[ክቡር ሚኒስትሩ ወደ ከተማ አስተዳደሩ ከንቲባ ጋር ደውለው ልማታዊ ወጣቶች ያቀረቡት አቤቱታ በአፋጣኝ መፍትሔ እንዲሰጠው እያሳሰቡ ነው]

• እየደገፉን ያሉ አንዳንድ ልማታዊ ወጣቶች በከተማ አስተዳደሩ ላይ ቅሬታ አቅርበዋል።
• እኛ ላይ? 
• አዎ! 
• ቅሬታቸው ምንድነው? ለምን ለእኛ አላሳወቁንም?
• የሚሰማቸው ስላላገኙ ነው ቅሬታቸውን ወደ እኛ ይዘው የመጡት። 
• እስኪ ነገሩን አጣራለሁ ለማንኛውም ቅሬታቸውን ይንገሩኝ?
• እንደ ልማታዊ ወጣት ለመንግሥት ድጋፍ እያደረግን ቢሆንም በከተማ ውስጥ የመኖሪያ ቤት የምንገነባበት መሬት ልናገኝ አልቻልንም ነው የሚሉት። ይህ ደግሞ ሆነ ተብሎ የተፈጸመባቸው እንደሆነ ነው የሚያነሱት።
• ክቡር ሚኒስትር ከተማው ውስጥ የመኖሪያ ቤት መሥሪያ ቦታ እጥረት እንዳለ ያውቃሉ አይደል? ባይሆን ጥያቄያቸውን በሌላ መንገድ መፍትሔ እንዲያገኝ ብናደርግ አይሻልም?
• ሌላ መንገድ ማለት?
• ባዶ የሆኑ የኮንዶሚኒየም ቤቶች ካሉ ፈልገን እንዲያገኙ ማድረግ እንችላለን።
• ኮንዶሚኒየም ቤትማ በራሳቸው መከራየት ይችላሉ ወይም …
• ወይም ምን ክቡር ሚኒስትር?
• ወይም ሊገዙ ይችላሉ።
• እንደዚያ ማድረግ እየቻሉ ለምን በእኛ ላይ ቅሬታ ያቀርባሉ ታዲያ? 
• ለመኖሪያ ቤት መሥሪያ መሬት እንዲሰጣቸው ጠይቀው በመከልከላቸው አልኩኝ እኮ፣ አልሰሙኝም?
• ክቡር ሚኒስትር ኮንዶሚኒየም ቤት መከራየት ወይም መግዛት እየቻሉ መሬት እንዲሰጣቸው መጠየቃቸው በራሱ ትክክል ነው ብለው ያምናሉ? 
• እንዴት? ድጋፍ የሚያደርጉልን ልማታዊ ወጣቶች ናቸው እያልኩኝ አይደለም እንዴ? 
• እህ… እንደዚያ ነው?
• እንዲያውም እነሱ ሳይጠይቁ ነበር መሬት እንዲያገኙ ማድረግ የነበረባችሁ። ስለዚህ በአስቸኳይ አስተናግዷቸው።
• ክቡር ሚኒስትር ጥያቄውን እናስተናግዳለን ነገር ግን
• ግን የሚባል አልቀበልም፡፡
• ክቡር ሚኒስትር ለምን መሰልዎት…?
• እህ…
• በአሁኑ ወቅት ያለውን መሬት ወረራ ለመከላከል ብለን የመሬት ጥያቄዎችን እያስተናገድን አይደለም። 
• በልዩ ሁኔታ የምታስተናግዱት እንዳለ ሰምቻለሁ።
• የተፈናቀሉ አርሶ አደሮችን ጥያቄ ብቻ ነው በልዩ ሁኔታ እያስተናገድን ያለነው።
• ቢሆንም እነሱንም በዚሁ መንገድ ማስተናገድ ትችላላችሁ፣ ከላይ የወረደ ትዕዛዝ ነው!
• ልማታዊ ወጣቶች ናቸው አላሉም እንዴ ክቡር ሚኒስትር? 
• አዎ፣ ልክ ነው።
• ታዲያ አርሶ አደሮች ካልሆኑ ምን ብለን እናስተናግዳቸዋለን?
• የአርሶ አደር ልጆች። 

[ክቡር ሚኒስትሩ ወደ ቢሯቸው እንደገቡ አማካሪያቸው ፊቱ በፈገግታ ተሞሎቶ እንኳን ደስ አለዎት ክቡር ሚኒስትር እያለ ወደ ቢሯቸው ገባ]

• ፊትህ በፈገግታ ደምቋል፣ ምን አዲስ ነገር አለ? 
• በጣም ደስ የሚል ነገር ነው የሰማነው ክቡር ሚኒስትር። እንኳን ደስ አለዎት፡፡
• ምን ሰምተህ ነው? 
• ውርጅብኙ ሲበዛባቸው ያቀረቡትን ጥሪ ሰምቼ ነው። 
• ጁንታዎቹን ማለትህ ነው? አዲስ ነገር ጥሪ አቀረቡ እንዴ? 
• አልሰሙም እንዴ? ጡጫው ሲበዛባቸው እኮ 
• የአፍሪካ ኅብረትን አደራዳሪነት እንቀበላለን አሉ፡፡ 
• አይ አንተ! ቀድሞውንስ መቼ የአፍሪካ ኅብረት አያደራድረንም አሉ? 
• የአፍሪካ ኅብረትን ሲያንቋሽሹ አልነበረም አንዴ? አሜሪካንን ጨምሮ የተለያዩ የውጭ መንግሥታትም የአፍሪካ ኅብረት አደራዳሪነትን መቀበሉን በማድነቅ መግለጫ ማውጣታቸውን አይቻለሁ። 
• ሆነ ብለው እያደናገሩ ነው እንጂ እስካሁን ድረስ ሲያደራድረን የቆየው የአፍሪካ ኅብረት ነው። 
• ታዲያ አዲሱ ነገር ምንድነው? 
• ምንም አዲስ ነገር የለም።
• ምን የተለየ ነገር የለም? 
• አዎ። በፊትም ቢሆን የአፍሪካ ኅብረት አደራዳሪነትን አለመቀበል ችግር እንደሚያመጣባቸው ስለሚያውቁ ኅብረቱን አንቀበልም አላሉም። ኅብረቱ የሾማቸው አደራዳሪ ላይ ግን የማጥላላት ዘመቻ ከመክፈት ባለፈ እርሳቸውን በአደራዳሪነት አንቀበልም ብለዋል።
• አሁን ግን ይህንን አቋማቸውን የቀየሩ ይመስለኛል። አይደል ክቡር ሚኒስትር? 
• ምንም ዓይነት የአቋም ለውጥ አላደረጉም።
• በናይጄሪያዊው ሰውዬ ላይ የነበራቸው አቋምም አልተቀየረም? 
• በፍጹም! ያወጡት መግለጫ ምን መሰለህ የሚለው?
• እሺ… እየሰማሁ ነው ይቀጥሉ ክቡር ሚኒስትር?
• በአፍሪካ ኅብረት የሚመራ የሠላም ሒደትን እንቀበላለን። ኅብረቱ ሁለቱም ወገኖች ተስማምተው የተቀበሉትን አደራዳሪ መሾም አለበት ነው የሚለው።
• ለምንድነው ታዲያ ዓለም አቀፉ ማኅበረሰብ ጁንታውን እያወደሰ ያለው? 
• መንግሥት የቀረበለትን የሰላም ጥሪ ወደ ጎን ገፋ በማለት ዘመቻ ለመክፈት ስለፈለጉ ነው።
• መንግሥት በማንኛውም ቦታና ጊዜ ያለ ቅደመ ሁኔታ የተኩስ አቁም እንዲደረግ ለአፍሪካ ኅብረት ጥሪ ማቅረቡን አያውቁም እንዴ? 
• ያውቃሉ! 
• ታዲያ ለምን ጁንታው ይህንን እንዲቀበል ጥሪ አላቀረቡም? 
• ጁንታው የሚፈልገውን ነገር የያዘ ባለመሆኑ ይመስለኛል። 
• ጁንታው የሚፈልገው ምንድነው?
• ቅድመ ሁኔታ!