Tuesday, February 7, 2023
- ማስታወቂያ -
- ማስታወቂያ -

የዓለም ባንክ የብሔራዊ መታወቂያ ፕሮጀክትን በፋይናንስ ለመደገፍ ግምገማ እያደረገ ነው

- ማስታወቂያ -

ተዛማጅ ፅሁፎች

በሙከራ ደረጃ በአዲስ አበባና በተወሰኑ የክልል ከተሞች የተጀመረውን የብሔራዊ መታወቂያ ፕሮጀክት ወደ ሙሉ ትግበራ ለማስገባት የሚያስችለውን ፋይናንስ ለመደገፍ፣ የዓለም ባንክ ሒደቱን እየገመገመ እንደሚገኝ ታወቀ፡፡

የዓለም ባንክ ለኢትዮጵያ ዜጎች፣ በተለይም ሁሉን አካታችና ተዓማኒ አገልግሎቶችን በሥርዓት ለመስጠት ያስችላል ተብሎ ወደ ሥራ የገባውን የብሔራዊ ዲጂታል መታወቂያ  አገልግሎትን የገንዘብ ድጋፍ ለመልቀቅ፣ የተቋሙን የቦርድ ውሳኔ እየተጠባበቀ እንደሚገኝ ተሰምቷል፡፡

በገንዘብ ሚኒስቴርና በጠቅላይ ሚኒስቴር ጽሕፈት ቤት ሥር በባለቤትነት የሚመራውን ይህንን ፕሮጀክት፣ የዓለም ባንክን ጨምሮ ሌሎች የፋይናንስ ምንጮች እስከ 300 ሚሊዮን ዶላር ፈሰስ ሊያደርጉበት በሚችሉበት ሁኔታ ላይ እየተጤነ እንደሚገኝ የዓለም ባንክ መረጃ ያሳያል፡፡

በጠቅላይ ሚኒስቴር ጽሕፈት ቤት ሥር የሚገኘው ብሔራዊ የመታወቂያ ፕሮግራም፣ በኢትዮጵያ የዲጂታል መታወቂያን በተወሰኑ ክልሎችና ተቋማት ሙከራ መደረጉን፣ የተገኘውን ውጤት መሠረት አድርጎ በብሔራዊ ደረጃ ለመተግበር ይፋዊ እንቅስቃሴ መጀመሩ ይታወሳል፡፡

ሪፖርተር ከምንጮች እንዳረጋገጠው፣ በሙከራ ደረጃ የተጀመረው ፕሮጀክት ወደ ሙሉ ትግበራ እንዳይገባ ተፅዕኖ ካደረጉ ጉዳዮች መካከል የፋይናንስ እጥረት ዋነኛው ነው ተብሏል፡፡ ለዚህም ማስፈጸሚያ የ120 ሚሊዮን ዶላር የፋይናንስ ድጋፍ ከአገር ውስጥም ሆነ ከዓለም አቀፍ ተቋማት ለማግኘት እንቅስቃሴዎች እየተደረጉ መሆናቸው ተረጋግጧል፡፡

የፕሮጀክት ሥራው ከተጀመረ አራት ዓመታት ያስቆጠረው የብሔራዊ ዲጂታል መታወቂያ አገልግሎት ሙሉ በሙሉ ወደ ሥራ ሲገባ፣ ብሔራዊ ጠቅላላ ምርቱን (ጂዲፒ) በ11 በመቶ ከፍ እንደሚያደርገው ተገልጿል፡፡

በመጪዎቹ አምስት ዓመታት ውስጥ መላው ኢትዮጵያን ያካተተ ምዝገባ እንደሚያደርግ የተነገረለት  የዲጂታል መታወቂያ ፕሮጀክት፣ በተያዘው 2015 ዓ.ም. 12 ሚሊዮን ዜጎችን ተጠቃሚ ያደርጋል ተብሎ እንደሚጠበቅ የዲጂታል መታወቂያ ፕሮጀክት ኃላፊ አቶ ዮዳሄ ዘሚካኤል ከዚህ ቀደም መግለጻቸው ይታወሳል፡፡

ከሁለት ሳምንት አስቀድሞ የዲጂታል መታወቂያ ፕሮጀክቱ ከተጀመረ ወዲህ 1.4 ሚሊዮን ዜጎች የዲጂታል መታወቂያ ምዝገባ ማካሄዳቸው መገለጹ አይዘነጋም፡፡ ከዚህ ቀደም ዜጎች ይህን አገራዊ ዲጂታል መታወቂያ ባለማግኘታቸው የደኅንነት ሥጋት ውስጥ መግባታቸውን፣ እንዲሁም በአገራቸው ላይ የሚተማመኑ እንዳይሆኑ እንዳደረጋቸው፣ የሕዝብ ተወካዮች ምክር ቤት የሕግና ፍትሕ ጉዳዮች ቋሚ ኮሚቴ በብሔራዊ ዲጂታል መታወቂያ ረቂቅ አዋጅ ላይ ታኅሳስ 17 ቀን 2015 ዓ.ም. ባደረገው ውይይት ላይ ተገልጾ ነበር፡፡

‹‹ከፓስፖርትና ከቀበሌ መታወቂያ ጋር እኩል ተቀባይነት ይኖረዋል፤›› የተባለው የዲጂታል መታወቂያ ሥርዓት በኢትዮጵያ ነዋሪ የሆኑ ግለሰቦች መሠረታዊ የሆኑ የግል ዲሞግራፊክና ተፈጥሯዊ የሆነውን የዓይን፣ የጣትና የፊት የባዮሜትሪክ መረጃዎችን በማዕከላዊ ቋት መዝገቦ የሚይዝ ነው፡፡ ማንኛውም ነዋሪ የዲጂታል መታወቂያ ምዝገባ ካከናወነ በኋላ፣ በልዩ ቁጥር የተደራጀና አስተማማኝ የዲጂታል መታወቂያ የሚሰጥበት ሥርዓት ነው።

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች