Friday, September 30, 2022
ሌሎች ዓምዶች
    - Advertisement -
    - Advertisement -
    ልናገርየዩኒቨርሲቲ ተማሪዎች የፖለቲካ ተሳትፎ ለምን ደበዘዘ?

    የዩኒቨርሲቲ ተማሪዎች የፖለቲካ ተሳትፎ ለምን ደበዘዘ?

    ቀን:

    በመታሰቢያ መላከ ሕይወት

    በዓለማችን የፖለቲካ ትግልና የአብዮት ታሪክ ሁሌም የፊተኛውን የትግል ረድፍ ይዘው የሚታገሉ ተማሪዎች ናቸው፡፡ ይህ የሚሆንበት ዋናው ምክንያት የዩኒቨርሲቲ ተማሪዎች ገና ራሳቸውን ማስተዳደር ያልጀመሩ በመሆኑና የኢኮኖሚ ነፃነት ስላላቸው ሲሆን፣ ምናልባት ለእስር ቢዳረጉም በሥራቸው የሚያስተዳድሩት ቤተሰብ ስለሌላቸው ከፍተኛ የሆነ የነፃነት ስሜት ስለሚሰማቸው የፖለቲካ አጀንዳዎችን በግንባር ቀደምትነት ለማስተጋባት ድፍረቱ ይኖራቸዋል፡፡

    ጭቆናና ድህነት በተንሰራፋባቸው አገሮች ሠራተኛው ሕዝብ የፖለቲካ አጀንዳዎችን ለማስተጋባት የማይችልበት ዋናው ምክንያት፣ የዕለት ጉርሱን ለማግኘትና የቤተሰብ ፍጆታ ለመሸፈን የግድ በየቀኑ ወደ ሥራው መሄድ ስላለበት የፖለቲካ አጀንዳ ለማስተናገድ የሚሆን ጊዜ ኖሮት አያውቅም፡፡

    ሠራተኛው ሕዝብ ብሶት ፈንቅሎት አደባባይ የሚወጣው ሙሉ በሙሉ መኖር ሲያቅተውና አንድ ኮርኳሪ ምክንያት ሲፈጠር ነው፡፡ በብዙ የፖለቲካ ችግር ባለባቸው አገሮች የኢኮኖሚውም ችግር ከፍተኛ በመሆኑና ዩኒቨርሲቲ ገብቶ የመማር ዕድል የሚያገኙ ወጣቶች በአመዛኙ የተሻለ ገቢ ካላቸው ቤተሰቦች የወጡ ተማሪዎች በመሆናቸው ነው፡፡ የዩኒቨርሲቲ ተማሪዎች የፖለቲካ አጀንዳ ይዘው አደባባይ ቢወጡም የገዥው መንግሥት የፀጥታ ኃይሎች በተማሪዎች ላይ ብዙ ጉዳት ለማድረስ ፍላጎት ስለማይኖራቸው፣ በብዙ አገሮች የሰፊውን ሕዝብ ጥያቄ ይዘው አደባባይ የሚወጡት ተማሪዎች ናቸው፡፡ በሌላ አነጋገር ብሶታቸውን መግለጽ ለማይችሉ የኅብረተሰብ ክፍሎች አደባባይ ወጥተው መፈክር የሚያሰሙት ተማሪዎች ናቸው፡፡

    ወደ ኢትዮጵያ የተማሪዎች የትግል ታሪክ ስንመጣ ከንጉሡ ዘመን ጀምሮ የአገራችን ተማሪዎች የፖለቲካ አጀንዳን በማስተጋባት ሁሌም የፊተኛውን መስመር ይዘው ይታገሉ ነበር፡፡ እስከ ሞት የሚደርስ መስዋዕትነት የከፈሉ ተማሪዎች ነበሩ፡፡ ደርግ ወደ ሥልጣን ከመጣ በኋላ የተማሪዎች ትግል ሳይቋረጥ የቀጠለ ቢሆንም፣ ብዙ ተማሪዎች ከኢሕአፓ ጋር በመሆን የከተማ ጦርነት እስከ መክፈት የደረሰ ትግል ቢያካሂዱም፣ በስተመጨረሻ የደርግ ጥቃት በእጅጉ እያየለ በመሄዱ የኢሕአፓ ትግል ከተማሪዎች ትግል ጋር ሊደመሰስ ችሏል፡፡

    ሕወሓት/ኢሕአዴግ ወደ ሥልጣን ከመጣ በኋላ በተወሰነ ሁኔታ የተማሪዎች እንቅስቃሴ የነበረ ቢሆንም፣ ሕወሓት ይዞት የመጣው ‹‹የብሔር ይቅደም›› አጀንዳ በአጭር ጊዜ እየገነነ በመምጣቱ ተማሪዎች በአንድ ላይ አገራዊ አጀንዳ ይዘው መታገል የሚችሉበት ሁኔታ ከጊዜ ወደ ጊዜ ደበዘዘ፡፡

    ሕወሓት ሥልጣን እንደያዘ ‹‹ኢትዮጵያ ትቅደም!›› የሚለው አጀንዳ ‹‹ብሔር ይቅደም!›› በሚል መፈክር በመተካቱና ተማሪዎችም ከልጅነታቸው ጀምሮ ስለብሔር ጭቆና እየተነገራቸው በማደጋቸው፣ በኋላ ዩኒቨርሲቲ ሲገቡ ከተለያየ ብሔር የተውጣጡ ተማሪዎች በአንድነት ለአንድ ዓላማ መቆም የማይችሉበት ደረጃ ላይ ተደርሷል፡፡

    እንዲያውም በተቃራኒው እዚያው ዩኒቨርሲቲ ውስጥ ተማሪዎች ብሔር ለይተው ወደ ግጭት የገቡበት ሁኔታ እንደነበር የቅርብ ጊዜ ታሪክ ሆኖ እናስታውሰዋለን፡፡  

    በኢትዮጵያ ለበርካታ መቶ ዓመታት ተንሠራፍቶ የነበረውን የፊውዳል ሥርዓት እንዲወገድ የተማሪዎች ትግል ትልቅ አበርክቶ ነበረው፡፡ በወቅቱ የነበሩት የዩኒቨርሲቲ ተማሪዎች አብዛኞቹ የባላባት ልጆች የነበሩ ሲሆን፣ ቤተሰቦቻቸው በበቂ ሁኔታ ሊያስተዳድሯቸው የሚችሉ በመሆናቸው ለትግል የሚሆን ፍላጎትና ጊዜው ነበራቸው፡፡ በየትኛውም ዓለም እንደተደረገው አብዮት ተማሪዎች ድምፅ አልባ ለሆኑት የሰፊው የገበሬና የፋብሪካ ሠራተኞች አንደበት ሆነው የፖለቲካ አጀንዳዎችን አስተናግደዋል፡፡

    እዚህ ላይ በልጅነቴ እኔ የማስታውሰውን አንድ ታሪክ ላካፍላችሁ፡፡ እኔ በምኖርበት ስድስት ኪሎ አካባቢ በርካታ የትምህርት ተቋማት ስለነበሩ፣ የተማሪዎች ትግልም በስፋት ይካሄድ ነበር፡፡ በወቅቱ አንድ ቀን ‹‹መሬት ለአራሹ!›› የሚል መፈክር የያዙ ወጣቶች ከግማሽ ቀን በላይ ‹‹መሬት ለአራሹ!›› እያሉ መፈክር ሲያስተጋቡ ቆይተው፣ አንዱ ወጣት ይዞት የነበረውን መሬት ለአራሹ የሚለውን መፈክር ይዞ ከሰላማዊ ሠልፉ በኋላ ወደ ቤቱ ይመለስና ያንን መፈክር የያዘው ሰሌዳ ግቢያቸው ውስጥ ሳር ላይ ጣል ያደርገውና ቤቱ ገብቶ ምሳ ይበላል፡፡ ወላጅ አባቱ ደግሞ ቀድመው ምሳ በልተው ነበርና ወደ ውጪ ወጣ ብለው በረንዳ ላይ እንደተቀመጡ፣ ሳር ላይ የተቀመጠውን መፈክር ይመለከቱና በተወሰነ ደረጃ ግርምት ውስጥ ገብተው መተከዝ ጀመሩ፡፡ እኚህ አባት ቤተሰቦቻቸውን በዋናነት የሚያስተዳድሩት በእርሻ ሥራ ከሚገኝ ገቢ ነበር፡፡ ሰውየው ገጠር መሬት የነበራቸው ሲሆን፣ ቤተሰቦቻቸውን የሚያስተዳድሩት ያንን መሬት እያሳረሱ በጭሰኝነት ከሚያርሱ ገበሬዎች ከሚያገኙት የእርሻ ምርት ነበር፡፡ ከመንግሥት ሥራ የሚያገኙት ገንዘብ በጣም ውስን ነበር፡፡  

    ከብዙ ወራት በኋላ የመሬት ለአራሹ አዋጅ ታውጆ የገጠር መሬት ለአራሹ ከተላለፈ በኋላ፣ የዚህ ቤተሰብ ገቢ (ከገጠር እርሻ የሚገኘው) ሙሉ በሙሉ ተቋረጠ፡፡ አባት ገቢያቸው በጣም ቀንሶ ይህ መሬት ለአራሹ የሚል መፈክር ይዞ ወደ ቤቱ የመጣው ተማሪ ትምህርት ቤት ሊከፈት ሲል አባቱን አንድ ጥያቄ ጠየቃቸው፣ ‹‹አባዬ አሁን ትምህርት ቤት ሊከፈት ስለሆነ ልብስና ጫማ ግዛልኝ፤›› ብሎ አባቱን ሲጠይቅ አባት ትንሽ አሰብ አድርገው፣ ‹‹ልጄ ያኔ መሬት ለአራሹ እያልክ አደባባይ ስትወጣ አንተ የምትበላውንና የምትለብሰውን የሚገዛው ከገጠር እርሻ የሚገኘው ሰብል ተሸጦ እንደነበር እንዴት መገንዘብ አቃተህ? በል ከእንግዲህ ያለህን አብቃቅተህ ተጠቀም እንጂ፣ እኔ ለአንተ ልብስ የምገዛበት አቅም አይኖረኝም፤›› የሚል መልስ እንደሰጡት ራሱ የነገረኝ ትዝ ይለኛል፡፡

    ይህ ወጣት በኋላ አሕአፓን ተቀላቅሎ የትጥቅ ትግል ውስጥ ከገባ በኋላ ሕይወቱ እንዳለፈ አስታውሳለሁ፡፡ ከላይ በአጭሩ የተጠቀሰው ታሪክ የሚያስረዳን በየትም ዓለም እንደተካሄደው አብዮትና ለውጥ በአመዛኙ የሚነሳው ከዚያው ከገዥ መደብ ውስጥ እንደሆነ፣ በተለይ ደግሞ የኢኮኖሚ ነፃነት ያላቸው ወጣቶች የትግል አጀንዳን በማንፀባረቅ ሁልጊዜ የፊተኛው ረድፍ ላይ እንደሚሠለፉ ነው፡፡

    ከላይ እንደተጠቀሰው አሁን ዩኒቨርሲቲ የገቡ ተማሪዎች ሁሉም ሊባል በሚችል ሁኔታ፣ በኢሕአዴግ ዘመን የተወለዱና የብሔር ፖለቲካ ከበቂ በላይ ተጠቅጥቀው ያደጉ በመሆኑ አንድ ላይ ለአንድ ዓላማ የመቆም ብቃት መቼም አይኖራቸውም፡፡  

    ይህ ሒደት ተጠናክሮ ከቀጠለ ነገ ወጣቶች አንድ ዓይነት (ዩኒፎርም) ለብሰው  አገርን ከጠላት ለመታደግ በጋራ የማይሠለፉበት ሁኔታ ሊፈጠር ይችላል፡፡ በኦጋዴን በኩል ወይም በጋምቤላ በኩል ወደ አገር ውስጥ የገባ ጠላት፣ ‹‹እኔ ክልል ካልገባ እንደፈለገው›› የሚል ትውልድ ከተፈጠረ የአገር ሰላም ትልቅ ችግር ውስጥ ይገባል፡፡

    የኢትዮጵያዊነት ስሜት ዩኒቨርሲቲዎች ውስጥ እየደበዘዘ ከሄደ፣ የሚቀጥለው ትውልድ ወደ ሥራ ዓለም ሲሰማራ ኢትዮጵያዊነትን ፈልጎ ማግኘት አስቸጋሪ ሊሆን ይችላል፡፡ በአሁኑ ጊዜ እኛ በልጅነታችን እንደምናውቀው ተማሪዎች የፖለቲካ አጀንዳ ማስተጋባታቸው መቆሙ የሚያመላክተን በኢሕአዴግ የብሔር ፖለቲካ አንድ ከኢትዮጵያዊነት የተራራቀ ትውልድ መፈጠሩን ሲሆን፣ ባለፉት ከ30 ዓመታት በላይ ቀስ በቀስ መንደርተኝነትን እየተለማመድን ኢትዮጵያዊነትን እየረሳን እንደሆነ ማንም ሊመሰክረው የሚችለው ጉዳይ ነው፡፡

    በጣም የሚገርመው ኢትዮጵያ ውስጥ ያሉ ብሔር ብሔረሰቦች ምናልባት የእኔ የሚሉት የመሬት ክፍል ሊኖራቸው ይችላል፡፡ ነገር ግን አንዳችም የእኔ የሚሉት አጨቃጫቂ ያልሆነ ድንበር ያላቸውን ፈልጎ ማግኘት የማይታሰብ ነው፡፡ በመሆኑም የብሔር መንግሥት የመፍጠር ሒደት የመጨረሻው ውጤት በእርግጠኝነት ‹‹የድንበር ጦርነት›› ነው፡፡

    አሁን ዕድሜያቸው ወደ ሰላሳ የሚጠጉ ወጣቶች ከተወለዱበት ክልል ውጪ ያለውን የኢትዮጵያ መልክዓ ምድር አገሬ ብለው የመጥራት ፍላጎታቸው በጣም እየወረደ ነው የመጣው፡፡   

    በአሁኑ ጊዜ በደቡብ ክልል መሰነጣጠቅ በስፋት አጀንዳ የሆነበት ሁኔታ እንዳለ እየተመለከትን ነው፡፡ ከብሔር መሰነጣጠቅ ቀጥሎ የሚመጣው የጎሳ መሰነጣጠቅ መሆኑ የማይቀር ነው፡፡ አማራ ክልልም ቢሆን ‹‹እኔ አማራ ነኝ›› ከሚለው ስሜት ይልቅ እኔ ጎንደሬ፣ ጎጃሜ፣ ወሎዬ ነኝ የሚል ስሜት ወቅቱን ጠብቆ ብቅ ማለቱ አይቀርም፡፡

    በአሁኑ ጊዜ በእርግጠኝነት የሚሰማኝ ስሜት ምዕራባውያን በአንድ ወቅት ሶቪዬት ኅብረትን አፈራረስናት፣ ከዚያም ዩጎዝላቪያን አፈራረስናት፣ አሁን ደግሞ ኢትዮጵያን እያፈራረስናት ነው እያሉ የሚሳሳቁ ይመስለኛል፡፡ ሕገ መንግሥቱ በፈጠረው ቀውስ ምክንያት በአሁኑ ጊዜ የደቡብ ክልል በመፈራረስ ላይ ነው፡፡ ‹‹ክላስተር›› የሚባል አደረጃጀት ወይም የፌዴራል አዋቃቀር አንፈልግም እያሉ የደቡብ ክልል ሕዝቦች ወደ ትንንሽ የመንደር መንግሥትነት እየተለወጡ ነው፡፡ ጋምቤላም፣ ቤኒሻንጉል ጉሙዝም ክላስተር ስለሆኑ መፈራረሳቸው አይቀርም፡፡

    እዚህ ላይ የግድ መጠቀስ ያለበት ነገር ጠቅላይ ሚኒስትር ዓብይ አህመድ (ዶ/ር)  የሚመሩት መንግሥት፣ አሁን በሥራ ላይ ያለውን ሕገ መንግሥት ለማረም ወይም ለማስተካከል እየሠራ አይደለም፡፡ ወይም ደግሞ ያለውን ሕገ መንግሥት ለማስከበር እየሠራ አይደለም፡፡ የጉራጌ ሕዝቦች ያነሱት የክልልነት ጥያቄ ሙሉ በሙሉ በአንቀጽ 47/2 መሠረት ሕጋዊና ሕገ መንግሥታዊ ነው፡፡ ሕገ መንግሥቱ ስለክላስተር አደረጃጀት ምንም የሚለው ነገር የለም፡፡ በመሆኑም የተከበሩት ዓብይ (ዶ/ር) ወይ ሕገ መንግሥቱን አርሙ ወይ ደግሞ ሕገ መንግሥቱን አክብሩ፡፡

    በኢትዮጵያ ውስጥ ሥልጣን የያዘ ኃይል ኢትዮጵያን ለማልማት ከፈለገ እጅግ በጣም ቀላል ተግባር ነው፡፡ ምክንያቱም ኢትዮጵያ ሁሉም ዓይነት የተፈጥሮ ሀብት ያላት አገር ከመሆኗም በተጨማሪ፣ ምርጥ የሚባል በዓለም ካርታ ላይ ጂኦግራፊያዊ አቀማመጥ ያላት አገር ነች፡፡ በዚህ ምክንያት ወደ ሁሉም አቅጣጫ መነገድ የምትችል አገር ነች፡፡

    ኢትዮጵያ ውስጥ እጅግ ከባዱ ኃላፊነት የኢትዮጵያን ሕዝብ ፍላጎት አቻችሎ መምራትና ኋላቀር አስተሳሰብን ቀይሮ የሠለጠነ ትውልድ የመፍጠር ኃላፊነት ነው፡፡ ብዙ የአገር መሪዎች የሠለጠነ ትውልድ ለመፍጠር እጅግ አካታች፣ አስቸጋሪና ጭካኔ የተሞላበት ተግባር ፈጽመዋል፡፡ የተሳካላቸውም፣ ያልተሳካላቸውም አሉ፡፡

    በኢትዮጵያ የትግል ታሪክ ሁሌም የለውጥ አጀንዳን ይዘው የሚነሱት ተማሪዎች ቢሆኑም፣ ወደ ሥልጣን የሚመጡት ግን ወታደራዊ አደረጃጀት ያላቸውና በተለያዩ ምክንያቶች ቡድናዊ አደረጃጀት ያላቸው ስብስቦች ናቸው፡፡ አብዮት ለማካሄድ ከዛሬ 60 ዓመት ጀምሮ ትግል የተካሄደ ቢሆንም፣ አገር መምራት የሚገባው የኅብረተሰብ ክፍል ወደ ሥልጣን ሊመጣ የሚችልበት ምንም ዓይነት ክፍተት አልተፈጠረም፡፡

    በኢትዮጵያ ሁሌም ተቋማዊ አመራር ሳይሆን የግለሰብ ፈላጭ ቆራጭነት በተከታታይ የተካሄደ በመሆኑ፣ ለይስሙላ የተፈጠሩ ተቋማት መኖራቸውን ከመስማት በዘለለ፣ አሁንም ወደ ፊትም የኢትዮጵያ የፖለቲከ ዕጣ ፈንታ ማንም ሊተነብየው የማይችል፣ ምን ዓይነት ሁኔታ ይዞ ሊመጣ እንደሚችልም ለመገመት እንኳን በሚከብድ ሁኔታ ውስጥ ነው የምንገኘው፡፡

    በተለይ የአገራችን ሥልጣን የመያዝ ሒደት ፓርላሜንታዊ በመሆኑ፣ ፓርላማው የሚሾመው ሰው እስኪታወቅ የኢትዮጵያ ሕዝብ መሪውን የሚያውቅበት ሁኔታ የለም፡፡ ፕሬዚዳንታዊ የምርጫ ሥርዓት ቢኖር ኖሮ፣ የኢትዮጵያ ሕዝብ የመጨረሻ ተወዳዳሪ የሆኑትን ሁለት ወይም ሦስት ተወዳዳሪዎች አውቆ በራሱ ካርድ የሚመርጥ በመሆኑ ብቃት ያላቸው ሰዎች በግልም፣ በፓርቲም ተወዳድረው ወደ ሥልጣን የሚመጡበት ዕድል ይኖር ነበር፡፡

    ዓብይ (ዶ/ር) በሥልጣን ላይ በቆዩባቸው ከአራት የሚበልጡ ዓመታት ስህተት ለማረም የተጀመረ ምንም ዓይነት ጉዞ ባለመኖሩ፣ አሁንም መጪው ዘመን ደህና ነገር ይዞ ይመጣል ለማለት የሚቻልበት ምንም ሁኔታ የለም፡፡ የኢትዮጵያ ሕዝብ ሁሌም ከመንግሥት ብቻ የሚጠብቀው መንግሥታዊ አገልግሎት ከጊዜ ወደ ጊዜ እየተሻሻለ መሄድ ሲገባው፣ እጅግ በሚያሳዝን ሁኔታ ከጊዜ ወደ ጊዜ እየተበላሸ በመሄድ ላይ ነው፡፡  

    በዓለም ታሪክ ሁሌም ስለአንድ አገር ሲወራ በዚያች አገር የተከናወነው መጥፎም ይሁን ጥሩ ነገር ዋጋ የሚሰጠው በወቅቱ ለነበረው አመራር ነው፡፡ ለዚህ ነው ‹‹የዓለም ታሪክ የመሪዎች ታሪክ ነው›› የሚባለው፡፡ በብዙ የሠለጠኑ አገሮች ውስጥ ያሉ ሕዝቦች ታሪክ ሲማሩ፣ አገራችን ይህንንና ያንን ያገኘችው እከሌ አመራር ይሰጥ በነበረበት ወቅት ነው እየተባለ ይተረካል፡፡ በሌላ አነጋገር በርካታ መሪዎች በተከታታይ አገርን የሚለውጥ ሥራ ከሠሩ ስማቸው በታሪክ እየተነሳ፣ አገሪቱ ደግሞ እየበለፀች ትሄዳለች፡፡ በርካታ ታሪክ የሠሩ የአመራር ትውልድ ያገኘች አገር ብዙ የተፈጥሮ ሀብት ባይኖራት እንኳን ማደጓና መበልፀጓ አይቀርም፡፡ እኛ ለዚህ አልታደልንም፡፡ ሁሉም አገሩን የሚወድ ዜጋ ይህ እስኪሳካ ድረስ የበኩሉን ማድረግ አለበት፡፡  

    ይህንን ጽሑፍ እየጻፍኩ የዓባይ ግድብ ሁለተኛው ኃይል ማመንጫ ሥራ መጀመሩን ጠቅላይ ሚኒስትራችን እያበሰሩ ነበር፡፡ ዜናው በእርግጥ ሁሉንም የሚያስደስት ነው፡፡ በተራ በተራ ሁሉም ተርባይኖች ሥራ ጀምረው አገራችን ወደ ላቀ ደረጃ እንደምትሸጋገር በእርግጠኝነት መናገር ይቻላል፡፡  

    ነገር ግን ዓብይ (ዶ/ር) የግድቡን የመጀመርውን የኃይል ማመንጫ ሥራ ሲያስጀምሩምና ሁለተኛውን ኃይል ማመንጫ ኃይል ሲያስጀምሩ የግድ መናገር የነበረባቸው ነገር፣ በባዶ እግራቸው እባብ እየነደፋቸው ያንን የመሬት ክፍል ከቅኝ ገዥዎች እጅ ፈልቅቀው የኢትዮጵያ አካል ያደረጉትን አባቶቻችንና መሪዎቹን አመሥግነው ማለፍ ነበረባቸው፡፡

    ሌላው በዚህ ወቅት ስለዓባይ ግድብ ስናወራ የግድቡን የማስጀመር ሥራ የሠራው የሕወሓቱ መሪ መለስ ዜናዊ ሲሆን፣ እንዲስተጓጉል ያደረገው ደግሞ ሌላው የሕወሓት መሪ ደብረጽዮን (ዶ/ር) ነው፡፡ ታሪክ ጸሐፊዎች በዚህ ምክንያት ዓባይን የገነባው የሕወሐት አመራር ነው ለማለት የሚቸገሩ ይመስለኛል፡፡

    ሕወሓት በአሁኑ ወቅት ወይ ትግራይን ገንጥሎ ሌላ አገር አልፈጠረም፣ ወይም ደግሞ የትግራይ ሕዝብ እንደተቀሩት የኢትዮጵያ ሕዝቦች አገሪቱ ልትሰጠው የምትችለውን አገልግሎት እንዲያገኝ እየሠራ አይደለም፡፡

    ሕወሓት የትግራይን ሕዝብ በልማት ሥራ እንዲወጠር ወይም ሌላ ሥራ ላይ እንዲውል ማድረግ ባለመቻሉ፣ የትግራይን ሕዝብ በጦርነት አጀንዳ እንዲወጠር አድርጎ ህልውናውን ለማስቀጠል እየሠራ ነው፡፡ በዚህ ሁኔታ የዚህ ጽሑፍ አዘጋጅ በድርድር መቋጫ ያገኛል ብሎ አያምንም፡፡

    በአጠቃላይ በኢትዮጵያ አመራር ሲሰጡ የነበሩ ከቀዳማዊ ኃይለ ሥላሴ እስከ  ዓብይ አህመድ (ዶ/ር) ያሉ መሪዎች አንድ ተቀባይነት ያለው ሥርዓት ዘርግተው፣ ከእነሱ የሚቀጥለው መሪ ደግሞ ያንን ሥርዓት ወደ ተሻለ ደረጃ እንዲያደርሰው ሠርተው ባለማወቃቸው አንዱ የዘረጋውን ሥርዓት ሌላው እያፈረሰ፣ አንዱ የጻፈውን ሕገ መንግሥት ሌላው ቀዶ እየጣለ፣ ሁሉም አዲስ መሪ በመጣ ቁጥር ‹‹ሀ›› ብለን እየጀመርን ይሄው እስካሁን በድህነት እየኖርን ነው፡፡

    ከአንድ መሪ የሚጠበቀው ከላይ ለመጠጥቀስ እንደ ተሞከረው በተማሪዎች አመፅ ወይም በአጠቃላይ በሕዝባዊ አመፅ ሳይሆን መወገድ ያለበት ሕግና ሥርዓትን ተከትሎ፣ ተቀባይነት ያለው ሥርዓት ለመዘርጋት ከልቡ ሠርቶ፣ ጊዜው ሲደርስ ሥልጣኑን ለተተኪው አውርሶ ተከታታይ ያለው የመንግሥት አስተዳደር የግድ መጀመር አለበት፡፡

    እኛ የነፃነት አየር ስንተነፍስ በቅኝ ግዛት ሥር የነበረችው ኬንያ፣ አሁን መሪዋ የሥልጣን ዘመኑ በመጠናቀቁ ለተተኪው ለማስረከብ በሒደት ላይ ነው፡፡ ይህ በእውነቱ ሊቆጨን ይገባል፡፡

    የእኛ መሪዎች በተቃራኒው እጅግ ፀረ ዴሞክራሲ የሆነ ተግባር፣ ማለትም የአዲስ አበባን ሕዝብ ፍላጎት ሳይጠይቅ የአዲስ አበባን መሬት ለኦሮሚያ ለመስጠት በመሥራት ላይ ናቸው፡፡ ሕወሓትም ወልቃይትን ይዞ ነበር ከሥልጣን ሲወገድ፣ ግን መሬቱም ተቀማ፡፡ ከታሪክ መማር ለምን አቃተን? ወሮ መያዝና የወረሩትን ማፅናት በእጅጉ ይለያያል፡፡

    ከአዘጋጁ፡- ጽሑፉ የጸሐፊውን አመለካካት ብቻ የሚያንፀባርቅ መሆኑን እየገለጽን፣ በኢሜይል አድራሻቸው metasebyamelaku@gmail.com ማግኘት ይቻላል፡፡

    - Advertisement -

    ይመዝገቡ

    spot_img
    spot_img