Saturday, May 18, 2024

የአውሮፓ ኅብረት የግብፅን የውኃ ደኅንነት ለማስጠበቅ በህዳሴ ግድብ ላይ አሳሪ ስምምነት እንዲደረግ ጠየቀ

- Advertisement -spot_img

በብዛት የተነበቡ

የአውሮፓ ኅብረት ከግብፅ ጋር በመሆን ባወጣው የጋራ መግለጫ፣ ‹‹የግብፅን የውኃ ድኅንነት ማስጠበቅ›› ሲባል የህዳሴው ግድብ ሙሌትና ኦፕሬሽ ላይ አሳሪ ስምምነት እንዲደረግ ጠየቀ፡፡

የአውሮፓ ኅብረት ምክር ቤትና ግብፅ እሑድ ሰኔ 12 ቀን 2014 ዓ.ም. በሉግዘምበርግ ዘጠነኛውን የጋራ ስብሰባቸውን፣ በኅብረቱ የውጭ ጉዳይና የደኅንነት ፖሊሲ ከፍተኛ ተወካይ ጆሴፍ ቦሬልና በግብፁ የውጭ ጉዳይ ሚኒስትር ሳሚ ሽኩሪ መሪነት ማካሄዳቸውን ኅብረቱ አስታውቋል፡፡ በሁለቱ አካላት ንግግር ላይ በዓባይ ውኃና ሌሎች ጉዳዮች ላይ ትኩረት አድርገው መነጋገራቸው በመግለጫው ላይ ተጠቅሷል፡፡

ስለዓባይ ውኃ በተደረገው ንግግር ላይ ኅብረቱ፣ የዓባይ ውኃ ለግብፅ ‹‹ብቸኛ›› የውኃ ምንጭ መሆኑንና ኢትዮጵያ ካለባት የውኃ እጥረት አኳያ ትልቅ ጥቅም ያለው መሆኑን ጠቅሷል፡፡ በዚህም ምክንያት የተባበሩት መንግሥታት የፀጥታ ምክር ቤት መስከረም 5 ቀን 2014 ዓ.ም. ባደረገው ውይይት፣ የህዳሴው ግድብ ውኃ ሙሌትና ኦፕሬሽንን በተመለከተ አሳሪ ስምምነት እንዲደረግ በሚል ያወጣውን መግለጫ እንደሚቀበል አስታውቋል፡፡

በተቻለ ፍጥነት ይህ ዓይነቱ ስምምነት የመደረሱ ጉዳይ የኅብረቱና የግብፅ ቅድሚያ የሚሰጡት አጀንዳ እንደሆነ በጋራ መግለጫው ላይ ተገልጿል፡፡ መግለጫው እንደሚያትተው አሳሪ ስምምነት ላይ የመደረሱ ጉዳይ በዚህ ደረጃ ትኩረት የተሰጠው የግብፅን የውኃ ድኅንነት ለማስጠበቅና በቀጣናው ላይ ሰላምና ማረጋጋትን ለማስፈን ሲባል ነው፡፡

ኅብረቱ በአፍሪካ ኅብረት የሚመራውን ውይይት እንደሚደግፍ በመግለጫው ላይ ተጠቅሷል፡፡ ኅብረቱ ውይይቱን ከመደገፍ ባሻገርም ለሁሉም አካላት በኩል ጠቃሚና ተፈላጊ ሆኖ ከተገኘ ከዓለም አቀፍ ሕግጋት ጋር በተጣጣመ መልኩ የጋራ የውኃ ሀብትን ማስተዳደር ላይ ያለውን ልምድ በማሳየት ወሳኝ ሚና ለመጫወት ፍላጎት እንዳለው አሳውቋል፡፡

ኅብረቱ በመግለጫው ግብፅና ኢትዮጵያ በዓባይ ውኃ ላይ ያላቸውን ‹‹አለመግባባት›› በተመለከተ፣ የዓለም አቀፉ ማኅበረሰብ የፖለቲካ ፍላጎትና ዕርዳታ ካለ ጉዳዩ ወደ ዕድል ሊቀየር ይችላል የሚል ሐሳብ አካቷል፡፡ በህዳሴው ግድብ ላይ ስምምነት ቢደረግ በሚፈጠረው የተረጋጋ ሁኔታና የውጭ ኢንቨስትመንት ዕድል የተነሳ በናይል ተፋሰስ ላይ የሚገኙ በሚሊዮን የሚቆጠሩ ሰዎችን እንደሚጠቅምም ኅብረቱ ተናግሯል፡፡

spot_img
- Advertisement -

ትኩስ ጽሑፎች

ተዛማጅ ጽሑፎች

- Advertisement -
- Advertisement -