Tuesday, February 7, 2023
- Advertisement -
- Advertisement -

የተመረጡ ፅሑፎች

ለጤናችን!

ሰላም! ሰላም! እንዴት ከረማችሁ ጃል? ‹‹ኑሮ ካሉት ፍሪጅም ይሞቃል›› ያለችው ኮካ ናት ወይስ ፔፕሲ እንዳልላችሁ፣ ሁለቱም ሰውን ለመወከል አሉት ተባለ እንጂ ማረጋገጫ እንደሌለ ከእናንተ በላይ የሚያውቅ የለም፡፡ ብቻ አሁንማ ሁሉም ነገር በተወላገደ የመረጃ መረብ ላይ የተዘረጋ በመሆኑ መወጣጠር በዛ። ‹‹አፈር ናችሁና ወደ አፈር ትመለሳላችሁ›› ስንባል ራሱ፣ መረጃው ተስተካክሎ ካልደረሰን ስድብ ሊመስለንም ይችላል። ‹‹ማግኘትም አልከፋ ማጣቱም አልከፋ፣ እኔን የጨነቀኝ ወሬ ብቻ ከፋ›› ብሎ አንድ ደላላ ወዳጄ አንጎራጎረ። ‹‹ምነው ትዝታ ውስጥ የገባህ ትመስላለህ?›› ብለው፣ ‹‹እንዴት ቢሆን ነው ከግራና ከቀኝ በሚለጋ የነገር ሩር የምንታመሰው?›› ብሎ መልሶ ጠየቀኝ። ‹‹ሰው ማርጀቱን የሚያውቀው በተስፋ መኖር ትቶ በትዝታ መኖር ሲጀምር ነው›› የሚለውን ዘመን ተሻጋሪ ጥቅስ እያሰብኩ፣ ‹‹ትዝታሽ ዘወትር ወደ እኔ እየመጣ…›› ማለት ስጀምር የዘመኑ ሰው ነገር እየታሰበኝ እደነግጣለሁ፡፡ ማን ማርጀትን በዋዛ ይቀበላል? ወገብ ሲንቀጠቀጥ እግር መራመድ ሲያቅተው ይታያችሁ፡፡ ለዚህ መስሎኝ በስተርጅና ፖለቲከኞቻችን እንደ ሠፈር ጎረምሳ ይዋጣልን እያሉ የሚውረገረጉት፡፡ እነሱን መርሳት ይሻላል!

ቀስ እያልን የተለመደውን የፖለቲካ ጨዋታ ከጓደኛዬ ጋር አነሳነው። ያለ ውጤት እንደ መረብ ኳስ ጨዋታ ኳሱን አየር ላይ ስንቀባበለው 2015 ዓ.ም. ሊጋመስ ነው። የነገር አጀንዳ በታጠቁ ፖለቲከኞች ምክንያት የአገራችን ችግር ውል እያጣ ነው። ምን ታደርጉታላችሁ? ካልጎደለ ስለማይሞላ ካልሞላም ስለማይጎድል ሚዛኑን ለማስጠበቅ መባዘናችንን ግን አልተውነውም። ይኼን የተፈጥሮ ሕግ ጨዋታ ሚዛን ለማሳካት የሚስገበገበውን በጋራ ክንድ እጁን መቆንጠጡ ላይ ብንበረታ፣ ስንቱን ነውጠኛ አደብ ባስገዛን ነበር። ‹‹አሁን አሁንማ ሳስበው ፖለቲከኞቻችን ሕፃን ይመስል በአሻንጉሊት ሳይቀር የሚጣሉ ይመስለኛል…›› አለኝ አንዱ ደላላ ጓደኛዬ። ‹‹ምን ያድርጉ ብላችሁ ነው ለነገሩ? ያለ ዕውቀትና የረባ ርዕዮተ ዓለም የተገባበት ፖለቲካ መቼ ውል አለውና? ያሰኛል!

 እግረ መንገዴን አንድ ያጋጠመኝን ጉዳይ ላጫውታችሁ። በአንዱ ዕለት ማለዳ ምሁሩ የባሻዬ ልጅ ከቤቱ ወጥቶ ወደ ሥራ ሲጣደፍ አገኘኝ። ደህና አደርክ ሳይለኝ የለበጣ ሳቅ እየሳቀ፣ ‹‹አንበርብር እንደ ፖለቲከኞቻችን በገዛ ሜዳዬ ነጥብ የመጣል አባዜ አስቸገረኝ እኮ…›› አለኝ ሁለት እጁን በኪሱ ከቶ አንገቱን እየነቀነቀ። በነገራችን ላይ የባሻዬ ልጅ የአገራችንን ፖለቲከኞች እንደሚንቀው ሁሉ ራሱ የፖለቲካ ፓርቲ ቢመሠርት ኖሮ ይኼኔ የት በደረሰ ነበር ያስብላችሁ ነበር። ነው ያልኩት? ‹‹ምነው ሰላም አላደርክም? እንዴት አደርክ ማለት አይቀድምም?›› እንዴት ስለው፣ ‹‹ደመወዝ በወር ኑሮ በዕለት ሆኖ መፈናፈኛ አጥተን እንዴት ሰላምታ ይቅደም?›› አለኝ። ምሁሩ የባሻዬ ልጅ እጁን ተስሞ የሚሠራ ታታሪ ሠራተኛ እንደሆነ ባውቅም የገቢው ነገር ዘወትር ሲያሸማቅቀው አያለሁ። ‹‹ደመወዜ ከማነሱ ቀኑ እንደ ምጥ መርዘሙ ነው የሚገርመኝ…›› አለኝ፡፡ ‹‹እንዴት?›› ብዬ ስጠይቀው፣ ‹‹ቀኑ እንዴት እንደሚከንፍ፣ የደመወዝ መዳረሻ ግን እንዴት ሰውን እንደሚያንቆራጥጠው አታይም? ከታክሲ ጥበቃ፣ ከፍትሐዊ የሀብት ክፍፍልና ዳኝነት ጥበቃ በተጨማሪ ያመጣነውን ለውጥ በሥርዓት መምራት አቅቶን እየተናጀስን የደመወዝ ቀን ጥበቃ ሲጨመር አይጣል ነው…›› አለኝ ጭንቅ ብሎት። ‹‹አይዞህ ማጣትም ቢሆን ከልኩ አያልፍም…›› አልኩና ሸንግዬ ሸኘሁት። ምን ይደረግ!

‹‹ኧረ ኩሉን ማን ኩሏታል…›› በሚባልበት በወርኃ ጥር ቀርቶ፣ አሁን አሁን እንኳ ለሠርግና ለፍቺ ጊዜ መምረጥ ቀርቷል፡፡ ለፖለቲከኛም ቢሆን፡፡ አንድ የሠፈራችን ጊዜ ያነሳቸው በመሬት ወረራ የከበሩ ሀብታም ልጃቸውን ለመዳር ሽር ጉድ ሲሉ ላጫውታችሁ። የሠፈሩ ሰው ታዲያ እኝህን ሰው እጅግ ፈርቷቸው ሰነበተ። ስለሳቸው አዳዲስ የወጡ መረጃዎችን የሚሰጡ ጥቃቅንና አነስተኛ ምላሶች ሠፈሩ ውስጥ በረከቱ። ሁሉም የየግሉን ኤፍኤም ጣቢያ የጀመረ መስሎን ነበር። የሚዲያ ነገር ሲነሳ ዩቲዩብን አለማስታወስ ነውር ይመስለኛል። በዚሁ ዩቲዩብ ስለአገር የምንሰማው ያው ተቀላቅሎ መሆኑ አያከራክረንም። መፈክሩም፣ ‹‹ምርጥ ምርጡን ለሕዝባችን›› የሚል ነው ተብሎ በአንዳንድ ስላቅ ቀማሪዎች ይታማል። ታዲያ ሐሜት ነው? ‹‹ጆሮ ለባላቤቱ ባዳ ነው›› እንዲሉ ፖለቲከኞቻችንም የሕዝብ አስተያየት ሲያዳምጡ፣ ‹‹ምርጥ ምርጡን›› ነው። ‹‹እውነቱን ተናግሮ ከመሸበት ማደር በአርበኞች ጊዜ ቀረ…›› ሲሉ የሰነበቱት አዛውንቱ ባሻዬ ናቸው። ባሻዬ አልቀረም የሚሉት አንድ ነገር ብቻ እንደሆነ ነግረውኛል። እርሱንም ‹‹ና ወዲህ!›› ብለው በጆሮዬ፣ ‹‹አንበርብር ዛሬም ትናንትም ያለውና የነበረው ስለራሳችን እውነቱን ስንሰማ እንደ ወባ ታማሚ የሚያንዘረዝረን ነገር ነው…›› ነበር ያሉኝ። ታዲያ እኔም በጆሯችሁ ነው ሹክ ያልኳችሁ እሺ? ይሻለናል መሰል!

 የሠፈራችን አዲሱ ባለሀብት በነዋሪዎች ላይ የለቀቁትን ከራስ ይዞታና ከቀበሌ ቤት የማፈናቀል የማሸበር ስሜት አልቃይዳ እንኳ ሊፈጥረው የሚችለው አልነበረም። ሰውዬው በመንደራችን፣ ‹‹የቴረሪዝምን ቲዮሪ በደንብ ሊያስተዋውቁ የቻሉ›› ተብለዋል። ‹‹እንዳሻውና በአሻቸው ጊዜ የሰሙትን ገልብጠው የማውራት ሱስ ያለባቸው ይኼንን በተመለከተ ሊያስቡበት የሚገባ ነገር አለ። አገር በሥራ እንጂ በነውጥ አታድግም የሚለውን ደግሞ አድሮ ቃሪያ ለሆኑት ፖለቲከኛ ተብዬዎችና አክቲቪስት ነን ባዮች በሉልን…›› አለኝ አንድ በጉልበቱ ለፍቶ አዳሪ ወጣት ኮስተር ብሎ። ምንም እንኳ ደላላ እንጂ የፖለቲከኞች ተወካይ ባልሆንም፣ ‹‹እኔ ምን አገባኝ?›› ሳልል በጥሞና አዳመጥኩት። ባለሀብቱ፣ ‹‹ልጄ መዳር ያለባት የዳኸችበትና የሮጠችበት እዚህ መሬት ላይ ነው። ምንም እንኳ ዛሬ ሞልቶኝ በሾፌር ገብታ ስትወጣ ዓይኗን ለማየት ባትችሉም፣ እኔ እንደ እናንተ ሳለሁ (ደሃ ሳለሁ ለማለት ነው)  ከእኩዮቿ ልጆቻችሁ ጋር አፈር ፈጭታ አድጋለች…›› አሉ ተባለ። ‹‹እናስ?›› ተብሎ ሲጠየቅ ለክፍለ ከተማው አካባቢውን ለማልማት እንዲሰጣቸው ማመልከቻ አስገቡ ማለትን የሰሙ ነዋሪዎች፣ ሰላማዊ ሠልፍ ለማድረግ ይመካከሩ ጀመረላችሁ። ‹‹ወጪና ጉልበት ቆጣቢ በሆነው ዩቲዩብ ካልሆነ ለጊዜው ሰላማዊ ሠልፉ አልተፈቀደም…›› ያለው ሰው ባይታወቅም፣ በዚሁ አንድምታ አዛውንቶች ሳይቀሩ ስልካቸውን አጨናንቀው ሰነበቱ። ምን ያድርጉ!

እንግዲህ እኔ ይኼን ሁሉ በሩጫዬ መካከል በትዝብት እከታተልላችኋለሁ። አንዱ፣ ‹‹የዘንድሮ ባለሀብት የተነሳበትን ለመርሳት የሚቀድመው የለም…›› ሲል ሌላው ይቀበልና፣ ‹‹አገር የሚጠቅም ስንት ዓይነት ፋብሪካ መትከል እየቻለ ከተማ የሚበጠብጠውን ማን ያርቅልን?›› ሲል እሰማዋለሁ። ባሻዬ በበኩላቸው፣ ‹‹አሁን እሱ ሕንፃ ልገነባ ነው ብሎ ቤታችንን አፍርሶ ሲያበቃ እዚህ ዳስ ጥሎ ሠርግ ሊደግስ ነው ያሰበው። ብልጥ ለብልጥ ዓይን ፍጥጥ አለ ያገሬ ሰው። አይ የተነሱበትን አለማወቅ፡፡ ትናንትን እንደ መርሳት የመሰለ ክፉ በሽታ የለም። አናውቅም እንዴ እንዴት… እንዴት… ብሎ ሀብቱን እንዳጋበሰው.. .››  እያሉ በዕድሜ እኩያቸው ስለሆኑት ባለሀብት ብዙ ሚስጥሮች ሲዘከዝኩልኝ ሰነበቱ። ሰው ከሰነበተ የማይሰማውና የማያሰማው የለም። በመጠላለፍ ፖለቲካ አንዱ ሲያመልጥ ሌላው ወዳቂ ነው። እንደምታዩት ዛሬ ይኼ የጨዋታ ሥልት ፖለቲካውን አጨናንቆት ምድረ አስመሳይ ሲያልፍለት ሀቀኛው እያለፈበት ከውድድር ውጪ የሚሆነው በዛ። ጤናማ ፉክክር የዕድገት አንቀሳቃሽ እንደሆነ በእኔም ሕይወትና ሙያ ስለማስተውለው እጅግ እደግፈዋለሁ። ሆኖም የትናንት ታሪካቸውን እየረሱ ለወገን ባዕዳን የሚሆኑትን ሳይ ልቤ ይቆስላል። ለአገር ዕድገትና ብልፅግና መረዳዳት፣ መተጋገዝና መተሳሰብ ሲገባን ለመበላላት መሯሯጥ ያስከፋል። ምሁሩ የባሻዬ ልጅ፣ ‹‹ይኼ ነው አንዱ የሥርዓተ አልበኝነት ጦስ…›› የሚለኝ ነገር ከቶውንም ባይገባኝም፣ በከፊል ግን የተወላገደው የፖለቲካ ዕሳቤያችን ለዚህ ያለውን አስተዋጽኦ አላጣውም። ‹‹ዋናው ጠላታችን የክፋት የጀርባ አጥንት የሆነው ራስ ወዳድነት ነው…›› ብለው የሚነግሩን እስኪወለዱ እንጠብቅ ይሆን? ደጅ መጥናት አይታክተን መጥኔ!  

መቼ ዕለት በጥድፊያዬ መሀል ውዷ ባለቤቴ ማንጠግቦሽ ደወለችልኝ። ምን ገጥሟት ይሆን እያልኩ በጥድፊያ ስልኬን አነሳሁት። እንደ እኔ ስልካችሁ መጥራቱ በመቻሉ ብቻ ፈጠን ብላችሁ ማንሳት ይኖርባችኋል። ‹‹እንዴት?›› እንደማትሉ ተስፋ አደርጋለሁ። ‹‹ሎተሪ ቢደርሰኝ ከሚሰማኝ የደስታ ስሜት እኩል ሲደወልልኝና የደወልኩት ስልክ ሲጠራ እደሰታለሁ…›› ያለኝ ደላላው ጓደኛዬ ነው። እውነቱን ነው የደላላ ስልክ ካልሠራ ገቢ የለም፡፡ ‹‹ኖ መኒ ኖ ፈኒ›› ሆነ ማለት ነው፡፡ ልክ ስልኩን አንስቼ ሳነጋግራት፣ ‹‹ለጥምቀት ጭፈራ በእጮኝነት ዘመናችን ትወስደኝ እንደነበረው ናና አሁንም ጃንሜዳ ይዘኸኝ ሂድ…›› አለችኝ። ወይ ማንጠግቦሽ? አያችሁ ትዝታ መልሶ ሲወስዳት፡፡ ትዝታን ብንሸሸው መልሶ ጉያው ውስጥ ይከተናል ማለት ነው? እኔም ዘመኑ የሥራ መሆኑን ነግሬ ሳበቃ ብቻዋን ብትሄድ እንደማልከፋ ነገርኳት። በሐርሞኒካ ጭፈራ ማንጠግቦሽ የሚችላት ስላልነበር ስንቱን ታውረገርገው እንደነበር ደጋግማ ጥምቀት በመጣ ቁጥር አጫውታኛለች። ዛሬ እርጅና እየመጣ ጉልበት እንደ ልጅነት አልሆን ቢልም ሰው ነንና የሚያምረን ብዙ ነው። በአጉል አምሮት ውስጥ ደግሞ መሳቀቅ አለ። እናማ ብቻሽን ብትሄጂ ብዬ ማለቴ አንገብግቧት ነው መሰለኝ በጥምቀት ምድር ዘግታኝ ዋለች። ከባህልና ከልማድ ጋር የዘመኑ ሩጫ እንዲህ ሲያላትም ጊዜ ይፈታዋል ከማለት ውጪ አማራጭ ይኖራል? የደላቸው ሦስት ቀን እንደነገሩ ሠርተው አራት ቀን ያርፋሉ፡፡ ገንዘቡ ከየት ይሆን የሚገኘው? ይኼ የመሬት ወረራና የዘረፋ ገንዘብ ከቅንጦት አልፎ ደም እያፋሰሰ ነው የሚባለው እኮ እውነት ነው፡፡ ባይሆንማ ኖሮ የሁለት ግለሰቦች ጠብ የብሔር ግጭት አይቀሰቅስም ነበራ!

በሉ እንሰነባበት። በለስ ቀንቶኝ ቦቴውን አሻሽጬ ጠቀም ያለ ገንዘብ ቆጠርኩ። ያሻሻጥኩለት ሰው የዕድሜውን ግማሽ ነዳጅ ሲያመላልስ ቢኖርም፣ ነዳጅ መፈለግ እንጂ በበቂ መጠን ማግኘት ያቃተን ምስኪኖች ስለሆንን ቅር እንዳይልህ ብሎ ያሰበልኝ ኮሚሽን ከበቂ በላይ ሆኖብኛል። አባባሉ የብዙዎቻችንን ምኞት ይወክል ይሆን ብዬ መብሰልሰሌ ግን አልቀረም። ይኼንን ጥያቄ የተለመደችው ግሮሰሪያችን ቀዝቃዛ ቢራችንን እየተጎነጨን፣ ‹‹በጦርነትና በብልሹው ፖለቲካችን ምክንያት የጠቆረው ስማችን አሁን በአንፃራዊ ሰላም መነሳት ጀምሯል፡፡ አሁን የቀረን አንድ ነገር ብቻ ነው…›› አለኝ ምሁሩ የባሻዬ ልጅ፡፡ ቀና ብዬ፣ ‹‹ምንድነው እሱ?›› በማለት ጥያቄ አቀረብኩለት፡፡ ‹‹በኢትዮጵያዊ ጨዋነት የታጀበ ብሔራዊ አንድነት፡፡ ከጥላቻና ከንቀት የተላቀቀ መከባበር፡፡ ሁሉም በእኩልነትና በባለቤትነት ስሜት የሚኖርባትን ዴሞክራሲያዊት አገር ዕውን ማድረግ፡፡ ከዚያ ዜጎች በአገራቸው አንገታቸውን ቀና አድርገው እንዲራመዱ ምኅዳሩን ማመቻቸት፡፡ ዋናው አንገትን አንዴ ቀና ማድረግ ነው። ከዚያ በኋላ ጉዞው አባጣ ጎርባጣ የሌለበት ሜዳ ነው…›› ብሎኝ ሲያበቃ ቺርስ ተባባልን። እስቲ ፖለቲከኞችም ቂም በቀላቸውን ትተው ቺርስ ይባባሉ፡፡ የተወጠረው አየር ተንፈስ ብሎ እኛም ንፁህ አየር እንማግ፡፡  ስለዚህ የተኳረፋችሁ፣ ጀርባ ለጀርባ የተሰጣጣችሁ፣ በአሉባልታና በሐሜት የተለያያችሁ፣ በጠመንጃ አገር ለማፍረስ የምትባዝኑና ባልበሰለ አስተሳሰብ ታሪክ የምታዛቡ ተቀራረቡና “ቺርስ” ተባባሉ፡፡ ብትፈልጉ በውኃ፣ በወይን፣ በፈለጋችሁት፡፡ እናንተንም “ቺርስ” ብያለሁ፡፡ ለጤናችን! መልካም ሰንበት!

Latest Posts

- Advertisement -

ወቅታዊ ፅሑፎች

ትኩስ ዜናዎች ለማግኘት