Monday, February 6, 2023
- ማስታወቂያ -
- ማስታወቂያ -

አንድ ሊትር ቤንዚን በጥቁር ገበያ እስከ 200 ብር እየተሸጠ መሆኑ ተጠቃሚዎችን አማረረ

- ማስታወቂያ -

ተዛማጅ ፅሁፎች

‹‹አቅርቦቱ ሳይስተጓጎል ማደያ ላይ ነዳጅ የለንም እየተባለ ነው››

የነዳጅና ኢነርጂ ባለሥልጣን

‹‹ባለን መረጃ መሠረት የነዳጅ እጥረት የለም››

የነዳጅ አቅራቢ ድርጅት

በኢዮብ ትኩዬ

አንድ ሊትር ቤንዚን በጥቁር ገበያ ከ100 እስከ 200 ብር ድረስ እየተሸጠ መሆኑን ተጠቃሚዎች በምሬት እየተናገሩ ነው፡፡

አዲስ አበባን ጨምሮ በሌሎች የክልል ከተሞች የሚገኙ አሽከርካሪዎች ለሪፖርተር እንደተናገሩት፣ በማደያ ነዳጅ ለመቅዳት በመከልከላቸው ቤንዚን ከቸርቻሪዎች ለመግዛት እንደተገደዱ ነው፡፡

የንግድና ቀጣናዊ ትስስር ሚኒስቴር ከታኅሳስ 30 ቀን 2015 ዓ.ም. ጀምሮ ባደረገው የነዳጅ ምርቶች መሸጫ ዋጋ ማስተካከያ እስከ ጥር 30 ቀን 2015 ዓ.ም. ድረስ አንድ ሊትር ቤንዚን 61 ብር ከ29 ሳንቲም፣ ቀላል ጥቁር ናፍጣ 49 ብር ከ67 ሳንቲም፣ ኬሮሲንና ነጭ ናፍጣ 67 ብር ከ30 ሳንቲም በሊትር እንዲሸጥ መወሰኑ ይታወሳል፡፡

እንደ ተጠቃሚዎች ገለጻ ከሆነ ግን፣ በተለይም ቤንዚን ሚኒስቴር መሥሪያ ቤቱ እንዲሸጥ በወሰነው ዋጋ እየተሸጠ እንዳልሆነ ነው፡፡ አንድ ሊትር ቤንዚን በደቡብ ክልል በአማሮ ልዩ ወረዳ 200 ብር፣ በሐዋሳ፣ በአርባ ምንጭ፣ በወልቃይትና በአሶሳ 150 ብር፣ በሲዳማና በራያ ቆቦ 120 ብር እየተሸጠ መሆኑን አሽከርካሪዎች ለሪፖርተር ተናግረዋል፡፡ ቅሬታ አቅራቢዎቹ አክለውም ቸርቻሪዎች እንጂ አሽከርካሪዎች ከማደያ ለመቅዳት እየተከለከሉ መሆኑን አብራርተዋል፡፡

የነዳጅና ኢነርጂ ባለሥልጣን ማደያዎች ነዳጅ እያለ የለም እንደሚሉና ለሕገወጥ ነጋዴዎች አሳልፈው እንደሚሸጡ አስታውቋል፡፡

የባለሥልጣኑ የሕዝብ ግንኙነት ዳይሬክተር ወ/ሮ በቀለች ኩማ ከማደያዎች ውጪ የሚሸጥ ነዳጅ ሕገወጥ ግብይት መሆኑን ለሪፖርተር ገልጸው፣ ይህንን ድርጊት በየክልል ከተሞች ያሉ የንግድ ቢሮዎች እስከ ወረዳ ድረስ መቆጣጠር አለባቸው ብለዋል፡፡

በሚስተካከለው ዋጋ ጨምሮ ለመሸጥ በየወሩ የነዳጅ ማስተካከያ ሲደረግ፣ አቅርቦቱ ሳይስተጓጎል ማደያዎች ነዳጅ እያለ ‹‹ነዳጅ የለንም›› በማለት ሠልፎች እንዲበዙ እንደሚያደርጉም ወ/ሮ በቀለች ጠቁመዋል፡፡ ይህም ከቸርቻሪዎች ጋር በመመሳጠር ነዳጅን በከፍተኛ ዋጋ ለመሸጥ ምክንያት እንደሆነ ገልጸዋል፡፡

የኢትዮጵያ ነዳጅ አቅራቢ ድርጅት የሕዝብ ግንኙነት ከፍተኛ ባለሙያ አቶ ዓለማየሁ ፀጋዬ በበኩላቸው፣ ‹‹ባለኝ መረጃ መሠረት የእጥረት ችግር የለም፤›› ብለዋል፡፡ ነዳጅ በተወሰነለት ዋጋ እየተሸጠ አለመሆኑንና ተጠቃሚዎች የክልል ከተሞች ማደያዎች ሲሄዱ እጥረት አለ እየተባሉ መሆናቸውን በተመለከተ ከሪፖርተር ለቀረበላቸው ጥያቄም፣ ‹‹በክልል ከተሞች ነዳጅ የሚያስረክቡት በዋናነት ተሽከርካሪዎቻቸውን በየአቅጣጫው ልከው ነዳጅ የሚረከቡ ኩባንያዎች ናቸው፡፡ ምናልባት ጉዳዩን በጥልቀት ለማየትና መረጃውን ለማጣራት ጊዜ ይሰጠን፤›› የሚል ምላሽ ሰጥተዋል፡፡ 

የዋጋ ማስተካከያ በሚደረግበት ወቅት ነዳጅ የጫኑ ቦቴዎች መንገድ ላይ ቆመው የሚዘገዩበት አጋጣሚ የተለመደ መሆኑንና ማጣራትን እንደሚሻም አስረድተዋል፡፡

በተለይ የነዳጅ መሸጫ ዋጋ ማስተካከያ የሚደረግበት ጊዜ ሲቃረብ፣ የዋጋ ለውጡን ለማግኘት ነዳጅ የመደበቅና የማዘግየት ሁኔታዎች እንደነበሩ ያስታወሱት አቶ ዓለማየሁ፣ የነዳጅ ዋጋ ማስተካከያ በሚደረግበት ወቅት ክትትል ማድረግ አስፈላጊ ነው ብለዋል፡፡ አሁን ግን እጥረት እንደሌለ አብራርተዋል፡፡

ኩባንያዎች የነዳጅ ቦቴዎቻቸውን ጂቡቲ ድረስ ልከው ነዳጅ ሲቀዱ፣ መንገድ ላይ የሚፈጠረውን መዘግየት ለመከታተልና ለመቆጣጠር የሚያስችል ሁኔታ አለመኖሩ ሌላኛው ችግር መሆኑንም ጠቅሰዋል፡፡

አቶ ዓለማየሁ አክለውም፣ ለአንድ የነዳጅ ማደያ የሚጭን ተሽከርካሪ የጫነው የነዳጅ ዓይነትና መጠን ለእያንዳንዱ ከተማ ንግድ ቢሮ እንደሚያደርስ፣ የንግድ ቢሮዎችም ‹‹ነዳጁ የት ደረሰ?›› ብለው ክትትል ማድረግ እንዳለባቸው፣ ሌሎች የሚመለከታቸው አካላትም ሥራቸውን በትክክል መሥራት እንዳለባቸው አሳስበዋል፡፡

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች