[የተቃዋሚ ፓርቲው ትይዩ ሚኒስትር ክቡር ሚኒስትሩ ጋ ደውለው መንግሥት በሙሰኞች ላይ ለመውሰድ ስላሰበው የሕግ ዕርምጃ ሐሳብ እየተለዋወጡ ነው]

• ሄሎ… ማን ልበል?
• ጤና ይስጥልኝ ክቡር ሚኒስትር?
• ጤና ይስጥልኝ… ማን ልበል?
• የእርስዎ ትይዩ ነኝ፡፡ 
• አቤት?
• ያው ፓርቲዬን ወክዬ የፍትሕ ሚኒስትሩ ትይዩ ነኝ ማለቴ ነው፡፡
• ኦ… ገባኝ… ገባኝ… 
• ትንሽ ግራ አገባሁዎት አይደል?
• ትይዩ ስትል መጠሪያ ስምህ መስሎኝ ማነው ብዬ እኮ ነው ትንሽ ግር ያለኝ።
• ገብቶኛል… ያው በስም አያውቁኝም ብዬ ነው…
• አሁንማ አወቅኩህ… አቻዬ ነህ…
• ኪኪኪ… ያው የደወልኩት አንድም አድናቆቴን ለመግለጽ፣ አንድም ያልገቡኝ ጉዳዮችን እንዲያብራሩልኝ ነው።
• መልካም፣ ደስ ይለኛል፡፡
• በመጀመሪያ ሙሰኞችን ለመመንጠር ሰሞኑን ያሳለፋችሁትን ውሳኔ ፓርቲያችን እንደሚያደንቀውና በእጅጉ እንደሚደግፈው ልገልጽልዎት እወዳለሁ። 
• አመሠግናለሁ፣ ያው እንደምታውቀው ትግሉ ለመንግሥት ብቻ የሚተው ሳይሆን የጋራ ኃላፊነታችን መሆን አለበት። 
• እስማማለሁ ክቡር ሚኒስትር፣ ነገር ግን አንዳንድ ግልጽ ያልሆኑልኝ ጉዳዮች አሉ። 
• ጥሩ፣ ምንድነው ግልጽ ያልሆነልህ?
• ክቡር ሚኒስትር ሙስናን ለመዋጋትም ሆነ በሙሰኞች ላይ ዕርምጃ የመውሰድ ኃላፊነት የተሰጣቸው ተቋማት እያሉ፣ ለምን ጉዳዩን በኮሚቴ ለመሥራት እንደፈለጋችሁ ግልጽ አልሆነልኝም፡፡
• ልክ ነው፣ ከተቋቋመ ረዥም ዓመታትን ያስቆጠረ የፀረ ሙስና ኮሚሽን አለን፣ በተጨማሪም እንዲህ ዓይነት ወንጀሎችን ተከታትሎ ተጠያቂነትን የሚያሰፍን የዓቃቤ ሕግ ክፍል በፍትሕ ሚኒስቴር ውስጥ አለ። 
• እኮ ለዚህ ነው እኔም በኮሚቴ መሥራት ለምን ተፈለገ የሚል ጥያቄ የጫረብኝ። 
• ጥያቄው መናሳቱ ተገቢ ነው፣ ግን ኮሚቴው የተቋቋመው ድጋፍ ለማድረግ እንጂ የሕግ ማስከበር ሥራው ሕጋዊ ሥልጣን በተሰጣቸው ተቋማት ነው።
• ኮሚቴው የምን ድጋፍ ነው የሚሰጠው? 
• እንምታውቀው የሙስና ወንጀል በረቀቀ መንገድ ነው የሚፈጸመው፣ የመንግሥት ተቋማት ኃላፊዎችና የፋይናንስ ተቋማት የመሳሰሉት ይሳተፉበታል። 
• አዎ፣ ልክ ነው።
• ስለዚህ ኮሚቴው በየዘርፉ ሙያዊ ድጋፍ እንዲያደርግ ታስቦ ነው የተቋቋመው፣ የኮሚቴ አባላቱን ስብጥርን ብትመለከትም ይህንኑ ነው የሚጠቁምህ። 
• አሃ… አሁን ግልጽ ሆኖልኛል፣ ቢሆንም ግን ኮሚቴው ሌላ ተልዕኮ እንደሌለው የምንከታተለው ይሆናል። 
• የምን ተልዕኮ? 
• በሕግ መጠየቅ ያለባቸውን ሙሰኞችን የማመጣጠን ተልዕኮ፡፡
• የምን ምጥጥን?
• የብሔር፡፡
• አይ… እንዲያ እንኳ አይደለም፣ ግን…
• ግን ምን ክቡር ሚኒስትር?
• እንደምታውቀው ሙሰኞች ልትነካቸው መሆኑን ሲያውቁ ብሔራቸውን መሸሸጊያ ያደርጋሉ።
• ሊሆን ይችላል።
• ሊሆን ይችላል ሳይሆን እንደዚያ ነው የሚያደርጉት።
• ስለዚህ?
• አንድን ሕገወጥ ድርጊት እናስቆማለን ብለን የባሰ ችግር እንዳንፈጥር ጥንቃቄ ማድረግ አለብን ለማለት ነው። 
• በጥንቃቄ መፈጸሙን ማነው የሚያረጋግጠው?
• ኮሚቴው!

[ክቡር ሚኒስትሩ ወደ መኖሪያ ቤታቸው ገብተው ገና አረፍ እንዳሉ ባለቤታቸው በአግራሞት እየታዘቧቸው መሆኑን አስተዋለው ምን ተፈጠረ ሲሉ ጠየቁ]

• ምነው? ምን ተፈጠረ?
• በቴሌቪዥኑ የሰማሁት አንድ ዜና አስደንግጦኝ ነው፡፡ 
• በመንግሥት ቴሌቪዥን ነው?
• አዎ።
• በመንግሥት ቴሌቪዥን የሚያስደነግጥ ዜና? 
• ለማስደንገጥ ብለው ላይሆን ይችላል ግን… 
• ግን ምን?
• እኔን አስደንግጦኛል፣ እንዲሁም አስገርሞኛል…
• ዜናው ሰለምን ጉዳይ ነው? 
• የእናንተው ጉድ ነው፣ እናንተ የማታመጡብን ነገር ምን አለ?
• ለምን በግልጽ አትነግሪኝም?
• ወጣቶችን ወደ ብሔራዊ ውትድር ልታስገቡ ስለመሆኑ ነዋ፡፡
• ታዲያ ምኑ ነው የሚያስደነግጠው?
• እንዴት አያስደነግጥም? በደርግ ዘመን በነበረው ብሔራዊ ውትድርና ስንት ቤተሰብ እንደተንገላታ ዘንግተኸው ነው?
• ይኼኛው እኮ ለየት ያለ ነው። 
• ምኑ ነው የሚለየው?
• አንደኛ ስያሜው የተለየ ነው። 
• ስያሜው ምንድነው ታዲያ? 
• ብሔራዊ አገልግሎት ነው። 
• ሁለተኛስ? 
• ሁለተኛ በዓላማው ይለያል፣ ሦስተኛ…
• እሺ ሦስተኛስ?
• ሦስተኛ አስገዳጅ አይደለም። 
• እሺ እኔ በተራዬ ልጠይቅህ?
• ስያሜው ብሔራዊ አገልግሎት ነው ስትል ምን ማለትህ ነው? ለምን አገልግሎት ነው የሚመለመሉት?
• እሱማ ለውትድርና አገልግሎት ነው።
• ታዲያ ምኑ ነው የሚለየው?
• የውትድርና አገልግሎት ቢሆንም ለውጊያ ተፈልገው አይደለም። 
• እሱንማ ዛሬ አትገልጹትም። 
• እንዴት? እና መቼ ነው የምንገልጸው?
• ጦርነት ሲመጣ ነዋ፡፡
• እንደ ተቃዋሚ ፓርቲ መጠራጠር አይለቅሽም፡፡
• እሱን ተወውና ጥያቄዬን መልስ፡፡
• መቼ አልመልስም አልኩኝ? ጠይቂኝ?
• ዓላማው የተለየ ነው ብለሃል።
• አዎ፣ ዓላማው የተለየ ነው።
• በምንድነው የሚለየው?
• ዓላማው ወጣቶችን ማነፅ ነው፣ አገራቸውን እንዲወዱ ማድረግ፣ አገራቸውን እንዲያውቁ ማድረግና ጥሩ ሥነ ምግባር የተለባሱ ዜጎችን ማፍራት ነው። 
• እሱ እንኳ ጥሩ ነገር ነው ግን…
• ግን ምን? 
• በውትድርና ካልሆነ በሌላ መንገድ ማነፅ አይቻልም? 
• ይቻላል ነገር ግን ዓለም አቀፍ ተሞክሮዎች የሚያሳዩት በውትድርና ቤት ሲሆን በተሻለ ፍጥነት ጥሩ ዲሲፕሊን ያለው አገሩን የሚወድ ትውልድ መቅረፅ እንደሚቻል ነው።
• በተሻለ ፍጥነት ስትል በምን ያህል ጊዜ ነው? 
• እኛ ያሰብነው የሁለት ዓመት አገልግሎት እንዲሰጡ ነው። 
• ሁለት ዓመት? 
• አዎ፣ ሁለተኛ ደረጃ የጨረሱ ወይም ዩኒቨርሲቲ ያጠናቀቁ ወጣቶች ሥራ ከመጀመራቸው በፊት ብሔራዊ አግልግሎት እንዲሰጡ ይደረጋል። 
• ሁለት ዓመት በጣም አልበዛም? የቀለም ትምህርቱን አይዘነጉትም? 
• አይዘነጉትም፣ እንዲያውም የበለጠ ያዳብሩታል። 
• ወይ ጉድ፡፡ 
• ለምን ወይ ጉድ?
• አንድ ጥሩ ነገር ያለው አስገዳጅ አለመሆኑ ብቻ ነው፣ አስገዳጅ አይደለም ብለሃል አይደል? 
• አዎ፣ አስገዳጅ አይደለም፣ ግን…
• ግን ካልክማ አስገዳጅ ነው ማለት ነው።
• አይ አስገዳጅ አይደለም፡፡ 
• ታዲያ ለምን ግን አልክ? ምን ልትል ነበር?
• ግን ትምህርቱን የጨረሰ ወጣት ብሔራዊ አገልግሎት ወስዶ አገሩን ካላወቀ በመንግሥት ተቋም ውስጥ ሥራ አይቀጠርም፡፡ 
• ስለዚህ አስገዳጅ አይደለም? 
• አስገዳጅ አይደለም!