Friday, September 30, 2022
ሌሎች ዓምዶች
    - Advertisement -
    - Advertisement -
    ስፖርትውዝግቡ የቀጠለው የኢትዮጵያ የእግር ኳስ ፌዴሬሽን አመራሮች ምርጫ

    ውዝግቡ የቀጠለው የኢትዮጵያ የእግር ኳስ ፌዴሬሽን አመራሮች ምርጫ

    ቀን:

    የኢትዮጵያ እግር ኳስ ፌዴሬሽን ፕሬዚዳንትና የሥራ አስፈጻሚ ኮሚቴ ምርጫ ነሐሴ 21 እና 22 ቀን 2014 ዓ.ም. በጎንደር ከተማ እንደሚደረግ ሲጠበቅ፣ በፌዴሬሽኑ የአደጋ (ኤመርጀንሲ) ኮሚቴ ውሳኔ የምርጫው ቦታ አዲስ አበባ እንዲሆን መወሰኑ ታውቋል፡፡ የፌዴሬሽኑ የአደጋ ኮሚቴ ለዚህ ምክንያት ብሎ ያስቀመጠው፣ ከክልሉ ለኢትዮጵያ እግር ኳስ ፌዴሬሽን የጠቅላላ ጉባዔ ሥራ ለሚያከናውኑ ሠራተኞች ስልክ በመደወል፣ ከክልሉ ክለቦች የተላኩ የጠቅላላ ጉባዔ አባላት ወኪሎችን ስም እንዲቀይሩ፣ ይህ የማይሆን ከሆነ ግን ጉባዔው እንዲስተጓጎል እንደሚያደርግ ማስፈራሪያ መድረሱን ተከትሎ ባደረገው ማጣራት እንደሆነ ይፋ አድርጓል፡፡ ነሐሴ 21 እና 22 ቀን 2014 ዓ.ም. የሚከናወነው የኢትዮጵያ እግር ኳስ ፌዴሬሽን ጠቅላላ ጉባዔ፣ በጎንደር ከተማ እንዲደረግ ውሳኔ ያሳለፈው ጠቅላላ ጉባዔ ሆኖ ሳለ፣ ፌዴሬሽኑ በሥራ አስፈጻሚ ኮሚቴው ያውም ኮረም ሳይሟላ ቀርቦ ጉዳዩን በአደጋ ኮሚቴ ተመልክቶ፣ ጠቅላላ ጉባዔ የሚደረግበትን ቦታ መቀየር አይችልም የሚል ቅሬታውን የአማራ ክልል ለፌዴሬሽኑ አስገብቷል፡፡ ክልሉ የጉባዔው ፕሮግራም የተሳካ ሆኖ እንዲጠናቀቅ ተገቢውን ድጋፍ ማድረግ ሲገባው፣ ችግሮች እንደሚፈጥሩ መግለጹ በጉባዔው ውጤታማነት ላይ ሥጋት እንዲያድርበት ምክንያት ሆኗል ያለው ኢመርጀንሲ ኮሚቴው፣ የጉባዔው ቦታ አዲስ አበባ እንዲሆን መገደዱን አስታውቋል፡፡ ከጠቅላላ ጉባዔው የቦታ ለውጥ ጎን ለጎን፣ የኢትዮጵያ እግር ኳስ ፌዴሬሽን 95 ሚሊዮን ብር የሕንፃ ግዥ መፈጸሙ ይታወቃል፡፡ ከግዥው ጋር ተያይዞ መንግሥት ማግኘት የሚገባው ካፒታል ‹‹ጌን ታክስ›› መክፈል ያለበት ‹‹ሻጭ›› ወይስ ‹‹ገዥ›› የሚለው ጉዳይ በውል ባለመታወቁ፣ ለመንግሥት መከፈል ያለበት ካፒታል ጌን ታክስ አለመከፈሉን ተከትሎ፣ ሻጭና ገዥ (በፌዴሬሽኑ) መካከል መካካድ ተፈጽሟል የሚሉ ቅሬታዎች መደመጥ ከጀመሩ ቢሰነባብትም፣ ጉዳዩን በሚመለከት ከሁለቱም አካላት ምንም ሳይባል መቆየቱ ይታወቃል፡፡ ባለፈው አራት ዓመታት ብሔራዊ ፌዴሬሽኑ ሲተዳደር የቆየው በአቶ ኢሳያስ ጅራ ካቢኔ መሆኑ ይታወቃል፡፡ አቶ ኢሳያስ ጅራ ነሐሴ 22 ቀን 2014 ዓ.ም. ይከናወናል ተብሎ ለሚጠበቀው የፌዴሬሽኑ ፕሬዚዳንታዊ ምርጫ ዕጩ ተወዳዳሪ ሆነው ቀርበዋል፡፡ ይህንኑ ተከትሎ ባለፉት አራት ዓመታት ውስጥ በፌዴሬሽኑ ከሕንፃው ግዥ ጀምሮ ከፍተኛ የሆነ የገንዘብ ብክነት የተፈጸመ መሆኑ፣ ተቋሙ ሲገለገልበት የነበረ 12 ሰዎች የመጫን አቅም ያለው ሚኒባስ ተሽከርካሪ ከቆመበት ቦታ በማን እንደተወሰደ ሳይታወቅ መጥፋቱ፣ በፌዴሬሽኑ ያላግባብ የሰዎች ቅጥር የተፈጸሙ መሆኑ፣ በፌዴሬሽኑ ወጪ ግለሰቦች ወደ ተለያዩ አገሮች ሲንቀሳቀሱ የቆዩበት ሁኔታ መኖሩና ከትልልቅ ዓለም አቀፍ ትጥቅ አምራች ድርጅቶች ጋር የተደረጉ የስፖንሰርሺፕ ስምምነቶች በጥቅም ትስስር የተከናወነ መሆኑን በመጥቀስ የሚናገሩ አሉ፡፡ በእነዚህና በሌሎችም ወቅታዊ ጉዳዮች ዙሪያ ደረጀ ጠገናው ከፌዴሬሽኑ ፕሬዚዳንት አቶ ኢሳያስ ጅራ ጋር ቆይታ አድርጓል፡፡

    ሪፖርተር፡- ከአራት ዓመታት በፊት የኢትዮጵያ እግር ኳስ ፌዴሬሽን ፕሬዚዳንት ሆነው መምጣትዎ ይታወቃል፡፡ በአሁኑ ወቅት ደግሞ የእርስዎ የአገልግሎት ጊዜ ተጠናቆ፣ ፌዴሬሽኑ አዳዲስ አመራሮችን ሊያስመርጥ በዝግጅት ላይ ይገኛል፡፡ በፌዴሬሽኑ የአመራርነት ዘመንዎ ከቀድሞዎቹ ምን ተረክበው ለቀጣዩ ምን ሊያስረክቡ ተዘጋጅተዋል?

    አቶ ኢሳያስ፡- በኢትዮጵያ እግር ኳስ ፌዴሬሽን መተዳደሪያ ደንብ፣ ከወንበር ያለፈ የአባልነት ክፍያ ወይም በካሽ ተቀምጦ መረከብ የሚያስችል አሠራር የለም፡፡ ተቋሙ በካፍና በፊፋ በሚበጀትለት በጀት ካልሆነ ከመንግሥት የሚበጀትለት 400 ሺሕ ብር በመሆኑ፣ በዚህ ደግሞ ምንም ማድረግ እንደማይቻል ግልጽ ነው፡፡ ከዚህ ባለፈ ከቀድሞዎቹ ምን ተረከባችሁ? ለሚለው፣ ከተቋሙ ውጪ የተረከብነው 16 ሚሊዮን ብር ዕዳ ነው፡፡ ይህ ሲባል ዕዳው በወቅቱ የነበሩ አመራሮች ለግል ጥቅማቸው የተጠቀሙበት ሳይሆን፣ የተቋሙን ሥራ በመሥራታቸው የመጣ ዕዳ እንደሆነ ይገባኛል፡፡ እኛም ይህን ተቋም ስንረከብ ዕዳው የእኛ እንዳልሆነ አምነን ከእነ ጣጣው ነው፡፡ ስለዚህ እኛ ትኩረት አድርገን የሠራነው፣ ተቋሙ ዕዳውን ከፍሎ እንዴት ትርፋማ መሆን ይችላል በሚለው ላይ ነው፡፡ ይህን ለማድረግ ደግሞ የብሔራዊ ተቋሙ ማርኬቲንግ ዲፓርትመንት ሊኖረው የሚገባው ቅርፅና ይዘት በማሻሻል፣ ያንንም ዕውን ማድረግ ነው፣ ውጤታማም አድርጎናል፡፡ ፌዴሬሽኑ አሁን ላይ ዕዳውን ከፍሎ 45 ሚሊዮን ብር በአካውንቱ ይገኛል፡፡ ይህንን ስል እኛ ምንም ዓይነት ክፍተት አልነበረብንም ማለቴ እንዳልሆነ ሊታወቅ ይገባል፡፡ በዋናነት በፌዴሬሽኑ በሁሉም ዲፓርትመንቶች ማሻሻያ የሚያስፈልጋቸው ክፍተቶች አሉ፡፡ በተጨማሪም ከታዳጊዎች እግር ኳስ ልማትና ከክልቦች መዋቅራዊ ይዘት ጋር በተያያዙ ከአሠልጣኞች ብቃት ማረጋገጫ ሥልጠና ፕሮግራም (ላይሰንሲንግ) ላይ ተስፋ ሰጪ ጅምሮች ቢኖሩም፣ ነገር ግን መጠነኛ ክፍተቶች መኖራቸው ግልጽ ነው፡፡ ሌላውና በትልቁ ሊነሳ የሚገባው ጉዳይ በተለይ የፕሪሚየር ሊግ ክለቦች ውድድራቸውን በራሳቸው የሚያስተዳድሩበት አሠራር ማለትም የኢትዮጵያ ፕሪሚየር ሊግ አክሲዮን ማኅበር እንዲመሠረት ብሔራዊ ተቋሙ የተጫወተው ሚና ከእነ ክፍተቱ እጅጉን የሚያኮራ ጅምር መሆኑን ሳልገልጽ ማለፍ አልፈልግም፡፡

    ሪፖርተር፡- በእርስዎ የአመራነት ዘመን አስቸጋሪ የሚሉት ተግዳሮት ምንድነው?

    አቶ ኢሳያስ፡- እንደ አጋጣሚ ሆኖ በእኔ የሚመራው ካቢኔ የፌዴሬሽኑን ኃላፊነት የተረከበበት ወቅት፣ በኢትዮጵያ ፖለቲካዊ የለውጥ ሒደት የተከናወነበት ጊዜ ስለነበረ ብዙ ነገሮች አስቸጋሪ የሆኑበት ሁኔታ ነበር፡፡ በተለይ በመጀመርያዎቹ የኃላፊነት ወራት አካባቢ ፖለቲካዊ የለውጥ ሒደቱ ይዞት የመጣው በቀጥታ በእግር ኳሱ ሜዳዎች ይንፀባረቅ ስለነበረ ነገሮችን አስቸጋሪ አድርጎብን ነበር፡፡ የነበረውን ሁሉ አልፈን ጥሩ ነገር ስንጠብቅ፣ ለኢትዮጵያ ብቻ ሳይሆን ለዓለም ሁሉ አስቸጋሪ ሆኖ የነበረው የኮቪድ-19 ወረርሽኝ ባስከተለው ችግር፣ እግር ኳሱ ከሰባት ወራት ላላነሰ ጊዜ ከእንቅስቃሴ ውጪ የሆነበት ሁኔታ የነበረ መሆኑ፣ ኮቪድ-19 ወረርሽኝን ስናልፍ በኢትዮጵያ የተፈጠረው ጦርነት እንዲሁ በአንድም ሆነ በሌላ እግር ኳሱ ላይ ያሳደረው ተፅዕኖ እንዲህ በቀላሉ የሚታይ አልነበረም፡፡ በዚህ ሁሉ ችግር ውስጥ ሆነንም ሥራዎችን ከመሥራት የተቆጠብንበት ጊዜ አልነበረም፡፡ በዚህ ሒደት ውስጥ ተቋሙ የራሱ ሕንፃ እንዲኖረው ተደርጓል፡፡ ከ1990ዎቹ መጀመርያ ጀምሮ የሁሉም ክለቦችና አመራሮች ጥያቄ ሆኖ የቆየውን የፕሪሚየር ሊግ አክሲዮን ማኅበር እንዲቋቋም አድርገናል፡፡ ታዳጊ ወጣቶች እግር ኳስ ልማት ላይ ዕድሜያቸው ከ15 ዓመት በታች ቁጥራቸው ከ27 እስከ 30 የሚደረሱ ቡድኖችን አቋቁመን (በሁለቱም ፆታ) 54 አሠልጣኞችን ቀጥረን ላለፉት አንድ ዓመት ከስድስት ወራት ደመወዝ እየከፈልን ነው፡፡ ከተጋገዝንና ሥራው ቀጣይነት እንዲኖረው ከተደረገ ትልቅ ተስፋ የሚጣልባቸው ታዳጊ ወጣቶች እንዳሉ ተመልክተን አረጋግጠናል፡፡ የሚገርመው ብሔራዊ ፌዴሬሽናችን ዕዳ ከፍሎ አሁን ላይ ለደረሰበት ደረጃ እንዲደርስ ቁልፍ ሥራ የሠራነው፣ ቀደም ባሉት ዓመታት ለፌዴሬሽኑ የዕዳ ክምችት መነሻ የሆነው በየደረጃው የሚቋቋሙ ብሔራዊ ቡድኖቻችን ለሆቴልና ለመሰል ወጪዎች ሲውል የነበረው ነው፡፡ በመሆኑም ለዓመታት ያለ ሥራ የተቀመጠው የካፍ አካዴሚ ለፌዴሬሽኑ ተላልፎ እንዲሰጠን ካደረግን በኋላ፣ አስፈላጊ የሚባሉ የማሻሻያ ግንባታዎችን በማድረግ ብሔራዊ ቡድኖቻችንን በአካዴሚው እያረፉ ዝግጅቶቻቸውን እንዲሠሩ በማድረጋችን ነው፡፡ ያንን በማድረጋችን የፋይናስ ሥርዓታችንን በአግባቡ እንድንጠቀም አስችሎናል፡፡ ገቢዎቻችንን በተመለከተ በአፍሪካ ዋንጫ ላይ ተሳትፎ ማድረጋችን እስከ 500 ሺሕ ዶላር ገንዘብ አግኝተናል፡፡ ከዋሊያ ቢራ ጋር ለሦስት ዓመታት 56 ሚሊዮን ብርና ከቡና ባንክ ጋር በተመሳሳይ ለሦስት ዓመታት 54 ሚሊዮን ብር የስፖንሰርሺፕ ስምምነት በማድረጋችን በፌዴሬሽኑ ተደርጎ የማያውቅ ለክልል ፌዴሬሽኖች ጭምር ባለፉት ሦስት ዓመታት እስከ 12 ሚሊዮን ብር ድጋፍ ለማድረግ የቻልንበት ሁኔታም አለ፡፡ ከሁሉም በላይ በዓለም አቀፉ ተቋም (የወዳጅነት ጨዋታዎችን ጨምሮ) ፕሮግራም መመራት ችለናል፡፡ ይሁንና ክለቦቻችን ዓለም አቀፍ ደረጃውን በጠበቀ መልኩ በአግባቡ ተደራጅተው በፕሮፌሽናል ሥርዓት (ሲስተም) ውስጥ እንዲገቡ በማድረግ ረገድ ፌዴሬሽኑ አሁንም ክፍተት አለበት፡፡ እንደ አጠቃላይ በተቋሙ ሰው ቢኖርም፣ ነገር ግን እንደ ፕሮፌሽናል ኢንስትቲዩሽንና ፕሮፌሽናል አመለካከትን ባካተተ መንገድ አለመደራጀቱም ክፍተታችን ነው፡፡ ይህንን የሚመጣው አመራር እንዲያሟላው የሚያስቀጥሉ መደላድሎችን፣ ሰነዶችን (ሌጋሲ ዶክመንት) አዘጋጅተናል፡፡ ሰነዱ ምን አቅደን ምን ሠራን? በቀጣይ የሚመጣው አመራር ምን ላይ ትኩረት ማድረግ እንዳለበት ጭምር የሚያመላክት ነው፡፡

    ሪፖርተር፡- በቅርቡ የኢትዮጵያ ፕሪሚየር ሊግ አክሲዮን ማኅበር በፌዴሬሽኑ ላይ ሲያነሳቸው የነበሩ ቅሬታዎች አሉ፡፡ አንደኛው የሕንፃ ግዥ ጉዳይ ይጠቀሳል፡፡ ሕንፃው እስካሁን ስሙ ለፌዴሬሽኑ አልዞረም የሚሉ አሉ፡፡ ግዥው በሕግ አግባብ የተፈጸመ ከሆነ ስሙ ያልዞረው ለምንድነው?

    አቶ ኢሳያስ፡- እንደተባለው ስሙ አልዞረም፡፡ ሕንፃውን ገዝተናል፡፡ ስንገዛው ግን ለንግድ አስበን አይደለም፡፡ ይሁንና ሕንፃው ትልቅ በመሆኑና የፋይናንስ አቅማችን ደካማ ስለነበረ እስከ ሦስተኛ ወለል (ፍሎር) ያለውን ክፍል አከራይተናል፡፡ ግዥውን በተመለከተ ግዥው የተፈጸመው ግልጽ ጨረታ ወጥቶ ነው፡፡ ከዚህ በተጨማሪ ግዥው ከመፈጸሙ በፊት የግዥ ኮሚቴ ከተለያዩ መንግሥታዊ ተቋማት ማለትም በወቅቱ ከስፖርት ኮሚሽንና ከአዲስ አበባ ከተማ ልማት ቢሮ ጭምር ባለሙያዎች እንዲሳተፉበት ተደርጎ ነው፡፡ ለግዥው የወጣው ገንዘብ 83 ሚሊዮን ሲሆን፣ ተጨማሪ 12 ሚሊዮኑ ደግሞ ታክስ ነው፡፡ ወደ ስሙ ስንመጣ መጀመርያ ቀደም ሲል ለመግለጽ እንደሞከርኩት የፋይናንስ አቅም ስላልነበረን ከእኛ የሚጠበቀውን የመንግሥት ክፍያ ሳንከፍል ቆይተን፣ አቅም እንዳገኘን 5.8 ሚሊዮን ብር ክፍያ ፈጽመናል፡፡ በውሉ ላይ ሕንፃው ከሽያጭ በፊት ያለበትን ዕዳ የሚከፍለው ሻጭ እንደሆነ ይገልጻል፡፡ ስም ማዞሪያና ሌሎች ወጪዎችንም በተመሳሳይ፡፡ እውነቱን ለመናር ሻጭ እንዲከፍል የሚጠበቀው ካፒታል ጌን ታክስ መኖሩን ያወቅነው ስም ለማዞር ስንጠይቅ ነው፡፡ ይህን መክፈል ያለበት አሁንም በውሉ ላይ ጥቅም ያገኘው አካል እንደሆነ ተካቷል፡፡ 2008 ዓ.ም. በወጣው የገቢ ግብር አዋጅ ላይ ይህንኑ ያረጋግጣል፡፡ በዚህ ጉዳይ ገቢዎች ቢሮ ሄደን ስናነጋግራቸው መክፈል ያለበት ሻጭ እንደሆነ ነው ያረጋገጡልን፡፡ በሕግ እኛን የሚመለከተን ነገር እንደሌለ አረጋግጠናል፡፡ ጉዳዩ በክስ ሒደት ላይ ስላለ ዝርዝሩን ለመናገር እቸገራለሁ፡፡ ያለው ሁኔታ ግን ይህን ይመስላል፡፡ ስሙ ያልዞረው በዚህ ምክንያት ነው፡፡ ግን ደግሞ ካርታ፣ ውክልናና ሌሎችም ባለቤትነታችንን የሚያረጋግጥ ማስረጃ እጃችን ላይ ነው፡፡ አክሲዮን ማኅበሩ በጉዳዩ አይመለከተውም፡፡ ቢመለከተውም ግን ጉዳዩ አሁን ላይ ለምን እንደተነሳ አልገባኝም፡፡

    ሪፖርተር፡- ዓለም አቀፍ ትጥቅ አምራች ድርጅት ከሆነው ‹‹አምብሮ›› ጋር የተደረገው የስፖንሰርሺፕ ስምምነት ፌዴሬሽኑ የሚወቀስበት ጉዳይ ሆኗል፡፡ ድርጅቱ ለኢትዮጵያ ብሔራዊ ቡድን ትጥቅ ለማቅረብ ስፖንሰርሺፕ አድርጓል ቢባልም፣ ፌዴሬሽኑ ከድርጅቱ የትጥቅ ግዥ ፈጽመዋል የሚሉ ስላሉ ምን ይላሉ?

    አቶ ኢሳያስ፡- ከአምብሮ ጋር ያደረግነው የስፖንሰርሺፕ ስምምነት ለብሔራዊ ቡድኖቻችን የሚሆኑ አልባሳት ያለ ክፍያ እንዲያቀርብ ነው፡፡ እኛ ግዥ የፈጸምነው ደግሞ የብሔራዊ ቡድኑ ደጋፊዎች ገዝተው የሚለብሱትን ትጥቅ ነው፡፡ ዓላማውም የፌዴሬሽኑን ገቢ ማጠናከር ነው፡፡ ከዚህ ውጪ የሚቀርብ ክስ ካለ ፌዴሬሽኑ ለመጠየቅ ዝግጁ ነው፡፡ እውነቱን ለመናገር ፌዴሬሽኑ ይህን በማድረጉ እስከ አምስት ሚሊዮን ብር ጥቅም አግኝቷል፡፡ ትጥቁ በአሁኑ ወቅት አንድ አንድ ሺሕ ብር ለደጋፊዎች እየተሸጠ ነው፣ ይቀጥላል፡፡

    ሪፖርተር፡- ‹‹የፌዴሬሽኑ ሚኒባስ መኪና በቆመበት ጠፍቷል›› የሚሉ አሉ፡፡ እንዴት ሊጠፋ ቻለ? ተጠያቂውስ ማን ነው?

    አቶ ኢሳያስ፡- እውነት ነው መኪናው ጠፍቷል፡፡ የመኪናው አሽከርካሪ ካቆመበት ቦታ ነው የጠፋው፣ ጉዳዩም በሕግ ተይዟል፡፡ ሁኔታውን በተመለከተ ያለኝ ሪፖርት አንድ ግለሰብ መኪናው ከቆመበት ቦታ ቁልፍ ከፍቶ ይዞት እንደሄደ ነው፡፡ ጉዳዩ ለፖሊስ ሪፖርት ተደርጎ በምርመራ ላይ ነው፡፡ ስለዚህ የተጠያቂነት ጫናው የመኪናውን ቁልፍ የተረከበው ሰው ላይ ነው፡፡

    ሪፖርተር፡- የኢትዮጵያ ፕሪሚየር ሊግ አክሲዮን ማኅበር ቀደም ሲል በጠቀስናቸው ማለትም ከሕንፃው ግዥ ጋር ያለውን ጉዳይ ባካተተ መልኩ በፌዴሬሽኑ ውስጥ ክፍተት እንዳለ መግለጫ ሰጥቷል፡፡ እርስዎ ዕጩ ተወዳዳሪ እንደመሆንዎ ቢመረጡ ከአክሲዮን ማኅበሩ ጋር በሚኖርዎት ግንኙነት ላይ ክፍተት አይፈጥርም?

    አቶ ኢሳያስ፡- አክሲዮን ማኅበሩ በተለይ ከፌዴሬሽኑ የሕንፃ ግዥ ጋር በተያያዘ መግለጫ ለመስጠት የጠቅላላ ጉባዔ አባል ስላልሆነ ሥልጣን (ኃላፊነት) የለውም፡፡ ጉዳዩ በዚህ ወቅት ለምን ሊነሳ እንደቻለ አልገባኝም፡፡ መግለጫው የአክሲዮን ማኅበሩ ቦርድ ውሳኔም አይመስለኝም፡፡ በዚህ ጉዳይ ከዚህ በላይ የምለው አይኖረኝም፡፡ ብትመረጥ ስለተባለው ማንኛውም ሰው የፈለገውን ለመደገፍም ሆነ ለመቃወም ሙሉ መብት ስላለው፣ አንዳችም ቅያሜ ሆነ ቅሬታ አይኖረኝም፡፡ እንዲያውም ከተመረጥኩ ከአክሲዮን ማኅበሩ ጋር በተሻለ ግንኙነት እንደምቀጥል ነው መናገር የምችለው፡፡ ምክንያቱም የኢትዮጵያ እግር ኳስ ፌዴሬሽን የተቋቋመው የኢትዮጵያን እግር ኳስ በበላይነት ለመምራት መሆኑ መዘንጋት ያለበት አይመስለኝም፡፡

    ሪፖርተር፡- ከምርጫው ውዝግብ ጋር በተገናኘ ዓለም አቀፉ ተቋም (ፊፋ) ለማጣራት ይመጣል የሚሉ አሉ፡፡ መረጃ አለዎት?

    አቶ ኢሳያስ፡- ሙሉ መረጃው አለኝ፡፡ እያንዳንዱ እየተሠራ ያለውን በሙሉ ለፊፋ ሚስጥር አይደለም፣ ያውቃል፡፡ ለማጠቃለል ምርጫው እንዴትና በምን ሁኔታ ሊከናወን እንደታሰበ፣ የምርጫ መመርያዎቹ በሙሉ ወደ እንግሊዝኛ ተቀይረው እንዲደርሰው ተደርጓል፡፡ ቀኑ ሲደርስ የሚመጣው ምርጫውን ለመታዘብ ብቻ እንጅ ለማጣራት እንዳልሆነ አውቃለሁ፡፡

    ሪፖተር፡- የምርጫው ቦታ ከጎንደር ወደ አዲስ አበባ እንዲቀየር ተደርጓል፡፡ ምክንያቱ ምንድነው? ፌዴሬሽኑ ይህንን የማድረግ ሥልጣን አለው?

    አቶ ኢሳያስ፡- ውሳኔው የተወሰነው በኢመርጀንሲ ኮሚቴ ነው፡፡ ምክንያቱ ደግሞ ቀደም ሲል ድምፅ እንዲሰጡ የተመዘገቡ ሰዎች ማለትም የክለብ ተወካዮች ከመራጭነት እንዲቀየሩ፣ ይህ የማይሆን ከሆነ ገባዔውን ሊያስተጓጉል የሚችል ሁኔታ እንደሚፈጠር መረጃ ስለደረሰን ነው፡፡ ‹ሥልጣን አለው ወይ?› ስለተባለው፣ ጉባዔውን ለማድረግ አስቸጋሪ ሁኔታዎች ሲገጥሙ ፌዴሬሽኑ የጉባዔውን ቦታና አጠቃላይ አካሄዱን በሚመለከት መወሰን እንደሚችል ከጉባዔ የተሰጠው ሥልጣን እንዳለ ሊታወቅ ይገባል፡፡           

    - Advertisement -

    ይመዝገቡ

    spot_img
    spot_img