Tuesday, February 7, 2023
- ማስታወቂያ -
- ማስታወቂያ -

እናት ባንክ ካፒታሉን ወደ አምስት ቢሊዮን ብር ለማሳደግ ወሰነ

- ማስታወቂያ -

ተዛማጅ ፅሁፎች

መጠባበቂያን ሳይጨምር የባንኩ የተጣራ ትረፍ 182 ሚሊዮን ብር ሆኗል

እናት ባንክ የተከፈለ ካፒታሉን በ2.3 ቢሊዮን በመጨመር ወደ አምስት ቢሊዮን ብር ለማድረስ ያቀረበውን ሐሳብ የእናት ባንክ ባለአክሲዮኖች በአብላጫ ድምፅ አጸደቀ፣ ባንኩ በ2014 የሒሳብ ዓመት ከታክስ በፊት 377 ሚሊዮን ብር ማትረፉም ተገለጿል፡፡ 

ባለፈው ቅዳሜ በተካሄደው የባንኩ አስቸኳይ ጠቅላላ ጉባዔ ላይ ከተያዙት አጀንዳዎች መካከል የባንኩን ካፒታል ማሳደግ አንዱ ነበር። በዚህም መሠረት በአሁኑ ወቅት ያለውን የባንኩን 2.7 ቢሊዮን ብር ካፒታል በ2.3 ቢሊዮን ብር በማሳደግ አምስት ቢሊዮን ለማድረስ ለጠቅላላ ጉባዔው የቀረበውን ሐሳብ የባንኩ ባለአክሲዮኖች ተወያይተው በአብላጫ ድምፅ አፅድቀውታል፡፡ በዚሁ ውሳኔ መሠረት ተጨማሪውን 2.3 ቢሊዮን ብር በሁለት ዓመት ውስጥ ለማሟላት ስምምነት ላይ የተደረሰ ሲሆን፣ ከባንኩ ባለአክሲዮኖች የሚተርፈውን አዲስ አክሲዮን ለአዲስ ገዥዎች እንዲሸጥ ክፍት ተደርጓል፡፡ 

እናት ባንከ እስከ እስከ 2014 የሒሳብ ዓመት መጨረሻ ድረስ የተከፈለ ካፒታሉ 1.9 ቢሊዮን ብር የሆነ ሲሆን፣ የሒሳብ ዓመቱ ከተጠናቀቀ በኋላ እስከ ዓርብ ኅዳር 23 ቀን 2015 ዓ.ም. ድረስ የተከፈለ ካፒታል መጠኑ 2.3 ቢሊዮን ብር መድረሱን ከባንኩ ያገኘነው መረጃ ያመለክታል፡፡

እናት ባንክ በተመሳሳይ ቀን ባካሄደው የባንኩ መደበኛ ጠቅላላ ጉባዔው ላይ የ2014 የሒሳብ ዓመት የሥራ አፈጻጸም ሪፖርት የቀረበ ሲሆን፣ በዚህም ባንኩ በ2014 የሒሳብ ዓመት ከታክስ በፊት 377 ሚሊዮን ብር ማትረፉ ተመላክቷል፡፡ የተገኘው የትርፍ መጠን በ2013 የሒሳብ ዓመት ከታክስ በፊት ተገኝቶ ከነበረው 289 ሚሊዮን ብር ያልተጣራ ትርፍ በ88 ሚሊዮን ብር ወይም በ30 በመቶ ብልጫ እንዳለው የባንኩ ፕሬዚዳንት አቶ ኤርሚያስ አንዳርጌ አመልክተዋል፡፡ እንደ ፕሬዚዳንቱ ገለጻ በ2014 የሒሳብ ዓመት የተገኘው የባንኩ የተጣራ ትርፍ 182 ሚሊዮን ብር ነው፡፡ የባንኩ ዳይሬክተሮች ቦርድ ሰብሳቢ ወ/ሮ ፍሬሕይወት ወርቁ እንዳመለከቱት ደግሞ ከባንኩ የተጣራ 182 ሚሊዮን ትርፍ ውስጥ ሦስት በመቶ ለብድር መጠባበቂያ ተይዞ ቀሪው 176.7 ሚሊዮን ብር ለባለአክሲዮኖች እንዲከፋፈል ተወስኗል፡፡

በተጠናቀቀው የ2014 የሒሳብ ዓመት የባንኩ የተቀማጭ ገንዘብ በ16 በመቶ በማደግ 13.1 ቢሊዮን ብር መድረሱንም የቦርድ ሊቀመንበሯ ገልጸዋል፡፡

እናት ባንክ ለተለያዩ የኢኮኖሚ ዘርፎች የሰጠው አዲስ ብድር 2.2 ቢሊዮን ብር መሆኑና ይህም ከቀዳሚው የሐሳብ ዓመት በ25 በመቶ ብልጫ እንዳለው የባንኩ ሪፖርት ያመለክታል። የባንኩ አጠቃላይ የብድር ክምችት መጠን ደግሞ 11.2 ቢሊዮን ብር ደርሷል፡፡

የቦርድ ዳይሬክተሯ ሪፖርት እንደሚያመለክተው፣ ባንኩ የሚሰጠው የብድር መጠን ከዕድገቱ ጋር የተጣጣመና ከክፍለ ኢኮኖሚው ዕድገት አዋጭነት ጋር እየተመረመረ ተመጣጣኝ እንዲሆን ጥረት ተደርጓል።

የባንኩ የብድር መጠን ከተቀማጭ ገንዘብ መጠን ጋር ያለው ምጣኔ 85.5 በመቶ መድረሱን የገለጹት የቦርድ ሊቀመንበሯ፣ ይህም ባንካቸው ያለውን ሀብት በአግባቡ እየተጠቀመ ተገቢውን ወለድ እየሰበሰበና የወለድ ገቢውን እያሳደገ መሆኑን ያሳያል ብለዋል፡፡

ባንኩ ከአዲስ ባንኮች መግባትና ከወደፊት ዕጣ ፈንታው አንፃር የተለያዩ አማራጮችን የሚያይ መሆኑን የገለጹት የቦርድ ሊቀመንበሯ በዋናነት ግን ባንካቸው ራሱን ችሎ እንዲቀጥል አስፈላጊውን ሁሉ የሚያደርጉ ስለመሆኑ አስታውቀዋል፡፡

‹‹ባንኩ ውህደትም ቢሆን እንደማይፈራ›› ያመለከክቱት የባንኩ ፕሬዚዳንት አቶ ኤርሚያስ በበኩላቸው፣ ‹‹ዋናው እምነታቸውና ተግባራቸው ‹‹እናት ባንክ›› የሚለውን ስም ይዞ መቀጠል ነው፣ ለዚህም የባለአክሲዮኖች ትብብር ከታከለበት ይሳካል፤›› ብለዋል።

እናት ባንክ እስከ 2014 መጨረሻ ድረስ አጠቃላይ የባለአክሲዮኖቹ ቁጥር 20,558 ደርሷል፡፡ ከዚህ ውስጥ 13,017 ወይም 63 በመቶ የሚሆኑት ሴት ባለአክሲዮኖች ናቸው፡፡ ባንኩ ካለው ካፒታል ውስጥ ደግሞ የቤት አክሲዮኖች ድርሻ 58 በመቶ ስለመሆኑም የባንኩ መረጃ ያመለክታል፡፡

የእናት ባንክ አጠቃላይ የሀብት መጠን 17.2 ቢሊዮን ብር የደረሰ ሲሆን፣ ይህም ከቀዳሚው ዓመት የ1.8 ቢሊዮን ብር ጭማሪ አሳይቷል፡፡ የቅርንጫፎቹ ቁጥር ደግሞ 104 የደረሰ ሲሆን አጠቃላይ ሠራተኞቹ ከ978 በላይ መሆናቸው ታውቋል፡፡

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች