፓሻልና ስፔስ ሳይንስ ኢንስቲትዩት እንዲሁም በርካታ በትምህርትና በቴክኖሎጂ ላይ የሚሠሩ መንግሥታዊና መንግሥታዊ ያልሆኑ ተቋማት በተሳተፉበት የ‹‹ባክ ቱ ስኩል አፍሪቃ›› የትምህርትና የቴክኖሎጂ ዓውደ ርዕይ፣ ፈጠራዎቻቸውን፣ ቴክኖሎጂዎቻቸውንና ትምህርት ነክ ፈጠራዎቻቸውን ይዘው ከቀረቡት ተቋማት አቦል ኤይድ ቴክ አንዱ ሲሆን፣ የሜካኒካል ኢንጂነሪንግ ምሩቁ ሚካኤል ገብረ ጊዮርጊስ ደግሞ የተቋሙ ተባባሪ መሥራች ነው፡፡

ወጣት ሚካኤል እንደሚለው፣ በኢትዮጵያ እያስተዋለ ያለውን የትምህርት ጥራት ችግር ለመቅረፍ ዓላማ አስቀምጦ የተነሳው አቦል ኤይድ ቴክ ትምህርታዊ ጌሞችን፣ መተግበሪያዎችንና አኒሜሽን ቪዲዮዎችን ይሠራል፡፡

‹‹በ2014 ዓ.ም. የ12ኛ ብሔራዊ ፈተናን ከወሰዱ ተማሪዎች 97 በመቶ ያህሉ መውደቃቸው፣ የትምህርቱን መውደቅ ያሳያል፤›› ያለው ወጣቱ፣ ችግሩን ለመቅረፍ ከሚያስችሉ በርካታ መፍትሔዎች አንዱ ቴክኖሎጂን መጠቀም እንደሆነ አክሏል፡፡

በመማር ማስተማር ሒደቱ መሸምደድን ሳይሆን ምክንያታዊነትንና ሎጂክን ማስተማርና ትምህርቱን ከኑሮ እውነታ ጋር አጣምሮ ማስኬድ እንደሚያስፈልግ፣ ለዚህ መሠረትና መግባቢያ በሆነው ቋንቋ ላይ ደግሞ መሥራት ግድ እንደሆነም ይገልጻል፡፡

በአማርኛ፣ በእንግሊዝኛ ሆነ በሌሎች ቋንቋዎች ችግር መኖሩን፣ ተማሪዎች እስከ ስድስተኛ ክፍል በአፍ መፍቻ ተምረው ሰባት ሲደርሱ በእንግሊዝኛ ስለሚማሩ ለመረዳት እንደሚቸገሩና ይህንን ችግራቸውን ለመቅረፍ ቴክኖሎጂን ምጠቀም እንደሚገባ ተናግሯል፡፡

ቋንቋ መግባቢያ እስከሆነ ድረስ ተማሪዎች በቋንቋቸው ቢማሩ እንደሚጠቀሙ፣ ነገር ግን ችግር በመኖሩ በቴክኖሎጂ መፍታት እንችላለን ብለው መነሳታቸውን ተናግሯል፡፡

በአኒሜሽን፣ በግራፊክስና በስሪዲ በመጠቀም ተማሪዎች የሚማሩበትን መተግበሪያ ሠርተው እያጠናቀቁ መሆኑን፣ መተግበሪያው አሁን ላይ ለሕፃናት የተዘጋጀ መሆኑንና የሕፃናት የትኩረት ጊዜ አነስተኛ በመሆኑ በጌም መልክ ጭምር መዘጋጀቱን አክሏል፡፡

እንደ ወጣት ሚካኤል፣ ተማሪዎች ጌም እየተጫወቱ ትምህርቱን እንዲረዱት ለማስቻል የተሠራው መተግበሪያ፣ ሥርዓተ ትምህርቱን መሠረት ያደረገና የመማሪያ መጻሕፍትን የተከተለ ሲሆን፣ ከወር በኋላ የሚለቀቅ ይሆናል፡፡ መተግበሪያው ከአንደኛ እስከ አምስተኛ ክፍል ያሉትን የሒሳብ መጻሕፍት በድምፅ፣ በምሥል፣ በስሪዲና በጌም መልክ የያዘ ነው፡፡

መተግበሪያው ተማሪዎች በድምፅ፣ በምሥልና በስሪዲ የተማሩትን ትምህርት የሚመዘኑበት ጌም ያለው ሲሆን፣ ይህ ሕፃናት ተማሪዎች ሳይሰለቹና ሳይቸገሩ ትምህርቱን ለመያዝ ያስችላቸዋል ብሏል፡፡

በትምህርትና በቴክኖሎጂ ላይ ያተኮረው ‹‹ባክ ቱ ስኩል አፍሪቃ›› በየትኛውም ዓለም ያሉ በትምህርትና በቴክኖሎጂ ዘርፍ የተሰማሩ ተቋማት በበይነ መረብ የተሳተፉበትና ዓላማቸውን ያስተዋወቁበት እንደነበርም የኑስፊር አፌርስ መሥራችና ማኔጂንግ ዳይሬክተር አቶ ሮቤል በቀለ ተናግረዋል፡፡

የትምህርት ዓውደ ርዕዩ ለሁለት ቀናት የቆየ ቢሆንም፣ በዓውደ ርዕዩ የተሳተፉ ተቋማትና መረጃዎቻቸው፣ የፈጠራ ሥራዎች፣ የትምህርት አስተዳደርና የሶፍትዌር ሥርዓቶች ለአንድ ዓመት በበይነ መረብ ላይ የሚቆዩ መሆኑን ተናግረዋል፡፡

የተለያዩ ዓለም አቀፍ ትምህርት ቤቶች፣ በትምህርት ላይ የተሰማሩ አካላት ወደ ኢትዮጵያ መጥተው ሀብታቸውንና ዕውቀታቸውን ለተማሪዎች ተደራሽ እንዲያደርጉ ሲሠሩ መቆየታቸውን ይህንኑ ለማጠናከር በኔዘርላንድና በጀርመን ተቀማጭነቱን ካደረገው ኤቨንት አርክቴክት ግሩፕ ጋር አብረው እየሠሩ መሆኑን አቶ ሮቤል አክለዋል፡፡

‹‹ባክ ቱ ስኩል አፍሪቃ›› ከውጭ ያሉ አጋር አካላትን በማካተት የትምህርትና የቴክኖሎጂ መረጃዎችን ለተማሪዎችና ለመምህራን እያደረሰ መሆኑን፣ የጥራት ደረጃን በማሟላትና ለተማሪዎችና ማኅበረሰቡ ጥሩ መድረክ በማዘጋት የተመረጡ ድርጅቶችን አወዳድሮ በመሸለም ከሚታወቀው ኤቨንት ኤክስ አዋርድም በአምስት ደረጃዎች ታጭቶ በሦስት ደረጃዎች የብር ሜዳልያ ተሸላሚ መሆኑንም ጠቁመዋል፡፡  

በ25 አገሮች መድረኮችን በማዘጋጀት የሚታወቀው ኤቨንት አርክቴክት ግሩፕ አባልና የዩኒቨርሲቲ መምህር ጊልበርት ጆንሰን እንዳሉት፣ የተሻሻሉና በቴክኖሎጂ የተደገፉ በርካታ ዕውቀቶችን ወደ ኢትዮጵያ ለማምጣት ድርጅታቸው የሚሠራ ይሆናል፡፡

በቀጣይ ዓመት በሚከናወነው ስድስተኛው ‹‹ባክ ቱ ስኩል አፍሪቃ›› የትምህርት ዓውደ ርዕይ በርካታ የአውሮፓና የአሜሪካ ትምህርት ቤቶች እንዲሳተፉ፣ እንዲተባበሩና የተሻለ ዕውቀት ለኢትዮጵያ እንዲመጣ እንደሚሠሩም ተናግረዋል፡፡

የአብረሆት ቤተ መጻሕፍት ማኔጂንግ ዳይሬክተር ኢንጂነር ውባየሁ ማሞ በበኩላቸው፣ አብረሆት ቤተ መጻሕፍት፣ ኖስፊርና ከኢቨንት አርክቴክት ግሩፕ ጋር በመተባበር ባዘጋጁት የትምህርትና ቴክኖሎጂ ዓውደ ርዕይ፣ ቤተ መጻሕፉ ከማንበብ ባሻገር ዕውቀትን ለማጎልበት የሚሳተፍበት ነው ብለዋል፡፡

ቤተ መጻሕፍት ከማንበብ ባሻገር ትምህርት ነክ ዓውደ ርዕዮችን ማዘጋጀት ኃላፊነታቸው መሆኑን፣ እንደ አገር በርካታ ቤተ መጻሕፍት ባይኖሩም፣ ያሉት ቤተ መጻሕፍት ወጣቶች የራሳቸውን ሥራ አውጥተው የሚያሳዩበትን መድረክ ማመቻቸት እንደሚጠበቅባቸው አክለዋል፡፡

‹‹በዓውደ ርዕዩ የሚታዩ የፈጠራ ሥራዎች የሚያሳዩት አብዛኛው ወጣት ችሎታ ያለው መሆኑን ቢሆንም፣ በቤት ውስጥ በርካታ ፈጠራ የሚሠሩ ወጣቶችን አውጥቶ ለሕዝብ የሚያሳዩበት፣ ራሳቸውን የሚፈትኑበትና የሰዎች አስተያየት የሚያገኙበት ቦታ አልተፈጠረም ነበር፤›› ያሉት ውብአየሁ (ኢንጂነር)፣ የትምህርትና ቴክኖሎጂ ዓውደ ርዕዮች በተለይ ወጣቶች የተሻለ ቦታ አግኝተው ራሳቸውን እንዲገልጹ አቅም ይሆናቸዋል፣ ሥራቸውን እንዲያሳዩ መድረክ መክፈት ደግሞ የቤተ መጻሕፍት ኃላፊነት ነው ብለዋል፡፡

እንዲህ ዓይነት መድረክ ከሚያዘጋጁ ጋር ተባብሮ የነገዋን ኢትዮጵያ ተመራማሪ፣ አሳቢ፣ አንባቢና ችግር ፈቺ በሆነ ትውልድ ለመገንባት መድረኮች እንደሚያስፈልጉና አብረሆት ቤተ መጻሕፍትም ሁሌም እንደሚተባበር ገልጸዋል፡፡

spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ

ሰላማዊ የፖለቲካ ትግልና ፈተናው

የኦሮሞ ነፃነት ግንባር (ኦነግ) የፖለቲካ ኦፊሰር የአቶ በቴ ኡርጌሳን...

አበጀህ ማንዴላ! አበጀሽ ደቡብ አፍሪካ!

በአየለ ት. የፍልስጤም ጉዳይ የዓለም አቀፍ ፖለቲካንም ሆነ የተባበሩት መንግሥታትን...

የውጭ ባለሀብቶች ለኢትዮጵያውያን ብቻ በተፈቀዱ የንግድ ዘርፎች እንዲገቡ የመወሰኑ ፋይዳና ሥጋቶች

ጠቅላይ ሚኒስትር ዓብይ አዓመድ (ዶ/ር) የውጭ ኩባንያዎች በጅምላና ችርቻሮ...