[ክቡር ሚኒስትሩ ከፓርቲያቸው የፖለቲካ ጉዳዮች ኃላፊ ጋር በወቅታዊ ጉዳዮች ዙሪያ ለመወያየት ቢገናኙም፣ ውይይቱ ከዚህ ቀደም ባልለመዱት መልኩ ሙግት የቀላቀለ ሆኖባቸዋል]

• ክቡር ሚኒስትር ፖለቲካውን የምንመራበት መንገድ ትክክል አልመሰለኝም፣ መንገድ እየሳትን ነው።
• እንዴት፣ ለምን እንስታለን?
• ምክንያቱም ከሁሉም ጋር እየተጋጨን ነው። ሥልጣን ስንይዝ የነበረን የማኅበረሰብ ድጋፍ ተሸርሽሮ እያለቀ ነው።
• አይምሰልህ። አሁንም ድጋፋችን እንዳለ ነው!
• ክቡር ሚኒስትር፣ ከማኅበረሰባችን ምን ያህል እየተለየን እንደመጣን ላስረዳዎት እችላለሁ።
• እሺ ቀጥል።
• በጦርነቱ ምክንያት ከትግራይ ማኅበረሰብ ጋር ተለያይተናል።
• እሱ በእኛ ምክንያት የመጣ አይደለም።
• በምንም ምክንያት ይምጣ አሁን ላይ ግን ከዚህ ማኅበረሰብ ተለይተናል። በቀላሉም የምንመልሰው አይደለም።
• ሊሆን ይችላል።
• በኦሮሚያ ሸኔ አሁንም ሊለቀን አልቻለም። በበርካታ አካባቢዎች መዋቅራችንን እያፈረሰ ከማኅበረሰቡ እየነጠለን ነው።
• የኦሮሚያ ችግር የለውም፣ ይስተካከላል።
• እርሶ እንዳሉት በቀላሉ የምንመልሰው ከሆነ ጥሩ ነገር ግን ከማኅበረሰቡ እየተነጠልን መሆኑ ግን ሐቅ ነው። በሌላ በኩል
• በሌላ በኩል… ምን?
• በእስልምና ሃይማኖት ውስጥ የነበረውን ችግር መፍታት ብንችልም አሁንም በእኛ ላይ ያለው ጥርጣሬ አልተቀረፈም።
• ኃይማኖትን መሠረት ያደረገ የፖለቲካ ድጋፍ ለእኛ አይጠቅመንም።
• እንደዚያ ዓይነት ሥርዓት ገንብተን ቢሆን ጥሩ። ነገር ግን እውነቱ እንደዚያ አይደለም።
• እውነቱ ምንድነው?
• ሰሞኑን በኦርቶዶክስ ሃይማኖት ውስጥ የተፈጠረው ችግር በእኛ ላይ ያመጣውን አደጋ ብቻ መመልከት በቂ ነው።
• ምን አደጋ አመጣብን?
• ክቡር ሚኒስትር የእውነት ሳይገባዎት ቀርቶ ነው?
• ከገባኝ ለምን እጠይቃለሁ?
• አይመስለኝም። ለማንኛውም ሰሞኑን በተፈጠረው ችግርና ከእኛ በኩል ስለጉዳዩ በተሰጠው መግለጫ ምክንያት የቀረንን ማኅበራዊ መሠረት የማጣት አደጋ ደቅኖብናል።
• ከየትኛው ማኅበራዊ መሠረታችን?
• በአማራ፣ በአዲስ አበባና በሌሎች ከተሞች የሚገኘው ማኅበረሰብ ብቻ ነበር የቀረን፣ አሁን ግን ይህንንም የማጣት ጫፍ ላይ ደርሰናል፡፡
• ለምን? ከዚህ ማኅበረሰብ ጋር ምን ያጣላናል?
• መንግሥት ሃይማኖቴን ሊንድ እጁን አስገብቷል ብሎ አምኗል። በዚህ ምክንያት በአንድ ጊዜ የዚህን ማኅበረሰብ ድጋፍ የማጣት አደጋ ውስጥ ገብተናል።
• መንግሥት ግን እጁን አላስገባም?
• ማኅበረሰቡ ግን መንግሥት እጁ እንዳለበት አምኗል።
• ታዲያ ስህተት መሆኑን ለምን አታስረዱም?
• ሞክረናል። ነገር ግን የሃይማኖቱን ተከታይ ይቅርና የእኛኑ ፓርቲ አባሎች እንኳ ማሳመን አልቻልንም።
• ችግር የለውም። የአንዱ መሄድ ሌላውን መልሶ ያመጣል።
• እንዴት?
• የዚህን መሄድ ተከትሎ በተቃራኒ የቆመ ሌላው ማኅበረሰብ ወደ እኛ ይመለሳል።
• ክቡር ሚኒስትር ሥልጣን የያዝነው እኮ በተቃርኖ ለመምራት አይደለም። ከምንከተለው መርህም ተቃራኒ ነው።
• የትኛው መርህ?
• ‹‹መደመር››!
• አሁንም በ‹‹መደመር›› መርህ ነው እየመራን ያለነው።
• ከሁሉም የፖለቲካ ማኅበረሰብ እየተጋጨን? እንዴት ያለ መደመር ነው ይኼ?
• የመደመርን መርህ አልገባህም ማለት ነው።
• እንዴት?
• የእኛ ‹‹መደመር›› ከሒሳባዊው የመደመር ቀመር የተለየ ነው።
• እንዴት? ምን ይለየዋል?
• በእኛ ‹‹መደመር›› ውስጥ መደመር ብቻ አይደለም ያለው።
• ሌላ ምን አለ?
• መቀነስም አለ።
• እ…?
• መቀነስ ብቻ ሳይሆን ማካፈልም፣ ማባዛትም አሉ።
• ክቡር ሚኒስትር እርሶ ሌላ ዓለም ላይ ያሉ ነው የሚመስለው።
• እንዴት?
• አገሪቱ በግጭቶች ውስጥ እየተናጠችና የችግሩን ጥልቀት ያስተዋሉ አልመሰለኝም፡፡
• ችግሮቹን እኛ አልፈጠርናቸውም።
• እና ከየት መጡ?
• በውርስ።
• ምን አሉ?
• የወርሰናቸው ችግሮች ናቸው!
• ወደ ሥልጣን ላይ የመጣነው ችግሮችን ለመፍታት እንጂ ባለቤት ለማበጀት አይደለም። ለዚህ ደግሞ ኃላፊነት አለብን።
• ትክክል ነው። ሥጋትህ ይገባኛል።
• ታዲያ?
• አንድ ነገር አረጋግጥልኃለው!
• ምን?
• ኢትዮጵያ አትፈርስም!
• መጀመሪያ እኛን ነው የሚያፈርሰው፣ ከጥሎ ደግሞ ተቋም ይፈርሳል። ከዚያ በኋላ…
• ከዚያ በኋላ ምን?
• ከዚያማ እርሶም በዚህ ሥልጣን ላይ መቀጠል አይችሉም።
• ለምን አልችልም?
• አይሆንማ! እንዴት ሆኖ?
• አለኝ እኮ፣ ገና ይቀረኛል።
• ምን?
• የአገልግሎት ዘመን!

[ሚኒስትሩ ጥልቅ እንቅልፍ ውስጥ ሆነው ‹‹ገና ይቀረኛል›› እያሉ ያወራሉ፣ በሁኔታው የደነገጡት ባለቤታቸው ሚኒስትሩን ቀሰቀሷቸው] 

• እስኪ በስመ አብ በል? ምንድነው እንዲህ ያስጨነቀህ?
• እ… አይ ጭንቀት አይደለም።
• ታዲያ ምንድነው? ፊትህ ሁሉ ተለዋውጦ ስትጮኽና ስታወራ ነበር እኮ?
• ብዙ አወራሁ እንዴ? ምን እንዳልኩ ሰምተሻል?
• አልገባኝም እንጂ ደጋግመህ ‹‹ይቀረኛል›› ምናምን ስትል ነበር።
• ይቀረኛል ብቻ ነው ያልኩት?
• ‹‹ይቀረኛል›› እና ሌሎችም የማይሰሙ ነገሮችን ስትል ነበር።
• ይህን ብቻ ነው የሰማሽው?
• በዚያኛው ጫፍ የሚያዋራህ አልተሰማኝም።
• እስኪ አትቀልጂ…?
• ግን ማነው?
• ምኑ?
• እንዲህ ያስጨነቀህ? ማለቴ ጉዳዩ ምንድነው?
• ቅዠት እኮ ነው።
• በእውንህም ይህንን ነገር ስትል ሰምቼ አውቃለሁ።
• መቼ? ምን ስል?
• ሰሞኑን በነበሩህ ስብሰባዎች ላይ በተደጋጋሚ ይቀረኛል… ሦስት ዓመት አለኝ ስትል በቲቪ ሰምቻለሁ። ከዚህ ጋር የሚገናኝ ነው?
• በጭራሽ አይደለም።
• ታዲያ ከማን ጋር ነው?
• ከአንድ የውጭ አገር ባለሥልጣን ጋር እየተከራከርኩ ነበር። አዎ እንደዚያ ነው።
• በአማርኛ?
• እሱም በአማርኛ ነበር ያወራኝ የነበረው… እንደዚያ መሰለኝ።
• ወይ አስተርጓሚም ይዞ ይሆናል።
• ቅዠት ነው አልኩሽ ኦኮ። ይልቅ የምጠጣው ውኃ ስጪኝ
• እሺ… እንደው ግን እንዲህ ከምትጨነቅ ብትተወውስ?
• ምኑን?
• ይቀረኛል ያልከውን?
• በፍጹም። ‹‹ይቀረኛል!››