Thursday, October 6, 2022
ሌሎች ዓምዶች
    - Advertisment -
    - Advertisment -

    አሁንም ትኩረት ለሚፈሰው የንፁኃን ደምና ዕንባ!

    ዜጎችን ከማናቸውም ዓይነት ጥቃቶች የመከላከል ኃላፊነት የመንግሥት ለመሆኑ የሚያነጋግርም ሆነ የሚያወዛግብ አይደለም፡፡ በተለያዩ የአገሪቱ ክፍሎች ማንነትን መሠረት ያደረጉ ጥቃቶችንና ጭፍጨፋዎችን ማስቆም፣ ወደፊት ሊከሰቱ የሚችሉ ጥቃቶችንና ውድመቶችን ከወዲሁ መከላከል የመንግሥት ሥራ ነው፡፡ በተለይ በኦሮሚያ ክልል የወለጋ ዞኖች ውስጥ መረን የተለቀቀው ጭፍጨፋ እንዲቆም፣ ሕግና ሥርዓት ኖሮ ዜጎች በፈለጉበት ሥፍራ እንዲኖሩና እንዲሠሩ፣ እንዲሁም እጃቸው በንፁኃን ደም የተጨማለቀ ለፍርድ እንዲቀርቡ መንግሥትም ሆነ አገር ወዳድ ኢትዮጵያውያን በጋራ መነሳት አለባቸው፡፡ ለዚህ ስኬት ደግሞ ከጭፍጨፋው፣ ከማፈናቀሉና ከዘረፋው ተጠቃሚ የሆኑ ኃይሎች ጉዳይ ግን ፈጽሞ መዘንጋት የለበትም፡፡ በሴራ ፖለቲካ የተካኑና የሚፈልጉትን ዓላማ ለማሳካት፣ በማንነት ላይ ያነጣጠሩ ጥቃቶችንና ጭፍጨፋዎችን የሚመሩ ኃይሎች ላይ መተኮር አለበት፡፡ አስተማማኝ እንቅስቃሴዎች ለማካሄድ ግን በተለያዩ ጊዜያት ጥቃት የተፈጸመባቸው አካባቢዎች በአካል በመገኘት ማስረጃዎችን ማሰባሰብና መሰነድ፣ ሁነኛ የዓይን ምስክሮችን ማግኘትና ቃላቸውን መቀበል፣ እንዲሁም በአካባቢዎቹ የሚገኙ የመንግሥት መዋቅሮችንና የፀጥታ ኃይሎችን አመራርና ስምሪት አብጠርጥሮ በማጣራት የሴራ ፖለቲከኞችን ድርጊት ማጋለጥ የግድ ነው፡፡ ሰላም የሚሰፍነው የፀጥታ ሥጋት ሲወገድ ብቻ ነው፡፡

    ኢትዮጵያ ውስጥ እየተፈጸሙ ያሉ ሴራዎች በሙሉ መሠረታቸው ውሸት ነው፡፡ ሴረኞች ከቻሉ በማሳመን ካልቻሉ ደግሞ በማደናገር ዓላማቸውን ለማስፈጸም የሚጠቀሙት እውነትን አፍነው ውሸትን በማንገሥ ነው፡፡ ማንኛውም ሥርዓት የሚገነባው በውሸት መሠረት ላይ ከሆነ ዋነኛ ጠላቱ እውነት ነው፡፡ በኢትዮጵያ ነባራዊ ሁኔታ የፖለቲካ ምኅዳሩ የሴረኞች መፈንጫ በመሆኑ፣ ዜጎች ማንነታቸው እየተለየ ሲጨፈጨፉና የተረፉት ሲፈናቀሉ ከእውነቱ ይልቅ ውሸት የበላይነት ይዞ ትክክለኛውን መረጃ ለማግኘት እያቃተ ነው፡፡ በተለይ በኦሮሚያ ክልል ውስጥ በተለያዩ ሥፍራዎች ማንነትን መሠረት ያደረጉ ጥቃቶችና ፍጅቶችን ማስቆም አቅቶ፣ አንዱ በሌላው ላይ ሲያላክክና ሲወነጃጀል በገሐድ እየተሰማ ነው፡፡ በዚህ መሀል ደግሞ ግባቸው ምን እንደሆነ በውል የማይታወቅ አደናጋሪ መረጃዎች እየተለቀቁ፣ ሕግ ከማስከበር ይልቅ የሴራ ፖለቲካውን የሚያሾሩ መሰሪነቶችም እየታዩ ነው፡፡ ሰላምና መረጋጋት ጠፍቶ ንፁኃን የመንግሥት ያለህ እያሉ እሪታቸውን ሲያሰሙ ሕግ ማስከበር ያስፈልጋል፡፡ የሴራ ፖለቲካው ጥልፍልፎሽ ውሉ እንደጠፋበት ልቃቂት እየተጎለጎለ እውነት እየተደበቀ ነው፡፡ እየፈሰሰ ካለው የንፁኃን ደምና ዕንባ ለማትረፍ የሚፈልጉ ደግሞ ‹‹አዛኝ ቅቤ አንጓች›› ሆነው እየቀረቡ፣ የሴራ ጉንጎናውን የበለጠ እያጦዙት ነው፡፡

    በኦሮሚያ ክልል እየተፈጸመ ያለው ፍጅት በክልሉ መንግሥት አመራሮች ቅንብር ነው ተብሎ በአደባባይ የሚነገርበት ደረጃ ላይ ሲደረስ የፌዴራሉም ሆነ የክልሉ መንግሥት፣ እንዲሁም ገዥው የብልፅግና ፓርቲ በእውነትና በውሸት መካከል ያለውን ዳር ድንበር በግልጽ ማሳየት ይጠበቅባቸዋል፡፡ በሕዝብ ስም እየተነገደና እየተቆመረ መዝለቅ ስለማይቻል፣ የኢትዮጵያ ሕዝብ የንፁኃንን ደም የሚያፈሱት እነ ማን መሆናቸውን የማወቅ መብት አለው፡፡ በሴራ ፖለቲካ ምክንያት የአገር ግድግዳና ማገር እየፈራረሰ ስለሆነ፣ በውሸት የተጠቀለለው የሴራ ፖለቲካ ዓላማና ግቡ ለሕዝብ ግልጽ መደረግ አለበት፡፡ ለዚህ ደግሞ የአገር ህልውና ያሳስበናል የሚሉ ወገኖች በድፍረት እውነቱን ገላልጠው የማሳየት ታሪካዊ ግዴታ አለባቸው፡፡ አንድ ግለሰብም ሆነ ቡድን በመንግሥትና በገዥው ፓርቲ አካላት ላይ ጣቱን ሲቀስር፣ ጣት የተቀሰረበት አካል ደግሞ የራሱን ንፅህና በሚገባ የማሳየት ኃላፊነት ይኖርበታል፡፡ ማስረጃ የማቅረብ ኃላፊነት የወንጃዩ ቢሆንም እንኳ፣ ተወንጃዩ ደግሞ የመንግሥት አካል ስለሆነና እየተፈጸመ ያለው ዕልቂት አስፈሪ በመሆኑ ራሱን በአሳማኝ ማስረጃ መከላከል ይጠበቅበታል፡፡

    ሌላው መረሳት የሌለበት ነጥብ በኦሮሚያ ክልል ውስጥ እየተፈጸመ ያለው ጭፍጨፋ፣ ሁሉንም የኦሮሞ ተወላጆች ማሳሰብ እንዳለበት ነው፡፡ እያንዳንዱ የኦሮሞ ተወላጅ፣ ፖለቲከኛ፣ ነጋዴ፣ አርሶ አደር፣ ወዘተ በክልሉ ውስጥ እየተፈጸመ ያለውን ፍጅት በፍጥነት ለማስቆምና ሕግ እንዲከበር በጋራ መሥራት ይኖርበታል፡፡ የሴራ ፖለቲካው በማን እየተዘወረ እንደሆነ መጣራት ያለበት በሕግ ብቻ እንዲሆን መተባበር ያስፈልጋል፡፡ በኦሮሞ ሕዝብ ስም ንፁኃን የአማራ ተወላጆች ታይቶና ተሰምቶ የማይታወቅ ጭፍጨፋ ሲፈጸምባቸው ዝም ብሎ ማየት የታሪክ ተጠያቂነት ያስከትላል፡፡ ማንኛውም ሕዝብ የማስተዳደር ኃላፊነት ያለበት መንግሥትም ሆነ በነፃ አውጪነት ዓላማ የሚንቀሳቀስ አካል፣ የሕዝብን ደኅንነት የመጠበቅ ኃላፊነት አለበት እንጂ በሴራ ፖለቲካ ፍጅት ማቀነባበር የለበትም፡፡ የኦሮሞ ክልል ተወላጆች ከምንም ነገር በላይ ለሰብዓዊነትና ለሕግ ትልቅ ዋጋ መስጠት ይጠበቅባቸዋል፡፡ ንፁኃንን በማንነታቸው ምክንያት ደማቸውን በከንቱ የሚያፈሱ ሕዝብ ማስተዳደርም ሆነ ነፃ የማውጣት ሞራላዊ ብቃት እንደሌላቸው መታመን አለበት፡፡

    መስከረም 5 ቀን 2011 ዓ.ም. በቡራዩ የጀመረው ጥቃትና ጭፍጨፋ በርካታ አካባቢዎችን ካዳረሰ በኋላ፣ ወለጋ ውስጥ እጅግ በጣም ዘግናኝ በሆነ ጭካኔ ተባብሶ ሲቀጥል ለአንዴና ለመጨረሻ ጊዜ ማስቆም የወቅቱ የማይታለፍ ቀይ መስመር መሆን አለበት፡፡ ኢትዮጵያውያን በብሔር፣ በእምነትና በፖለቲካ አቋም ምክንያት ልዩነት ሳይፈጥሩ ይህንን አረመኔያዊ ድርጊት ተባብረው ማስቆም ይጠበቅባቸዋል፡፡ ለዚህ ደግሞ የሚያስፈልገው ሰብዓዊነት ብቻ ነው፡፡ ይህንን የተቀደሰ ተግባር በትብብር ማከናወን ካልተቻለ ህሊና ሊያርፍ አይችልም፡፡ ለዘመናት አብረው ክፉና ደጉን ዘመን ያሳለፉ ኢትዮጵያውያን በሴረኞች ክፋት ሳይጠለፉ፣ በወገኖቻቸው ላይ እየወረደ ያለውን መቅሰፍት በጋራ መከላከልና ማስወገድ አለባቸው፡፡ ሴረኞች ሕግ እንዳይከበር፣ በሰላም እንዳይኖር፣ እኩልነት እንዳይሰፍንና በአጠቃላይ ኢትዮጵያ አደገኛ ምዕራፍ ውስጥ እንድትገባ በማድረግ ዓላማቸውን ለማሳካት እየተዋደቁ ነው፡፡ በዚህ መሀል ደግሞ ምንም የማይመለከታቸው ንፁኃን ማንነታቸው እየተለየ እንደ አውሬ እየታደኑ እየተጨፈጨፉ ነው፡፡ ኢትዮጵያውያን ከዳር እስከ ዳር ይህንን አረመኔያዊ እንቅስቃሴ የማስቆም ኃላፊነት አለባቸው፡፡ በሕዝብ ስም የሚነግዱ ግፈኞች ሴራቸው ተጋልጦ ሕግ ፊት እንዲቀርቡ አስፈላጊው መስዋዕትነት መከፈል አለበት፡፡

    የመንግሥት ባለሥልጣናትም ሆኑ የገዥው ፓርቲ ሹማምንት ከይስሙላ መግለጫና ማብራሪያ ተቆጥበው፣ በፍጥነት ሕግ እንዲከበርና የወንጀል ተጠርጣሪዎች ሕግ ፊት እንዲቀርቡ ተነሳሽነታቸውን በግልጽ ያሳዩ፡፡ በቀናት ልዩነት ወለጋ ውስጥ የአማራ ተወላጆች በጅምላ ፍጅት እየተፈጸመባቸው፣ እንደተለመደው ውላቸው በማይታወቅ መግለጫዎችና ውሳኔዎች ማድበስበስ መቆም አለበት፡፡ ከቡራዩ ጭፍጨፋ ጀምሮ ሕግ እንዲከበር በተደጋጋሚ ተጠይቆ ሰሚ በመጥፋቱ፣ አገር ሊያፈርስ የሚችለው የሴራ ፖለቲካ ውጤት የሆነው አረመኔያዊ ድርጊት ተባብሶ ቀጥሏል፡፡ አሁን ባለው ነባራዊ ሁኔታ ግን ይህ ድርጊት በፍጥነት ካልተገታና ተጠርጣሪዎች ሕግ ፊት ካልቀረቡ፣ ከዚህ በፊት ከታዩት በባሰ ጭፍጨፋው ሊቀጥል ይችላል፡፡ አሁን ጭካኔውና ግፉ ከመጠን በላይ በመሆኑ፣ ማንም የማንንም ወንጀል የሚደብቅበት ምክንያት ስለማይኖር፣ ለሕግ የበላይነት መስፈን ታጥቆ መነሳት ይበጃል፡፡ ኢትዮጵያውያን ከሴራ ፖለቲካ የተረፋቸው ጭፍጨፋ፣ መፈናቀል፣ መዘረፍ፣ መራብ፣ መታረዝና የሰው እጅ ማየት ስለሆነ ማንኛውንም ነገር ለመጋፈጥ ወደኋላ ማለት አይገባም፡፡ አሁንም በሴራ ፖለቲካ የሚፈሰው የንፁኃን ደምና ዕንባ ትኩረት ይፈልጋል! 

    በብዛት የተነበቡ ፅሁፎች

    አገር የሚገቡ የግል ዕቃዎችን በሚገድበው መመርያ ምክንያት በርካታ ንብረቶች በጉምሩክ መያዛቸው ተገለጸ

    በአየር መንገድ ተጓዦች ወደ አገር የሚገቡትን የግል መገልገያ ዕቃዎች...

    የተጨማሪ እሴት ታክስ አዋጅን የሚተካ ረቂቅ ተዘጋጀ

    ከቫት ነፃ የነበረው የኤሌክትሪክ ኃይል ገደብ ተቀመጠለት የገንዘብ ሚኒስቴር ከሃያ...

    ባንኮች እንዲዋሀዱ እስከ ማስገደድ ሊገባ እንደሚችል ብሔራዊ ባንክ ጠቆመ

    በአሁኑ ወቅት የባንኮች ቁጥር እየጨመረ መምጣቱ ችግር የሚሆንና የውጭ...

    የአፍሪካ ሕብረት የሰላም ንግግሩን ለማስጀመር ያቀረበውን ጥሪ መንግስት ተቀበለ

    የአፍሪካ ሕብረት በፌደራል መንግስትና በህወሃት መካከል የሰላም ንግግር እንዲጀመር...
    - Advertisment -

    ትኩስ ፅሁፎች