Monday, May 27, 2024
- Advertisement -
- Advertisement -

ስፖርትዋሊያ ቢራ ለዋሊያዎቹ የገባውን የአጋርነት ስምምነት ሊያቋርጥ ነው

ዋሊያ ቢራ ለዋሊያዎቹ የገባውን የአጋርነት ስምምነት ሊያቋርጥ ነው

ቀን:

ድርጅቱ ለአራት ዓመት 64 ሚሊዮን ብር ለመክፈል ስምምነት ነበረው

የኢትዮጵያ ብሔራዊ ቡድን (ዋሊያዎቹ) ዋና አጋር በመሆን ባለፈው የውድድር ዓመት ከኢትዮጵያ እግር ኳስ ፌዴሬሽን ጋር የአጋርነት ስምምነት ያደረገው ዋሊያ ቢራ፣ ‹‹በውል ስምምነቱ መሠረት ተጠቃሚ አልሆንኩም›› በሚል ውሉን ሊያቋርጥ መሆኑ ተሰማ፡፡ ድርጅቱ የማስጠንቀቂያ ደብዳቤ ለብሔራዊ ፌዴሬሽኑ ማስገባቱ ታውቋል፡፡

ቀደም ሲል ድርጅቱ የገባው ውል የኢትዮጵያ ብሔራዊ ቡድን በሜዳውና በደጋፊው ፊት በሚያደርገው አኅጉራዊና ዓለም አቀፋዊ ውድድሮች ምርቱ እንዲያስተዋውቅለት ሲሆን፣ ክፍያውም ለአራት ዓመት በየሩብ ዓመቱ የሚከፈል 64 ሚሊዮን ብር ነው፡፡

- Advertisement -

ይሁንና ዋሊያ ቢራ የአጋርነት ስምምነቱን ባደረገ ማግሥት፣ የአፍሪካ እግር ኳስ ኮንፌዴሬሽን (ካፍ) በኢትዮጵያ የሚገኙ ስታዲየሞች የዓለም አቀፉንም ሆነ የካፍን ዝቅተኛ መሥፈርት አያሟሉም በሚል ዕገዳ እንዲተላለፍባቸው አድርጓል፡፡ በዚህም ብሔራዊ ቡድኑ በሜዳው የሚያደርጋቸው ሁሉም ጨዋታዎች በገለልተኛ ሜዳ እንደሚሆን ውሳኔ ማሳለፉ አይዘነጋም፡፡

ድርጅቱ የካፍን ውሳኔ ተከትሎ ማግኘት የሚገባው ጥቅም ላይ ማለትም ለአገር ውስጥ ገበያ የሚያውለው ዋሊያ ቢራ፣ ምርቱ እንዲተዋወቅለት የሚፈልገው ኢትዮጵያ ውስጥ በመሆኑ ‹‹ውሳኔው ጥቅሜን ያሳጣኛል›› በሚል የማስጠንቀቂያ ደብዳቤ ያስገባ መሆኑ ፌዴሬሽኑ አረጋግጧል፡፡

ባለፈው ሳምንት በዋሊያ ቢራ በኩል የአጋርነት ስምምነቱ የሚመለከታቸው አካሎች ከኢትዮጵያ እግር ኳስ ፌዴሬሽን አመራሮች ጋር በጉዳዩ መነጋገራቸው ምንጮች ለሪፖርተር ገልጸዋል፡፡ በውይይቱ ብሔራዊ ፌዴሬሽኑ የድርጅቱን ጥቅም ለማስጠበቅ ጥረት እያደረገ መሆኑን ቢገልጽም፣ በድርጅቱ በኩል ግን ምንም የተቀየረ ውሳኔ እንደሌለ ነው የተሰማው፡፡

ስለጉዳዩ የኢትዮጵያ እግር ኳስ ፌዴሬሽን የጽሕፈት ቤት ኃላፊ አቶ ባህሩ ጥላሁን እንደገለጹት፣ ፌዴሬሽኑ ነገሮችን በስምምነቱ መሠረት ለማስኬድ አስቸጋሪ ቢሆኑበትም፣ በተቻለ መጠን የድርጅቱን ጥቅም ለማስጠበቅ ሲንቀሳቀስ ቆይቷል፡፡

በመሆኑም ድርጅቱ ውሉን ከማቋረጡ በፊት የሦስት ወራት ማስጠንቀቂያ ለኢትዮጵያ እግር ኳስ ፌዴሬሽን ከአንድ ወር በፊት ማስገባቱን የገለጹት የጽሕፈት ቤት ኃላፊው፣ አሁን ባለው ሁኔታ ውሉ ከሁለት ወራት በኋላ የሚቋረጥበት ዕድል እንደሚኖር ነው የገለጹት፡፡

የኢትዮጵያ ብሔራዊ ቡድን እንዲህ እንዳሁኑ በራሱ ሜዳ የመጫወት ዕድሉ ባይበላሽ ኖሮ፣ ዋሊያ ቢራ የዋሊያዎቹ አጋር በመሆን ለአራት ዓመታት 64 ሚሊዮን ብር ክፍያ፣ በየሩብ ዓመቱ ለመክፈል ነበር ስምምነት ያደረገው፡፡ ከጉዳዩ ጋር ተያይዞ የዋሊያ ቢራ የሥራ ኃላፊዎችን ለማግኘት ያደረግነው ጥረት አልተሳካም፡፡

spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ

የፋይናንስ ኢንዱስትሪው ለውጭ ባንኮች መከፈት አገር በቀል ባንኮችን ለምን አስፈራቸው?

የማይረጥቡ ዓሳዎች የፋይናንስ ተቋማት መሪዎች ሙግት ሲሞገት! - በአመሐ...

የምርጫ 97 ትውስታ!

በበቀለ ሹሜ      መሰናዶ ኢሕአዴግ ተሰነጣጥቆ ከመወገድ ከተረፈ በኋላ፣ አገዛዙን ከማሻሻልና...

ሸማቾች የሚሰቃዩት በዋጋ ንረት ብቻ አይደለም!

የሸማች ችግር ብዙ ነው፡፡ ሸማቾች የሚፈተኑት ባልተገባ የዋጋ ጭማሪ...

መንግሥት ከለጋሽ አካላት ሀብት ለማግኘት የጀመረውን ድርድር አጠናክሮ እንዲቀጥል ፓርላማው አሳሰበ

የሦስት ዩኒቨርሲቲዎች ፕሬዚዳንቶች በኦዲት ግኝት ከኃላፊነታቸው መነሳታቸው ተገልጿል አዲስ አበባ...