Monday, February 6, 2023
- Advertisement -
- Advertisement -
ማኅበራዊየጥምቀት በዓልና የመዲናዋ ወጣቶች ሚና

የጥምቀት በዓልና የመዲናዋ ወጣቶች ሚና

ቀን:

በአበበ ፍቅር

ቁጥራቸው በርከት ያሉ ወገኖች ወደ አደባባይ በመውጣት ከሚያከብሯቸው በዓላት መካከል ጥምቀት ቀዳሚውን ሥፍራ ይይዛል፡፡

በዓሉ በአዲስ አበባ ጃንሜዳ፣ በጎንደር ፋሲለደስና በተለያዩ የአገሪቱ አካባቢዎች በተለይም በኦርቶዶክስ እምነት ተከታዮች ዘንድ በስፋትና በድምቀት ታስቦ ይውላል፡፡

የውጭ አገር ጎብኚዎችን ቁጥር በመጨመር የቱሪዝም እንቅስቃሴው እንዲነቃቃ የኢትዮጵያ ኦርቶዶክስ ተዋሕዶ ቤተ ክርስቲያን ትልቅ አስተዋጽኦ እያበረከተች እንደሆነ ጥምቀትን ምክንያት በማድረግ የሚመጡ ቱሪስቶችን ማየት በቂ ማስረጃ ነው፡፡

የጥምቀት በዓል በመዲናዋ በአዲስ አበባ ያማረና የሰመረ ሆኖ በሰላም ተጀምሮ በሰላም ይጠናቀቅ ዘንድ ከከተራ እስከ ቃና ዘገሊላ ያለውን ጊዜ ደከመን ሰለቸን ሳይሉ ለበዓሉ ድምቀት ዘብ የሚቆሙ በየዓመቱ ከ17 ሺሕ በላይ በጎ ፈቃደኛ ወጣቶች ዝግጅት ያደርጋሉ፡፡

እንደተለመደው የዘንድሮው የጥምቀት በዓልም በሰላም ተጀምሮ በሰላም ይጠናቀቅ ዘንድ የመዲናዋ ወጣቶች ከመንግሥት የፀጥታ አካላት ጋር በመሆን ጉልህ አስተዋጽኦ አድርገዋል፡፡ በዚህም በዓሉ ያለምንም የፀጥታ ችግር በከፍተኛ ድምቀት መከበሩ ተገልጿል፡፡

የጥምቀት በዓል ከመድረሱ ቀደም ብለው ሰፊ ዝግጅትን እንደሚያደርጉ የተናገሩት ወጣቶቹ በዓሉ ከዓምናው በተሻለ እንዴት መከበር እንዳለበት ዝግጅት በማድረግ ካለፈው የተሻሉ የፈጠራ ሥራዎችን በመጨመር የአንዱ ደብር ከሌላው ደብር ለመለየት መንፈሳዊ ቅናት እንደሚያድርባቸው ይናገራሉ፡፡

ከተማዋን እንደ ስሟ አዲስ ለማድረግ ከሰፋፊ ጎዳናዎቿ እስከ ውስጣ ውስጥ መንገዶቿ ከቤት እስከ ደጅ አጥር ቅጥሯ ሳይቀር በወጣቶቿ ትጋት ትፀዳለች፡፡

ታቦታት ከየደብራቸው በካህናት አባቶች ያሬዳዊ ዜማና ሽብሸባ ታጅበው በሰንበት ትምህርት ቤት ሕፃናትና ወጣት ዘማሪዎች ደምቀው በውኃ ከታጠበው አስፋልት ላይ በረጅሙ በተዘረጋው ቀይ ምንጣፍና በተጎዘጎዘው ቄጤማ ላይ ሲያልፉ ነጭ በነጭ በለበሱ ምዕመን በእልልታና በአምልኮት ስግደት በታላቅ ክብር ይቀበሏቸዋል፡፡

የሰንበት ትምህርት ቤት ተማሪዎች በበገና በከበሮ በዋሽንትና በነጋሪት አጅበው ጉዞውን ያማረና የሰመረ ያድርጉታል፡፡

ይህንን የአደባባይ በዓል ከዓመት ወደ ዓመት የሰዎችን ትኩረት እየሳበ የጎብኚዎችን ቁጥር ከፍ ከሚያደርጉባቸው ተግባራቶች መካከል ወጣቶች ተደራጅተው የሚሠሯቸው ሃይማኖታዊ ይዘትና ምሳሌ ያላቸው ቅርጻ ቅርጾች ናቸው፡፡

ቅዱስ መስቀሉን ጨምሮ ልዩ ልዩ የቤተ ክርስቲያን ንዋየ ቅዱሳን መገልገያዎች በልዩ ጥበብ ከረዣዥም ብረቶችና እንጨቶች በቅርጻቸው ተሠርተው ከፍ ብለው ለሕዝቡ ሁሉ ይታያሉ፡፡

አክሱምና ላሊበላ፣ ግሸን ማርያምና ጽዮን ማርያም እንዲሁም ሌሎች ገዳማት ዋሻዎችና በሮች የቤተ ክርስቲያን ጉልላቶች በጠቢባን ባለሙያዎች እጅ ተቀርጸውና ከቦታ ቦታ በቀላሉ እንዲንቀሳቀሱ ተደርገው ከሃይማኖታዊ መገለጫው ባሻገር የተመልካችን ትኩረት ይስባሉ፡፡

ወጣቶች የቀደመውን የቤተ ክርስቲያን ጥበብ ለመዘከር፣ እንዲሁም አሁን ላይ ላለው ትውልድ የቤተ ክርስቲያን ትውፊትን ያላወቀ እንዲያውቃቸው፣ ያወቀ ደግሞ እንዲንከባከባቸው መገኛቸው ድረስ በመሄድ በአካል እንዲጎበኛቸው በሩን የሚከፍቱ ናቸው ተብሏል፡፡

ሌላው በበዓሉ ላይ የአብነት (የቆሎ) ተማሪዎች በቤተ ክርስቲያን ውስጥ ያለውን ሃይማኖታዊ የትምህርት አሰጣጥ ዘዴ ለምዕመኑ ለማሳየት ሲጥሩ ይታዩ ነበር፡፡

አጎዛ በመልበስ ከየኔታ እግር ሥር ተቀምጠው ‹‹ሀ›› ግዕዝ ‹‹ሁ›› ካዕብ፣ ‹‹ሂ›› ሣልስ፣ ‹‹ሃ›› ራብዕ፣ ‹‹ሄ›› ኃምስ፣ ‹‹ህ›› ሳድስ፣ ‹‹ሆ›› ሳብዕ በማለት ብራና ላይ ያሉ ፊደላትን ሲቆጥሩ ቅኔን ከነፍችው የሚዘርፉ የአብነት ተማሪዎች በተለይም የቀደመውን ጊዜ ለማስታወስ ሲሞክሩ ነበር፡፡

የኔታም ወንበራቸው ላይ ተቀምጠው የሚያጠፋውን በጭራቸው ቀንድ ሲኮረኩሙ፣ ቀለም በጊዜ የሚይዘውን ሲያበረታቱ ያሳያሉ፡፡

ወጣቶች በዚህ መልኩ የቤተ ክርስቲያኗን ታሪካዊ ቅርስና ማንነቷን በአደባባይ ለሁሉም ምዕመንና ለውጭ እንግዶች ብዙ የለፉበትንና የደከሙበትን ሥራ አቅርበዋል፡፡

እግዚእነ ኢየሱስ ክርስቶስ በትህትና ዝቅ ብሎ የሁሉ ፈጣሪ ሆኖ ሳለ በመጥምቁ ዮሐንስ እጅ እንደተጠመቀ በመጽሐፍ ቅዱስ ላይ ያለውን ቃል የሃይማኖት አባቶች በየዓመቱ ያስተምራሉ፡፡

ከአስተምሮቱ የተነሱት የአዲስ አበባ በጎ ፈቃደኞች ወጣቶች ታቦተ ሕጉ ከመንበሩ ወጥቶ ተመልሶ እስኪገባ ደከመን ሰለቸን ሳይሉ ታናናሾቻቸውን ዝቅ በማለት፣ ታላላቆቻቸውንም በትህትና አክብረው ሲያገለግሉ መታዘብ ችለናል፡፡

ዘማሪዎችና ካህናት ወጣቶችና ሕፃናት በተዘጋጀላቸው ቦታ በመሆን ታቦትን እንዳጀቡ፣ መገፋፋትና መተፋፈን እንዳይኖር በማድረግ ለበዓሉ በሰላም መጠናቀቅ የወጣቶች ሚና የጎላ ነበር ተብሏል፡፡

የጥምቀት በዓል ከሃይማኖታዊ ሥርዓቱ ባለፈ በሚያማምሩ ባህላዊ ሁነቶች የታጀበ ነበር፡፡ ወጣቶች በጭፈራና በሆታ፣ ልጃገረዶችና ሴቶች በዘፈንና በእስክስታ ችሎታቸውን የሚገልጹበት ሐሳባቸውን የሚያጋሩበት በዓል እንደነበር የበዓሉ ተሳታፊዎች ተናግረዋል፡፡

መዲናዋ የልዩ ልዩ ብሔረሰቦች መገኛ እንደመሆኗ፣ የጥምቀት በዓል ሁሉም የባህል መገለጫ አልባሳታቸውን በመልበስ በተለያዩ ቋንቋዎችና የአጨፋፈር ሥልት ሳቢና ማራኪ በሆነ መንገድ ለሌሎች ሲያስተዋውቁና ሲያዝናኑ ውለዋል፡፡

የዘንድሮ የጥምቀት በዓል በአዲስ አበባ በጃንሜዳና በሌሎች ባሕረ ጥምቀቶች አጥቢያ ቤተ ክርስቲያናት ከሰሜን፣ ከምሥራቅ፣ ከደቡብና ከምዕራብ በተሰባሰቡ ምዕመናን በሰላምና በፍቅር ታስቦ ውሏል፡፡

የበዓሉን በሰላም መጠናቀቅ ምክንያት አድርገው በጃንሜዳ አደባባይ ተገኝተው የመዝጊያ ንግግር ያደረጉት የኢትዮጵያ ኦርቶዶክስ ተዋሕዶ ቤተ ክርስቲያን ፓትርያርክ ብፁዕ ወቅዱስ አቡነ ማትያስ ‹‹እስካሁን የመጣንበት መንገድ ጠመዝማዛና ሻካራ የክፋትና የራስ ወዳድነት መመላለሻ፤›› ነበር ብለዋል፡፡

እስካሁን ፈጣሪን በድለናል ያሉት ቅዱስነታቸው ከዚህ በኋላ በደላችንን በንሰሐ ልናጥብ ይገባል ብለዋል፡፡ ይህ ደግሞ የሚፈጸመው በዕርቅና በፍቅር ብቻ ነው ሲሉ አባታዊ መልዕክታቸውን አስተላልፈዋል፡፡

spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ

የኢትዮጵያ ኦርቶዶክስ ተዋሕዶ ቤተ ክርስቲያንና የመንግሥት ውዝግብ

የጠቅላይ ሚኒስትር ዓብይ አህመድ (ዶ/ር) መንግሥት ባለፉት አራት ዓመታት...

የኢትዮጵያ ካፒታል ገበያ ምሥረታ ዝግጅቶችና ከገበያው የሚጠበቁ ዕድሎች

ኢትዮጵያ ከ50 ዓመት በኋላ ዳግም የምታስጀምረውን የካፒታል ገበያ ዘመኑን...

አዲሱ የብሔራዊ ባንክ ገዥ ትኩረት የሚያደርጉባቸውን ቀዳሚ ጉዳዮች ይፋ አደረጉ

አዲሱ የኢትዮጵያ ብሔራዊ ባንክ ገዥ ትኩረት አድርገው የሚሠሩባቸውን ቀዳሚ...

መንግሥት የደቡብ ሱዳን ታጣቂዎች ድንበር ጥሰው የሚያደርሱትን ጥቃት እንዲያስቆም ተጠየቀ

የሕዝብ ተወካዮች ምክር ቤት የውጭ ግንኙነትና የሰላም ጉዳዮች ቋሚ...