Friday, September 30, 2022
ሌሎች ዓምዶች

    ገጣሚ በላይ በቀለ ወያ ታፍኖ ከተወሰደ በኋላ የት እንደቆየ እንደማያውቅ ተናገረ

    - Advertisement -spot_img

    በብዛት የተነበቡ

    ባለፈው ሳምንት ማክሰኞ ሰኔ 21 ቀን 2014 ዓ.ም. ምሣ እየበላ ከነበረበት በተለምዶ ፈረንሣይ ከሚባለው ሠፈር፣ ጊዮርጊስ ከተባለ ምግብ ቤት ለጥያቄ ትፈለጋለህ ብለው አፍነው የወሰዱት የፀጥታ ሰዎች በማይታወቅ ቦታ ለሳምንት አቆይተው እንደለቀቁት ገጣሚ በላይ በቀለ ወያ ለሪፖርተር ተናገረ፡፡ ሰኞ ሰኔ 27 ቀን 2014 ዓ.ም. ምሽት ወደ አራት ሰዓት በተለምዶ ገላን እየተባለ ከሚጠራው አካባቢ የፀጥታ ኃይሎቹ እንደለቀቁት የገለጸው ገጣሚው፣ በቆይታው ወቅት የተለየ ማሰቃየትም ሆነ እንግልት እንዳልተፈጸመበት አስረድቷል፡፡

    ስለታሰረበት ሁኔታ ለሪፖርተር ያስረዳው ገጣሚ በላይ፣ ባለሥልጣናት በሚሄዱበት ቪ8 እየተባለ በሚጠራ መኪና በመጡ ሰዎች ምሣ ከሚበላበት ቦታ ለጥያቄ ትፈለጋለህ ተብሎ መወሰዱን ገልጿል፡፡ መኪና ውስጥም ሆነ በወሰዱኝ እስር ቤት የፊት መከለያ ጭንብል አጥልቀው እንዳቆዩት ያስረዳው በላይ፣ ለመፀዳዳት ካልሆነ በስተቀር መውጣት ሳይፈቀድለት በጨለማ ክፍል ውስጥ መቆየቱን ተናግሯል፡፡ ‹‹ከቤተሰብም ሆነ ከማንም ጋር በስልክም እንድገናኝ አልፈቀዱልኝም፡፡ ሲወስዱኝ ያዩ ሰዎች በመጠቆማቸው ይመስለኛል መታሰሬም የታወቀው፤›› ሲል አስረድቷል፡፡

    ስለተጠረጠረበት ወንጀል ወይም ለእስራት ስላበቃው ምክንያት የፀጥታ ሰዎቹ ነግረውት እንደሆነ የተጠየቀው ገጣሚ በላይ፣ ስለምርመራው ብዙም ማውራት እንደማይችል ተናግሯል፡፡ ‹‹የራሳቸውን ጥያቄ ጠይቀውኛል፡፡ እኔም መልስ ነው የምለውን መልሼላቸዋለሁ፤›› ሲል የተናገረው ገጣሚው፣ በስተመጨረሻ በማያውቀው ሁኔታ ሰኞ ምሽት አራት ሰዓት አካባቢ ፊቱን ጭንብል በማልበስ በመኪና ወስደው ገላን በሚባል አካባቢ በማውረድ፣ ‹‹ፊትህን ሳታዞር ቀጥ ብለህ ሂድ›› ከሚል ትዕዛዝ ጋር እንደለቀቁት አስረድቷል፡፡

    ‹‹ሕግና መንግሥት ባለበት አገር ሰውን አፍኖ ፊትን ሸፍኖ ባዶ ክፍል ውስጥ ለሳምንት ማስቀመጥ ተገቢ አይደለም፤›› ሲል የተናገረው በላይ፣ ከእስር ከተፈታ በኋላ ቢረጋጉም ቤተሰቦቹና ወዳጅ ዘመዶቹ በከባድ ጭንቀትና ሐዘን ውስጥ መቆየታቸውንም አመልክቷል፡፡

    ገጣሚ በላይ በተለይ መንግሥትን በሚሸነቁጡና ወቅታዊ አጀንዳዎች ላይ ጠንካራ ትችት በሚያቀርቡ የግጥም መድብሎቹ ይታወቃል፡፡ በማኅበራዊ አንቂነቱና በህልውና ዘመቻው ወቅት በግንባር ለሚፋለሙ የኢትዮጵያ ኃይሎች ዕርዳታ በማስተባበር የሚታወቀው ገጣሚው፣ በሥልጣን ላይ ያለውን መንግሥት ጨምሮ በበርካታ ጉዳዮች ላይ ተቺ ግጥሞችን ሲጽፍ መቆየቱ አይዘነጋም፡፡

    - Advertisement -

    ትኩስ ጽሑፎች